આઈપીએલ 2025ની 51મી રોમાંચક મેચ આજે અમદાવાદના નરેન્દ્ર મોદી સ્ટેડિયમ ખાતે ગુજરાત ટાઇટન્સ (GT) અને સનરાઇઝર્સ હૈદરાબાદ (SRH) વચ્ચે રમાઈ રહી છે. આ મહત્વપૂર્ણ મુકાબલામાં હૈદરાબાદે ટૉસ જીતીને પ્રથમ બોલિંગ કરવાનો નિર્ણય લીધો છે.

સનરાઇઝર્સ હૈદરાબાદે પોતાની પ્લેઇંગ-11માં કોઈ ફેરફાર કર્યો નથી, જ્યારે ગુજરાત ટાઇટન્સે પોતાની ટીમમાં એક બદલાવ કર્યો છે. કરીમ જનતના સ્થાને ગેરાલ્ડ કોત્ઝીને આજે તક આપવામાં આવી છે.

આ સિઝનમાં આ બંને ટીમો બીજી વખત સામસામે ટકરાશે. અગાઉ રમાયેલી મેચમાં ગુજરાતે હૈદરાબાદને તેના જ હોમ ગ્રાઉન્ડ પર 7 વિકેટે હરાવ્યું હતું. જો કે, હૈદરાબાદ હજુ સુધી અમદાવાદમાં ગુજરાત સામે એક પણ મેચ જીતવામાં સફળ રહ્યું નથી.

પોઈન્ટ ટેબલની વાત કરીએ તો, ગુજરાત ટાઇટન્સ 9 મેચોમાં 12 પોઈન્ટ સાથે ચોથા ક્રમે છે અને પ્લેઓફમાં પોતાનું સ્થાન નિશ્ચિત કરવા માટે તેમને હવે માત્ર બે જીતની જરૂર છે. બીજી તરફ, સનરાઇઝર્સ હૈદરાબાદ 9 મેચોમાં માત્ર 6 પોઈન્ટ સાથે પોઈન્ટ ટેબલમાં નવમા સ્થાને છે અને જો તેઓ આજની મેચ હારે છે, તો પ્લેઓફની રેસમાંથી લગભગ બહાર થઈ શકે છે.