દેશભરમાં આવેલી સરકારી બેંકો અને ક્ષેત્રીય ગ્રામીણ બેંકોના કર્મચારીઓ 28 થી 30 સપ્ટેમ્બર સુધી 3 દિવસની હડતાલ પર જઈ રહ્યા છે. આ હડતાલના કારણે બેંક શાખાઓમાં જઈને કરાવવાના થતાં ભૌતિક અને મેન્યુઅલ કામકાજ પર મોટી અસર પડવાની શક્યતા છે. જોકે, હડતાલના આ દિવસો દરમિયાન પણ ડિજિટલ બેંકિંગ, યુપીઆઈ (UPI), મોબાઈલ બેંકિંગ અને નેટ બેંકિંગ સેવાઓ પૂર્વવત ચાલુ રહેશે.

30 સપ્ટેમ્બરે અર્ધવાર્ષિક નાણાકીય ક્લોઝિંગ (Half-Yearly Closing) હોવાથી આ હડતાલ ખૂબ જ નિર્ણાયક સમયે આવી રહી છે. ગ્રાહકોને પડનારી અગવડતા ઘટાડવા માટે સરકાર અને ભારતીય રિઝર્વ બેંક (RBI) ની મંજૂરીથી રવિવાર, 27 સપ્ટેમ્બરે તમામ જાહેર ક્ષેત્રની બેંકો અને કરન્સી ચેસ્ટ સામાન્ય દિવસોની જેમ ખુલ્લા રાખવામાં આવ્યા હતા, જેથી લોકો પોતાના જરૂરી કામકાજ પૂર્ણ કરી શકે.

હડતાલ દરમિયાન બેંક શાખાઓમાં રોકડ જમા કરાવવી કે ઉપાડવી, પાસબુક અપડેટ કરાવવી અને નવા ડિમાન્ડ ડ્રાફ્ટ (DD) કઢાવવા જેવી સેવાઓ સંપૂર્ણપણે ઠપ રહેશે. આ ઉપરાંત રૂબરૂ કેવાયસી (KYC) અપડેશન, ખાતાની માહિતી બદલવી, લોન એપ્લિકેશન અને વેરિફિકેશન તેમજ બેંક લોકર એક્સેસ કરવા જેવી કામગીરી માટે શાખાઓ ખુલવાની રાહ જોવી પડશે. ચેક ક્લિયરન્સની પ્રક્રિયામાં પણ મેન્યુઅલ કામગીરીના અભાવે વિલંબ થઈ શકે છે.

​​​​​​​બીજી તરફ, ગ્રાહકોના રોજિંદા નાણાકીય વ્યવહારો અટકે નહીં તે માટે એટીએમ (ATM), યુપીઆઈ પેમેન્ટ, નેટ બેંકિંગ અને મોબાઈલ એપ ચાલુ રહેશે. જોકે, એટીએમમાં કેશ ભરાવાની સ્થિતિ સ્થાનિક સ્તરે ઉપલબ્ધતા પર આધારિત રહેશે. સરકારી બેંકોની સરખામણીએ ખાનગી ક્ષેત્રની બેંકોમાં કામકાજ પર ઓછી અસર જોવા મળશે. નાણાકીય લેવડ-દેવડ માટે ગ્રાહકોને આ દિવસો દરમિયાન ડિજિટલ માધ્યમોનો ઉપયોગ કરવા અને બ્રાન્ચની મુલાકાત લેતા પહેલા સત્તાવાર માહિતી મેળવી લેવા અપીલ કરવામાં આવી છે.