ગીર સોમનાથ જિલ્લામાં સતત ત્રીજા દિવસે બપોર બાદ વાતાવરણમાં અચાનક ભારે પલટો જોવા મળ્યો હતો. આજે ૧ નવેમ્બરે તાલાલા શહેર તેમજ તેના આસપાસના ગ્રામ્ય વિસ્તારોમાં મેઘરાજાએ ધમાકેદાર બેટિંગ કરતા ધોધમાર વરસાદ ખાબક્યો હતો. રાજ્યના કેટલાક વિસ્તારોમાં પહેલેથી જ દુષ્કાળ જેવી સ્થિતિ પ્રવર્તી રહી છે અને ચોમાસાની સત્તાવાર વિદાય પણ થઈ ચૂકી છે, ત્યારે કમોસમી વરસેલો આ વરસાદ અન્નદાતા ખેડૂતો માટે મોટી આફત સમાન સાબિત થઈ રહ્યો છે.

તાલાલા શહેર અને ગ્રામ્ય વિસ્તારોમાં વીજળીના કડાકા સાથે વરસાદ

તાલાલા શહેર સહિત સમગ્ર ગીર પંથકમાં સતત ત્રીજા દિવસે આકાશ કાળા ડિબાંગ વાદળોથી ઘેરાયા બાદ ધોધમાર વરસાદ શરૂ થયો હતો. આ વરસાદ દરમિયાન આકાશમાં વીજળીના ભારે કડાકા-ભડાકા પણ જોવા મળ્યા હતા. તાલાલા તાલુકાના આંકોલવાડી, આંબળાશ, બામણશા, હડમતીયા, માધુપુર, વાડલા, ગુંદરણ અને પીપળવા સહિતના અનેક ગ્રામ્ય વિસ્તારોમાં પણ સારો એવો વરસાદ વરસી રહ્યો છે. અચાનક ત્રાટકેલા આ માવઠાને કારણે ખેતરોમાં તૈયાર થઈને ઊભેલા પાકને નુકસાન પહોંચવાની પૂરી ભીતિ સેવાઈ રહી છે, જેનાથી ખેડૂતોની હાલત અત્યંત કફોડી બની ગઈ છે અને તેઓ પોતાના પાકને બચાવવા માટે ભારે મથામણ કરી રહ્યા છે.

હવામાન વિભાગની આગામી બે દિવસ માટે આગાહી

હવામાન વિભાગ દ્વારા આગામી બે દિવસ દરમિયાન રાજ્યના કેટલાક વિસ્તારોમાં હજુ પણ વરસાદની સંભાવના વ્યક્ત કરવામાં આવી છે. આજરોજ ૧ નવેમ્બરે જૂનાગઢ અને ગીર સોમનાથ ઉપરાંત નવસારી, વલસાડ, ડાંગ તેમજ દમણ અને દાદરા અને નગર હવેલીમાં છૂટાછવાયા સ્થળોએ હળવા વરસાદની આગાહી છે. જ્યારે આવતીકાલે એટલે કે ૨ નવેમ્બરના રોજ પણ નવસારી, ડાંગ, વલસાડ, દમણ અને દાદરા નગર હવેલીમાં છૂટાછવાયા સ્થાનો પર હળવાથી મધ્યમ વરસાદ પડવાની સંભાવના વર્તાવવામાં આવી છે.

દેવભૂમિ દ્વારકા જિલ્લામાં પણ માવઠાથી ખેડૂતોની આશાઓ પર પાણી ફરી વળ્યું

અત્રે ઉલ્લેખનીય છે કે ગત ૩૧ ઓક્ટોબરે દેવભૂમિ દ્વારકા જિલ્લાના વાતાવરણમાં પણ અચાનક પલટો આવ્યો હતો, જેના પગલે કલ્યાણપુર તાલુકાના ભાટિયા, કેનેડી અને કલ્યાણપુર સહિતના ગ્રામ્ય વિસ્તારોમાં તેજ પવન સાથે કમોસમી વરસાદ ખાબક્યો હતો. એક તરફ જિલ્લામાં પહેલેથી જ દુષ્કાળ જેવું સંકટ છે, ત્યારે અચાનક આવેલા આ માવઠાએ જગતના તાતની રહીસહી આશાઓ પર પણ પાણી ફેરવી દીધું છે, જેના કારણે ખેડૂત આલમમાં ભારે ચિંતા વ્યાપી ગઈ છે.