દેશના ચાર રાજ્યોમાં યોજાયેલી પાંચ વિધાનસભા બેઠકો અને એક લોકસભા બેઠક માટે યોજાયેલી પેટાચૂંટણીના પરિણામો આજે જાહેર કરવામાં આવશે. બધી બેઠકો માટે મતગણતરી સવારે 8 વાગ્યાથી શરૂ થઈ ગઈ છે. 6 ઓક્ટોબરે આ છ બેઠકો પર મતદાન થયું હતું. પશ્ચિમ બંગાળમાં નંદીગ્રામ અને રેજીનગર વિધાનસભા બેઠકો, તમિલનાડુમાં મદુરંતકમ અને ધારાપુરમ વિધાનસભા બેઠકો, આસામમાં નાગાંવ લોકસભા બેઠક અને પુડુચેરીમાં થટ્ટનચાવાડી વિધાનસભા બેઠક પર બધાની નજર છે, કારણ કે આ રાજ્યોમાં બદલાતા રાજકીય સમીકરણો વચ્ચે, આ પરિણામો મહત્વપૂર્ણ છે. આ ચૂંટણીમાં પશ્ચિમ બંગાળના મુખ્યમંત્રી સુવેન્દુ અધિકારી અને તમિલનાડુના મુખ્યમંત્રી થલપતિ વિજયની રાજકીય પ્રતિષ્ઠા પણ દાવ પર છે.

પશ્ચિમ બંગાળની નંદીગ્રામ અને રેજીનગર બેઠકો પર સૌની નજર છે. ભાજપે 2026ની વિધાનસભા ચૂંટણીમાં સત્તા મેળવ્યા બાદ આ પેટાચૂંટણીઓ નવી સરકાર માટે જનસમર્થન માપવાની કસોટી બની છે. મુખ્યમંત્રી સુવેન્દુ અધિકારીએ નંદીગ્રામ બેઠક ખાલી કરી હોવાથી અહીં ભાજપે હસીરાની રથને ઉમેદવાર બનાવ્યાં છે. રેજીનગરમાં ભાજપ, કોંગ્રેસ, તૃણમૂલ કોંગ્રેસના જુદા જૂથો અને અન્ય પક્ષો વચ્ચે બહુકોણીય મુકાબલો છે. બંને બેઠકો પર આશરે 80 ટકા મતદાન નોંધાયું હતું.

તમિલનાડુની મદુરાન્થકમ અને ધારાપુરમ બેઠકો પર મુખ્યમંત્રી સી. જોસેફ વિજયની પાર્ટી તમિલગા વેત્રી કઝગમ (ટીવીકે) માટે આ ચૂંટણી મહત્ત્વપૂર્ણ છે. બંને બેઠકોના ધારાસભ્યો અગાઉ એઆઈએડીએમકેમાંથી ટીવીકેમાં જોડાયા બાદ ફરી ચૂંટણી યોજાઈ છે. આથી મતદારો પક્ષપલટો કરનારા ઉમેદવારોને ફરી સ્વીકારે છે કે નહીં તે સ્પષ્ટ થશે.

પ્રારંભિક વલણો મુજબ મદુરાન્થકમમાં ટીવીકે આગળ હતી, જ્યારે ધારાપુરમમાં એઆઈએડીએમકે અને ટીવીકે વચ્ચે નજીકની ટક્કર જોવા મળી હતી. આસામની નગાંવ લોકસભા બેઠક પર ભાજપના દેવાશિષ શર્મા, કોંગ્રેસનાં શિબામણિ બોરા અને એઆઈયુડીએફના બદરૂદ્દીન અજમલ વચ્ચે મુખ્ય સ્પર્ધા છે. આ ચૂંટણી કોંગ્રેસના પરંપરાગત મતાધાર અને એઆઈયુડીએફના રાજકીય પ્રભાવની પણ કસોટી છે.

પુડુચેરીની થટ્ટાંચાવડી વિધાનસભા બેઠક પર મુખ્યમંત્રી એન. રંગાસામીની આગેવાની હેઠળની સરકાર માટે આ પ્રથમ મહત્ત્વપૂર્ણ રાજકીય પરીક્ષા છે. અહીં એઆઈએનઆરસીની આગેવાનીવાળા એનડીએ, કોંગ્રેસ અને ડીએમકે વચ્ચે મુકાબલો છે.

