અમુક શખ્સોએ પુલની ટોચ ઉપર પહોંચી વિડીયો બનાવ્યો

ઓખા અને બેટ દ્વારકા વચ્ચે સમુદ્રમાં નિર્માણ થયેલ સુદર્શન સેતુનાં વડાપ્રધાન નરેન્દ્ર મોદીનાં હસ્તે લોકાપર્ણ પછી પુલની ટોચ ઉપર પહોંચી અમુક યુવાનોએ વિડીયો બનાવી સોશ્યલ મિડીયામાં વાયરલ કરતા સુરક્ષા સંબંધિત સવાલો ઉભા થયા છે. આ લોકો કેવી રીતે અને કોની મંજૂરીથી ઉપર પહોંચ્યા? શું જનતાને પણ પુલની ટોચ ઉપર જવાની છૂટ આપવામાં આવશે? વિડીયોમાં નજરે પડતા લોકો ફક્ત મોજ મજા ખાતર ઉપર પહોંચ્યા હોય એવું દેખાઇ આવે છે ત્યારે આ વિડીયોએ શું તંત્રની પોલ ખોલી નાંખી છે?
કારણકે લોકાર્પણ પહેલા પણ બે વખણ બ્રીજનાં ખાનગી ઉપયોગનાં વિડીયો વાયરલ થયા હતા ત્યારે વધુ એક વિડીયોએ તંત્રને ફરી એક વખત સવાલોનાં ઘેરામાં લાવી દિધું છે.
સોશ્યલ મિડીયામાં વાયરલ થયા પછી આ વિડીયો ઇલેક્ટ્રોનિક મિડીયામાં પણ ચમકતા સત્તાધીશો સુધી પણ ચોક્ક્સ પહોંચ્યો હશે ત્યારે હવે  આ પ્રકરણમાં કોઈ કાર્યવાહી થાય છે કે કેમ? એ જોવાનું રહ્યું. આ પૂર્વે બ્રીજનાં ખાનગી ઉપયોગનાં વાયરલ વિડીયો પછી કોઇ કાર્યવાહી થઇ ન હતી પરંતુ આ પ્રકરણમાં તો મોટા અકસ્માતની સંભાવના જોતા પગલા લેવાવા જ જોઇએ. ટોચ પર પહોચેલા લોકોએ એન્જીનીંયરો માફક કોઇ સુરક્ષાત્મક સાધનોનો ઉપયોગ કર્યો ન હતો જે જોખમી સાબિત થઇ શકે.
સુદર્શન સેતુનાં વાયરલ થતા વિડીયોઝ પછી તંત્રની નિષ્ક્રિયતાને બેદરકારી સાબિત કરી રહ્યા છે ત્યારે હવે આ પ્રકરણમાં  તંત્ર જાગશે?