રાજકોટની ભાગોળે વધુ એક જીવલેણ અકસ્માતની ઘટના બની હતી. કાલાવડ રોડ પર મેટોડા નજીક વાહન અકસ્‍માતમાં મવડી વિસ્‍તારમાં રહેતાં અને મેટોડામાં રેડીમેઇડ કપડાનો વેપાર કરતાં યુવાનનું ગંભીર ઇજા થવાથી મોત થયું હતું. બનાવને લઇ યુવાનના પરિવારમાં કલ્પાંત છવાય ગયો હતો.

અકસ્માતના આ બનાવની જાણવા મળતી વિગતો મુજબ, મવડી રોડ પર મારૂતિનગર-૧માં રહેતો મિતેશ દેવજીભાઇ સનુરા (ઉ.વ.૨૦) તા. ૨૭/૯ના રોજ સાંજે મેટોડાથી એક્‍ટીવા હંકારી રાજકોટ ઘર તરફ આવી રહ્યો હતો ત્‍યારે બાલાજી વેફર્સ નજીક રોડ પર તેને વાહન અકસ્‍માતમાં ઇજા થતાં સારવાર માટે રાજકોટ સિવિલ હોસ્‍પિટલમાં ખસેડાયો હતો.અહીં સારવાર દરમિયાન ગત સાંજે મૃત્‍યુ થયું હતું.

મિતેશ બે ભાઇ અને એક બહેનમાં નાનો અને અપરિણીત હતો. તેને મેટોડામાં ખોડીયાર ફેશન નામે રેડીમેઇડ કપડાની દૂકાન હતી. ૨૭મીએ તે દૂકાન વધાવીને ઘરે આવી રહ્યો હતો ત્‍યારે રસ્‍તામાં આ બનાવ બન્‍યો હતો. તેનું વાહન સ્‍લીપ થયું કે કોઇ વાહનની ઠોકરે ચડી ગયો? તે અંગે પોલીસે તપાસ હાથ ધરી છે. હોસ્‍પિટલ ચોકીના સ્‍ટાફે મેટોડા પોલીસને જાણ કરી હતી.