ઓસ્ટ્રેલિયાએ મેલબોર્નમાં રમાયેલી ચોથી ટેસ્ટ મેચ જીતી લીધી છે. બોક્સિંગ ડે ટેસ્ટમાં કાંગારુઓએ 184 રનથી જીત મેળવી હતી. આ સાથે ઓસ્ટ્રેલિયાએ પાંચ મેચની ટેસ્ટ શ્રેણીમાં 2-1ની સરસાઈ મેળવી લીધી છે. હવે ભારત માટે WTC ફાઇનલમાં પહોંચવું મુશ્કેલ બની ગયું છે. આ ટેસ્ટના પાંચમા દિવસે ભારતને 340 રનનો ટાર્ગેટ મળ્યો હતો. જવાબમાં ટીમ ઈન્ડિયા 155 રનમાં ઓલઆઉટ થઈ ગઈ હતી. ભારત તરફથી બીજા દાવમાં યશસ્વી જયસ્વાલે સૌથી વધુ 84 રન બનાવ્યા હતા. જ્યારે ઓસ્ટ્રેલિયા તરફથી પેટ કમિન્સ અને સ્કોટ બોલેન્ડે ત્રણ-ત્રણ વિકેટ લીધી હતી. નાથન લિયોનને પણ બે સફળતા મળી હતી.

ભારતને ચોથી ઇનિંગમાં 340 રનનો વિશાળ ટાર્ગેટ મળ્યો હતો
ઓસ્ટ્રેલિયાએ પ્રથમ દાવમાં 474 રન બનાવ્યા હતા જેના જવાબમાં ભારતે પ્રથમ દાવમાં 369 રન બનાવ્યા હતા. નીતીશ રેડ્ડીની સદીની મદદથી ભારત ફોલોઓન બચાવવામાં સફળ રહ્યું હતું. જ્યારે બીજી ઇનિંગનો સમય આવ્યો ત્યારે કાંગારુ ટીમે 234 રન બનાવ્યા હતા, જેના કારણે ભારતને ચોથી ઇનિંગમાં 340 રનનો વિશાળ ટાર્ગેટ મળ્યો હતો.

યશસ્વી જયસ્વાલની મહેનત વ્યર્થ ગઈ
ભારત તરફથી યશસ્વી જયસ્વાલે બંને દાવમાં અડધી-અડધી સદી ફટકારી હતી. પ્રથમ દાવમાં 86 રનના સ્કોર પર રનઆઉટ થયો હતો. બીજી ઇનિંગમાં તેણે એકલાએ 208 બોલ રમ્યા, જેમાં તેણે 84 રન બનાવ્યા. તેની વિકેટ પણ વિવાદાસ્પદ રહી. કારણ કે એક તરફ સ્નિકોમીટરમાં કોઈ સ્પાઈક દેખાતું ન હતું, બીજી તરફ જ્યારે બોલ જયસ્વાલના બેટ અને ગ્લોવની નજીકથી પસાર થયો ત્યારે તેણે દિશા સહેજ બદલી. તેના આધારે થર્ડ અમ્પાયરે જયસ્વાલને આઉટ કર્યો હતો. જયસ્વાલના આઉટ થયાના 15 રનની અંદર જ અન્ય ભારતીય બેટ્સમેનો પણ આઉટ થઈ ગયા હતા.