સોમાલિયામાં અલ-કાયદા સાથે જોડાયેલા કુખ્યાત આતંકી સંગઠન 'અલ-શબાબ' ના લડાકુઓએ સુરક્ષાદળો પર ઘાત લગાવીને કરેલા ભીષણ હુમલામાં ઓછામાં ઓછા 20 સૈનિકોના મોત થયા છે. આ હુમલામાં બચી ગયેલા એક વરિષ્ઠ સૈન્ય અધિકારીએ આ અંગેની માહિતી આપી છે. સોમાલિયા સરકાર દ્વારા સૈન્ય વાહનોને નુકસાન પહોંચ્યાની વાત સ્વીકારવામાં આવી છે, પરંતુ સૈનિકોની જાનહાનિ અંગે સત્તાવાર રીતે કોઈ સ્પષ્ટ માહિતી આપવામાં આવી નથી. અલ-શબાબ જૂથે દક્ષિણ સોમાલિયાના જામીકા ગામ પાસે સોમવારે થયેલા આ ઘાતક હુમલાની જવાબદારી સ્વીકારી લીધી છે. ઉલ્લેખનીય છે કે આ આતંકી જૂથ છેલ્લા લગભગ બે દાયકાથી સોમાલિયાની સરકાર સામે સશસ્ત્ર સંઘર્ષ ચલાવી રહ્યું છે.

75 આતંકીઓને ઠાર કરવાનો દાવો
દેશના રક્ષા મંત્રાલયે જણાવ્યું હતું કે કેટલાક કલાકો સુધી ચાલેલી આ ભીષણ લડાઈમાં સૈનિકોએ વળતી કાર્યવાહી કરીને અંદાજે 75 આતંકીઓને મોતને ઘાટ ઉતાર્યા છે અને 56 આતંકીઓને ઈજાગ્રસ્ત કર્યા છે. બીજી બાજુ, અલ-શબાબ સંગઠને દાવો કર્યો છે કે તેણે અથડામણમાં કુલ 321 સૈનિકોને મારી નાખ્યા છે અને કેટલાક સૈનિકોને બંધક બનાવવાની સાથે સૈન્ય ઉપકરણો પણ જપ્ત કર્યા છે. જોકે, જાનહાનિની સંખ્યા અને પકડાયેલા સૈનિકો અંગેના બંને પક્ષોના દાવાઓની સ્વતંત્ર પુષ્ટિ થઈ શકી નથી.

20 સૈનિકોના મૃતદેહ નજરે પડ્યા
સૈન્ય કાફલા સાથે જઈ રહેલા એક અધિકારી અબ્શીર અબ્દીકરીમે મંગળવારે મોડી રાત્રે જણાવ્યું હતું કે હુમલા બાદ તેમણે પોતાના ઓછામાં ઓછા 20 સાથી સૈનિકોના મૃતદેહ નજરે જોયા હતા. તેમણે ઉમેર્યું કે સૈનિકો લીગોથી આગળ વધીને બુરહાકાબા જિલ્લાના જામીકા પહોંચ્યા હતા, જ્યાં તેમની આતંકવાદીઓ સાથે ભારે ગોળીબારની અથડામણ થઈ હતી. અગાઉ લાપતા થયેલા કેટલાક સૈનિકો સુરક્ષિત રીતે બાલેડોગલે પહોંચી ગયા છે, જ્યારે અન્ય કેટલાક સૈનિકોની ભાળ મેળવવાના પ્રયાસો ચાલુ છે.

વિસ્ફોટક ભરેલા વાહનોથી હુમલો
રક્ષા મંત્રાલયના જણાવ્યા અનુસાર, ઉગ્રવાદિઓએ સૈન્યના કાફલાને નિશાન બનાવવા માટે વિસ્ફોટકોથી ભરેલા વાહનોનો ઉપયોગ કર્યો હતો, જેના કારણે સૈન્યના કેટલાક વાહનો ક્ષતિગ્રસ્ત થયા હતા. ઉલ્લેખનીય છે કે આફ્રિકન યુનિયનના સૈન્યોએ વર્ષ 2011માં અલ-શબાબને મોગાદિશુથી હાંકી કાઢ્યા હતા, પરંતુ આ જૂથે ગરિલા યુદ્ધ, આત્મઘાતી હુમલાઓ અને લક્ષિત હત્યાઓ દ્વારા પોતાની આતંકી ગતિવિધિઓ ફરી શરૂ કરી દીધી છે.