દમામ (સાઉદી અરેબિયા)થી નવી દિલ્હી જતી એર ઈન્ડિયા એક્સપ્રેસની ફ્લાઇટને 31 ઓગસ્ટે બોમ્બની ખોટી ધમકીના કારણે અમદાવાદમાં ઈમરજન્સી લેન્ડિંગ કરાવવું પડ્યું હતું. આ કેસમાં ફ્લાઇટની મહિલા ફર્સ્ટ ઓફિસર પોલીસની શંકાના ઘેરામાં આવી છે.શહેર પોલીસના સૂત્રોના જણાવ્યા અનુસાર, તપાસકર્તાઓએ મુસાફરો અને ક્રૂ મેમ્બર્સ સહિતના લોકોના હસ્તાક્ષરના નમૂના તપાસ્યા હતા. ધમકીભરી ચિઠ્ઠી પર લખેલા શબ્દો અને ફર્સ્ટ ઓફિસરના હસ્તાક્ષર વચ્ચે 65 ટકા મેળ હોવાનો દાવો કરવામાં આવ્યો છે.તપાસ દરમિયાન પોલીસને જાણવા મળ્યું હોવાનું કહેવાય છે કે આ મહિલા અગાઉ એવી બીજી ફ્લાઇટની ક્રૂ મેમ્બર પણ હતી, જેને બોમ્બની ધમકી આપવામાં આવી હતી. એક વરિષ્ઠ પોલીસ અધિકારીએ જણાવ્યું હતું કે, બંને કેસના હસ્તાક્ષરના નમૂનાઓ એકબીજા સાથે મેળ ખાય છે.એર ઈન્ડિયા એક્સપ્રેસની ફ્લાઇટ આઈએક્સ170માં બોમ્બની ધમકીવાળી ચિઠ્ઠી વિમાનના શૌચાલયમાંથી મળી આવી હતી. ત્યારબાદ પાઇલોટે એર ટ્રાફિક કંટ્રોલને જાણ કરી હતી.વિમાને 31 ઓગસ્ટે સાંજે 4:27 વાગ્યે અમદાવાદના સરદાર વલ્લભભાઈ પટેલ ઇન્ટરનેશનલ એરપોર્ટ પર લેન્ડિંગ કર્યું હતું. શહેર પોલીસના એક સૂત્રએ જણાવ્યું હતું કે પૂછપરછ દરમિયાન ફર્સ્ટ ઓફિસરના નિવેદનોમાં કેટલીક વિસંગતતાઓ જોવા મળી હતી.જોકે, આ દાવાઓ અંગે સત્તાવાર તપાસના અંતિમ તારણો જાહેર થયા નથી. આ કેસની શરૂઆતમાં તપાસ અમદાવાદ શહેર પોલીસ કરી રહી હતી. હવે તપાસ નેશનલ ઇન્વેસ્ટિગેશન એજન્સીને સોંપવામાં આવી છે.ગૃહ વિભાગના એક અધિકારીએ જણાવ્યું હતું કે, આ કૃત્ય પાછળનો હેતુ શું હતો, જેમાં કોઈ મજાક કે તોફાની કૃત્યની શક્યતા પણ સામેલ છે, તે હજુ સ્પષ્ટ થવાનું બાકી છે.સૂત્રોના જણાવ્યા અનુસાર, કાયદા અમલીકરણ કરતી એજન્સીઓએ હજુ સુધી એરલાઇનને કોઈ નિર્ણાયક માહિતી આપી નથી.