રાજકોટ શહેરના કાલાવાડ રોડ પર આવેલા કોસ્મોપ્લેક્ષ સિનેમા સામેની સરાઝા હોટલના બેન્કવેટ હોલમાં ચાલી રહેલી એક જન્મદિવસની હાઈપ્રોફાઈલ પાર્ટી પર એલસીબી ઝોન-૨ ની ટીમે આકસ્મિક દરોડો પાડ્યો હતો. ચિરાગ અરવિંદ પટેલ નામના શખ્સે પોતાના આગોતરા જન્મદિનની ઉજવણી માટે આ પાર્ટીનું ભવ્ય આયોજન કર્યું હતું. આ મહેફીલમાં વિદેશી દારૂ પીવા અને પડાપડી કરવાના ગંભીર આક્ષેપો સાથે પોલીસે ૩૮ જેટલા આરોપીઓ સામે પ્રોહીબીશન એક્ટ હેઠળ ગુનો નોંધીને કાયદેસરની સઘન કાર્યવાહી હાથ ધરી છે.  જોકે આજે જામીન મળતા જ આરોપીઓ પોલીસ સ્ટેશનમાંથી મીડિયાથી બચવા માટે રીતસરના ભાગતા નજરે પડ્યા હતા. એક આરોપી તો દિવાલ ટપતો નજરે પડ્યો હતો. આ દૃશ્યોનો વીડિયો સોશિયલ મીડિયામાં ઝડપથી વાયરલ થઈ રહ્યો છે.

બાતમીના આધારે એલસીબીની આકસ્મિક રેડ અને નાસભાગ

View this post on Instagram

A post shared by Aajkaal (@aajkaaldaily)

ગત રાત્રે એલસીબી ઝોન-૨ ના પોલીસ કર્મચારીઓ પેટ્રોલીંગમાં હતા, તે દરમિયાન ચોક્કસ બાતમી મળી હતી કે સરાઝા હોટલના બીજા માળે આવેલા બેન્કવેટ હોલમાં મોટા પ્રમાણમાં સ્ત્રી-પુરુષો એકત્ર થઈને દારૂની મહેફીલ માણી રહ્યા છે. આ બાતમીના આધારે પોલીસે પંચો અને મહિલા પોલીસ કર્મચારીઓને સાથે રાખીને હોટલ પર દરોડો પાડ્યો હતો. હોટલના બેન્કવેટ હોલમાં પ્રવેશતાની સાથે જ યુ-આકારના ટેબલ પર ગોઠવાયેલા ખાદ્યપદાર્થો અને વિદેશી દારૂની ખાલી તથા ભરેલી બોટલો નજરે પડી હતી. અચાનક પોલીસને જોઈને પાર્ટીમાં હાજર રહેલા લોકોમાં ભારે નાસભાગ મચી ગઈ હતી, જો કે પોલીસે ત્વરિત કાર્યવાહી કરીને તમામની સ્થિતિ પર કાબૂ મેળવ્યો હતો.   

વિદેશી દારૂનો જથ્થો અને કાયદાકીય તજવીજ

આ હાઈપ્રોફાઈલ પાર્ટીની તપાસ દરમિયાન હોટલના બેન્કવેટ હોલમાંથી પેટ્રોન સિલ્વર ટેકીલા, ધ ગ્લેનલિવેટ સિંગલ મોલ્ટ સ્કોચ વ્હિસ્કી, જેગરમાંઈસ્ટર લિકર, જોની વૉકર ગોલ્ડ લેબલ અને જેસલમેર ક્રાફ્ટ ઇન્ડિયન જીન જેવી મોંઘી બ્રાન્ડ્સનો વિદેશી દારૂ મળી આવ્યો હતો. પોલીસે આ દારૂ અને અન્ય મુદ્દામાલ મળીને કુલ ₹૧૭,૫૦૦/- નો મુદ્દામાલ પંચોની હાજરીમાં કબ્જે કર્યો હતો. આ પ્રકરણમાં પકડાયેલા તમામ આરોપીઓની મેડિકલ તપાસ તેમજ બ્રીથ એનાલાઇઝર ટેસ્ટ કરાવવાની તજવીજ હાથ ધરવામાં આવી છે, જેના કારણે રાજકોટના હોટલ અને બેન્કવેટ સંચાલકોમાં ભારે ફફડાટ ફેલાઈ ગયો છે.   

૩૮ આરોપીઓ સામે પ્રોહીબીશન એક્ટ હેઠળ કડક કાર્યવાહી

આ પાર્ટીમાં હાજર રહેલા મુખ્ય આયોજકો સહિત કુલ ૩૮ આરોપીઓની ઓળખ કરવામાં આવી હતી. પોલીસે સ્થળ પર જ બ્રીથ એનાલાઇઝર ટેસ્ટ દ્વારા અને ત્યારબાદ સિવિલ હોસ્પિટલ ખાતે મેડીકલ તપાસણી માટે તમામ શંકાસ્પદ ઇસમોને મોકલવાની તજવીજ હાથ ધરી હતી. આ તમામ વિરુદ્ધ પ્રોહીબીશન એક્ટની કલમ ૬૬(૧)બી, ૬૫(એ)(એ), ૭૫(એ), ૮૩, ૮૬ અને ૧૧૬-બી મુજબ ગુનો નોંધવામાં આવ્યો છે. આ ઘટનાને પગલે રાજકોટના બેન્કવેટ હોલ અને હોટલ સંચાલકોમાં ભારે ચકચાર મચી ગઈ છે.