રાજકોટ શહેર ઉપરાંત અન્યત્ર શહેરો, તાલુકામાં પણ દારૂના જથ્થા ઉતારવા, સપ્લાયમાં પોલીસ ચોપડે ચઢી ચૂકેલા કુખ્યાત ધનાઢય બુટલેગર રાજકોટના અલ્તાફ ઉર્ફે છ આંગળીએ ઘરે જવાનું કહેનાર યુવકના ભાઈ સામે હથિયાર તાંકી ટ્રીગર દબાવી હત્યાનો પ્રયાસ કર્યાના આરોપસર આજીડેમ પોલીસ મથકે ગુનો નોંધાતા બુટલેગરની શોધખોળ હાથ ધરાઈ છે.

આજીડેમ ચોકડી પાસે અનમોલ પાર્ક–૧માં રહેતા ઉન્નત ઉર્ફે સન્ની દિલાવરભાઈ ચૌહાણ ઉ.વ.૨૪ નામના ફાયરબ્રિગેડ કર્મચારી પુત્રએ આજી ડેમ પોલીસ મથકે આમ્ર્સ એકટ, હત્યાના પ્રયાસના આરોપસર અલ્તાફ ઉર્ફે છ આંગળી હનિફ ખેયમ સામે ફરિયાદ નોંધાવી છે. ફરિયાદમાં આરોપ મુજબ અલ્તાફની બીજી પત્ની, બાળકો અનમોલ પાર્કમાં રહે છે. ત્યાં અલ્તાફ આવતો હોય છે. તા.૧૧ના રાત્રીના અલ્તાફ બીજી પત્નીના ઘરે આવ્યો હતો.

એ સમયે રાત્રીના અગ્યારેક વાગ્યે અલ્તાફ કાર લઈને ચોકમાં ઉભો હતો ત્યારે સન્નીના ભાઈ આર્યને અલ્તાફકાકા ઘરમાં જતાં રહો કહી આર્યન ત્યાંથી ચાલ્યો ગયો હતો. સન્ની તેના અન્ય મિત્રો ચોકમાં ઉભા હતા. ત્યાં અલ્તાફ ધસી આવ્યો હતો અને હાથમાં બંદૂક હતી જેથી સન્ની તેની શેરીના દરવાજા પાસે જતો રહ્યો હતો. અલ્તાફ ત્યાં આવ્યો હતો અને લોડેડ બંદૂક સન્ની સામે તાંકી ટ્રીગર દબાવ્યું હતું.

જો કે, બંદૂકમાંથી ફાયર થયું ન હતું. સન્ની ડરીને દોડીને શેરીમાં જતો રહ્યો હતો. જયારે સાથે રહેલા મિત્ર જુબેરે અલ્તાફને પકડી લીધો હતો અને ત્યાંથી લઈ ગયો હતો. સન્ની ડરના કારણે ઘરેથી સગાને ત્યાં ચાલ્યો ગયો હતો. જે તે સમયે પોલીસ કંટ્રોલ રૂમને જાણ કરતા પોલીસ પણ દોડી આવી હતી. ગઈકાલે સન્ની તથા તેના પરિવારના સભ્યો દ્રારા વાતચીત બાદ અલ્તાફ સામે ગુનો નોંધાતા પીઆઈ એલ.એલ.ચાવડા તથા ટીમે અલ્તાફને શોધવા કવાયત આરંભી છે.