વિશ્વમાં પ્રથમ વખત કોઈ આર્ટિફિશિયલ ઇન્ટેલિજન્સ (AI) એજન્ટ દ્વારા સરકારી પોર્ટલ (વેબસાઇટ) ને હેક કરીને સંવેદનશીલ ડેટા ચોરી કરવાનો ચોંકાવનારો કિસ્સો સામે આવ્યો છે. આ અભૂતપૂર્વ ઘટના ઓસ્ટ્રેલિયામાં બની છે, જ્યાં ઓપનએઆઈ (OpenAI) ના એક એઆઈ એજન્ટે ત્યાંના સરકારી હેલ્થકેર સર્વિસ પોર્ટલમાં ગેરકાયદેસર રીતે ઘૂસણખોરી કરીને મહત્વપૂર્ણ ફાઇલો સુધી પહોંચ બનાવી લીધી હતી. આ હેકિંગ દ્વારા એઆઈ એજન્ટે આરોગ્ય ખર્ચ અને દવાની સબસિડી સાથે જોડાયેલા અત્યંત મહત્વપૂર્ણ ડેટાની માહિતી મેળવી લીધી હતી.

આ સમગ્ર ઘટનામાં સૌથી વધુ હેરાન કરનારી બાબત એ છે કે ઓપનએઆઈ કંપનીએ આ સાયબર ઘૂસણખોરી અંગેની જાણ ઓસ્ટ્રેલિયા સરકારને 54 દિવસ પછી કરી હતી. આટલો મોટો વિલંબ થવા બદલ ઓસ્ટ્રેલિયાના વડાપ્રધાન એન્થની અલ્બનીઝે ઓપનએઆઈના વડા સેમ ઓલ્ટમેન સાથે ટેલિફોનિક વાતચીત કરીને પોતાની કડક નારાજગી વ્યક્ત કરી છે. હાલમાં ઓસ્ટ્રેલિયન સુરક્ષા એજન્સીઓ એ વાતની ઊંડાણપૂર્વક તપાસ કરી રહી છે કે શું કંપની સામે ગુનાહિત કેસ બને છે કે નહીં અને તેમની પોતાની સુરક્ષા એજન્સીઓ આ હેકિંગને સમયસર કેમ પકડી ન શકી. બીજી તરફ, ઓપનએઆઈએ સ્વીકાર્યું છે કે તેમના મોડેલે એવાં પગલાં ભર્યાં હતાં જે કરવાનો કંપનીનો કોઈ ઈરાદો નહોતો.

આ ઘટના બાદ સંયુક્ત રાષ્ટ્ર સુરક્ષા પરિષદ (UNSC) માં ટેકનોલોજી ક્ષેત્રના અગ્રણીઓએ એઆઈના અણધાર્યા અને અનિયંત્રિત થતા ખતરાઓ અંગે ઊંડી ચિંતા વ્યક્ત કરી છે. ઓપનએઆઈના સીઈઓ સેમ ઓલ્ટમેને પોતે ચેતવણી આપતાં જણાવ્યું હતું કે એઆઈ પરથી નિયંત્રણ ગુમાવવાનું જોખમ દિવસેને દિવસે વધી રહ્યું છે, તેથી વિશ્વના તમામ દેશોએ સાથે મળીને કડક સુરક્ષા ધોરણો નક્કી કરવા પડશે.

​​​​​​​અન્ય એઆઈ કંપની એન્થ્રોપિકના સીઈઓ ડારિયો અમોડેઈએ પણ જણાવ્યું હતું કે જો એઆઈ ટેકનોલોજીને યોગ્ય રીતે અને જવાબદારીપૂર્વક સંભાળવામાં નહીં આવે, તો તે સમગ્ર માનવજાત માટે મોટો ખતરો બની શકે છે. આ ઘટનાએ વૈશ્વિક સ્તરે સાયબર સુરક્ષા અને એઆઈ નિયંત્રણ અંગે નવા સવાલો ઊભા કર્યા છે.