ધારાપુરમમાં બાજી પલટાઈ: થલપતિ વિજયની ટીવીકેને લીડ

તમિલનાડુની ધારાપુરમમાં બાજી પલટાઈ ગઈ છે. દિવસની શરૂઆતમાં આગળ રહેલા એઆઈએડીએમકેના ઉમેદવાર ભાનુમતી હવે પાછળ રહી ગયા છે, જ્યારે ટીવીકેના ઉમેદવાર સત્યભામા પી.એ સરસાઈ મેળવી લીધી છે. સત્યભામાએ અત્યાર સુધીમાં ૧૩,૨૧૩ મત મેળવ્યા છે અને તેઓ ભાનુમતી કરતાં ૭૨૪ મતથી આગળ છે. ડીએમકે ત્રીજા સ્થાને છે; સ્ટાલિનના ઉમેદવાર સુગન્યા એસ.ને માત્ર ૧૧,૫૫૪ મત મળ્યા છે.

બંગાળની રેજીનગર બેઠક પર બીજેપી આગળ

બંગાળની રેજીનગર વિધાનસભા બેઠક પર બીજેપીના ઉમેદવાર સખારવ સરકાર ૧૧,૦૩૩ મતથી આગળ છે. સખારવ સરકાર કોંગ્રેસના ઉમેદવાર મોહમ્મદ અબ્દુલ્લાહિલ કાફી કરતાં આગળ છે. નવીનતમ માહિતી મુજબ, સરકાર લગભગ ૬,૦૦૦ મતની સરસાઈ ધરાવે છે. રેજીનગરના વલણો ખાસ કરીને રસપ્રદ છે કારણ કે તે લઘુમતી-પ્રભુત્વ ધરાવતો મતવિસ્તાર છે, જ્યાં ૬૫ ટકાથી વધુ મતદારો મુસ્લિમ સમુદાયના છે.

પુડુચેરી બેઠક પર ઓલ ઈન્ડિયા એનઆર કોંગ્રેસ પાર્ટીને લીડ

પુડુચેરીની થટ્ટાનચાવડી વિધાનસભા બેઠક પર અશોક આનંદ જેઓ એન. રંગાસામીની પાર્ટી 'ઓલ ઈન્ડિયા એનઆર કોંગ્રેસ'ના ઉમેદવાર આગળ ચાલી રહ્યા છે. એન. રંગાસામી પુડુચેરીના વર્તમાન મુખ્યમંત્રી છે. કોંગ્રેસના ઉમેદવાર ઈ. વિનયગમ બીજા સ્થાને છે, જ્યારે ડીએમકેના ઉમેદવાર કે. સેથુ-સેલ્વમ ત્રીજા સ્થાને છે. અશોક આનંદે અત્યાર સુધીમાં ૬,૯૫૦ મત મેળવ્યા છે, જ્યારે કોંગ્રેસના ઉમેદવારને માત્ર ૨,૩૯૨ મત મળ્યા છે. ડીએમકેના ઉમેદવારે અત્યાર સુધીમાં ૧,૫૩૫ મત મેળવ્યા છે.

તમિલનાડુની મદુરંતકમ બેઠક પર ટીવીકે આગળ

તમિલનાડુની મધુરાન્થકમ વિધાનસભા બેઠક પર ટીવીકેના ઉમેદવાર મરગતમ કુમારવેલ આગળ છે. ડીએમકેના ઉમેદવાર આઈ. પરન્થમેન બીજા ક્રમે છે. એઆઈએડીએમકે ત્રીજા સ્થાને છે; પલાનીસ્વામીની પાર્ટીના ઉમેદવાર એસ. કનિથાસંપથ ૧,૪૯૩ મતોથી પાછળ ચાલી રહ્યા છે. ટીવીકેના ઉમેદવારને અત્યાર સુધીમાં ૩,૫૭૧ મત મળ્યા છે અને તેઓ ૯૬૦ મતોની સરસાઈ ધરાવે છે.