જામનગરના મહાપાલીકાના રાજકારણમાં વોર્ડ નં.૧, ૨, ૩, ૪, ૭, ૮, ૧૦, ૧૧, ૧૨, ૧૫ અને ૧૬માં ખરાખરીનો ખેલ શરૂ થયો છે, કેટલાક નવોદીત ભાજપના કાર્યકરોએ આ વખતે ટીકીટ માંગવાનો વિચાર કર્યો છે, અત્યારે પુરા જોરશોરથી કામગીરી કરી રહ્યા છે, કેટલાક જુના જોગીઓના પત્તા કટ્ટ થવાની પણ પુરી શકયતા છે ત્યારે પ્રદેશની ભાજપ સંગઠન પાંખ હવે કોને-કોને ટીકીટ ફાળવશે તે આગામી દિવસોમાં ચૂંટણી જાહેર થયા બાદ ખબર પડશે. 


જામ્યુકોના ત્રણેક પદાધિકારીઓની ટીકીટ કપાય તેવી ચર્ચા !!
જામનગર મહાપાલીકામાં હાલમાં પાંચ પદાધિકારીઓ છે તેમાંથી આગામી દિવસોમાં ત્રણેક જેટલા પદાધિકારીઓની ટીકીટ ઉપર મોવડી મંડળ કાતર ફેરવી દે તેવી પણ શકયતા છે, બીજી તરફ ત્રણ ટર્મથી ચૂંટાઇ રહેલા નગરસેવકોને કદાચ ઘરે બેસવાનો વારો આવે તો નવાઇ નહીં, ટીકીટની ફાળવણીમાં આ વખતે કેટલાક આશ્ર્ચર્યજનક ફેરફાર આવી શકે છે, કેટલાક યુવાનોને તક મળે તેવી પણ શકયતા છે, ઉપરાંત મેયર પદના દાવેદાર ગણાતા બેથી ત્રણ મહીલા ઉમેદવારો પણ આ વખતે ટીકીટમાંથી બાકાત રહે તેવી વાતોએ જોર પકડયું છે. સામાન્ય બેઠક ઘટી જતાં કેટલાક સિનીયર નગરસેવકો પણ પોતાનો વોર્ડ બદલવા અત્યારથી જ ચિંતામાં લાગી ગયા છે, આમ આગામી દિવસોમાં રાજકારણ ખુબ જ કઠણાઇભર્યુ રહેશે. હજુ તો ચુંટણી જાહેર થઇ નથી પરંતુ ભાજપ, આપ અને કોંગ્રેસ વચ્ચે આ વખતે સારી એવી ટકકર થાય તો નવાઇ નહીં. ​​​​​​​