રાજકોટ-ભાવનગર હાઈવે પર આવેલી 'ઠાકરધણી હોટલ'માંથી એક અત્યંત ચોંકાવનારા અને કાળજું કંપાવી દે તેવા સમાચાર સામે આવ્યા છે. હોટલના રસોડા (કિચન) વિભાગમાં અચાનક જ એક પ્રચંડ બ્લાસ્ટ થતાં સમગ્ર વિસ્તારમાં ભારે અફરાતફરી અને દોડધામ મચી ગઈ હતી. વિસ્ફોટ એટલો શક્તિશાળી હતો કે તેનો અવાજ દૂર-દૂર સુધી સંભળાયો હતો અને કિચનમાં રાખેલો સામાન વેરવિખેર થઈ ગયો હતો. આ કાળમુખા બ્લાસ્ટની લપેટમાં આવી જતાં ત્યાં કામ કરી રહેલા એક નિર્દોષ પરપ્રાંતીય યુવકનું ઘટનાસ્થળે જ કમકમાટીભર્યું મોત નીપજ્યું છે. આ સમગ્ર ઘટનાના સીસીટીવી સામે આવ્યા છે.

View this post on Instagram

A post shared by Aajkaal (@aajkaaldaily)

આ ભયાનક દુર્ઘટનામાં જીવ ગુમાવનાર કમનસીબ યુવકની ઓળખ અરવિંદસિંગ તરીકે થઈ છે, જે મૂળ રાજસ્થાનનો વતની હતો. વિગતો મુજબ, અરવિંદસિંગના પિતાનું અગાઉ મૃત્યુ થઈ ચૂક્યું હોવાથી તેના માથે આખા પરિવારના ભરણપોષણની મોટી જવાબદારી આવી પડી હતી. પોતાના ગરીબ પરિવારનું ગુજરાન ચલાવવા અને આર્થિક મદદરૂપ થવાના હેતુથી તે પોતાનું વતન છોડીને સાત મહિના પહેલા જ રાજકોટ ખાતે નોકરી અર્થે આવ્યો હતો. તે ઠાકરધણી હોટલના કિચનમાં પ્રામાણિકતાથી કામ કરતો હતો, પરંતુ વિધાતાએ તેના નસીબમાં કંઈક જુદું જ લખ્યું હતું.

વિસ્ફોટની કાળઝાળ ઘટનાના CCTV ફૂટેજ આવ્યા સામે

આ સમગ્ર રુંવાડા ઊભા કરી દેનારી ઘટના હોટલ પરિસરમાં લાગેલા સીસીટીવી (CCTV) કેમેરામાં કેદ થઈ ગઈ છે. બ્લાસ્ટ થતાં જ કેવી ભયાનક સ્થિતિ સર્જાઈ હતી તેના દ્રશ્યો CCTV ફૂટેજમાં સ્પષ્ટપણે જોઈ શકાય છે. આ ઘટનાની જાણ થતાં જ સ્થાનીક પોલીસ અને ઉચ્ચ અધિકારીઓનો કાફલો તપાસ અર્થે ઘટનાસ્થળે દોડી આવ્યો હતો. પ્રાથમિક દ્રષ્ટિએ આ બ્લાસ્ટ ગેસ સિલિન્ડર અથવા કિચનના અન્ય કોઈ સાધનના કારણે થયો હોવાની શંકા સેવાઈ રહી છે, જે અંગે પોલીસ હાલ ઝીણવટભરી તપાસ ચલાવી રહી છે.

આશાસ્પદ યુવકના મોતે પરિવારનો સહારો છીનવ્યો, ઘરમાં આક્રંદ

માત્ર ૨૦-૨૫ વર્ષની નાની ઉંમરે ઘરની આર્થિક જવાબદારી ઉપાડીને કમાવા નીકળેલા આશાસ્પદ પુત્રના મોતના સમાચાર રાજસ્થાનમાં રહેતા તેના પરિવારને મળતા જ ત્યાં કરુણ કલ્પાંત મચી ગયો છે. પિતાની છત્રછાયા ગુમાવ્યા બાદ પરિવાર જે એકમાત્ર દીકરાના ભરોસે જીવી રહ્યો હતો, તે સહારો પણ કુદરતે આંચકી લેતા પરિવારજનો પર આભ તૂટી પડ્યું છે. હાલમાં પોલીસ દ્વારા મૃતકની લાશને પોસ્ટમોર્ટમ અર્થે હોસ્પિટલ ખસેડવામાં આવી છે અને કાયદેસરની તપાસનો ધમધમાટ તેજ કરવામાં આવ્યો છે.