ગુજરાત રાજ્યના મુખ્યમંત્રી ભૂપેન્દ્રભાઇ પટેલે ગઇકાલે રાજ્યની આઠેય મુખ્ય મહાનગરપાલિકાના પાંચેય પદાધિકારીઓને ગાંધીનગર બોલાવ્યા હતા અને સીએમઓ ખાતે શુભેચ્છા બેઠક યોજી હતી જેમાં મુખ્યમંત્રીએ મ્યુનિ.પદાધિકારીઓને સંપીને કામ કરો અને ટાંટિયાખેંચ બંધ કરો તેવી ટકોર સાથે તમામને માર્ગદર્શિત કર્યા હતા.

વિશેષમાં તમામ મહાનગરપાલિકાના પદાધિકારીઓને મુખ્યમંત્રીએ જણાવ્યું હતું કે પ્રજાના કામ કરવાની તક મળી છે ત્યારે પાંચ વર્ષ કામ એવા કરો કે તમને લોકો કાયમ યાદ કરે. આંતરિક લડાઇને કારણે પક્ષની પ્રતિષ્ઠાને હાનિ પહોંચે છે. મહાનગરપાલિકા અને રાજ્યમાં એક પક્ષની સરકાર છે તેનો લાભ ઉઠાવો. મ્યુનિ.પદાધિકારીઓ સાથે બેસીને પ્રશ્નો ઉકેલે અને ખોટા વિવાદ કર્યા વિના વિકાસ ઉપર ધ્યાન કેન્દ્રિત કરે તેવી સલાહ આપી હતી. તદઉપરાંત ઉમેર્યું હતું કે આગામી વર્ષને શહેરી વિકાસ વર્ષ જાહેર કર્યું છે અને રૂ.૩૦ હજાર કરોડની માતબર રકમની ભેટ શહેરો માટે ફાળવી છે તો વિકાસકામો ઉપર ધ્યાન આપો, પૈસાના વાંકે કોઇ કામ નહીં અટકે.રાજ્યની તમામ મહાનગરપાલિકાઓ કામ કરે જ છે પણ વધુને વધુ વિકાસકામો થાય તેવો સરકારનો હેતુ છે. શુભેચ્છા મુલાકાત બાદ રાજ્યની તમામ મહાનગરપાલિકાઓ પાસેથી તેમના રાજ્ય સરકારમાં પેન્ડિંગ પશ્નોની યાદી પણ મેળવી હતી અને સરકાર સ્તરે પેન્ડિંગ પ્રશ્નોનો ઝડપથી નિકાલ કરવાની ખાતરી આપી હતી.

ઉપરોક્ત મિટિંગમાં અમદાવાદ, સુરત, વડોદરા, રાજકોટ, જામનગર, ભાવનગર, જુનાગઢ અને ગાંધીનગર સહિતની આઠ મહાનગરપાલિકાના મુખ્ય પાંચ પદાધિકારીઓ ઉપસ્થિત રહ્યા હતા જેમાં રાજકોટ મહાપાલિકામાંથી મેયર નયનાબેન પેઢડિયા, ડેપ્યુટી મેયર નરેન્દ્રસિંહ જાડેજા, સ્ટેન્ડિંગ કમિટીના ચેરમેન જયમીનભાઇ ઠાકર, શાસક પક્ષના નેતા લીલુબેન જાદવ અને શાસક પક્ષના દંડક મનિષભાઇ રાડીયા ગાંધીનગર ગયા હતા.