દેશભરની સરકારી બેંકોમાં આગામી સપ્તાહે સોમવારથી બુધવાર સુધી (28, 29 અને 30 સપ્ટેમ્બર) 3 દિવસની હડતાલનું આહ્વાન કરવામાં આવ્યું છે. આ સમયગાળા દરમિયાન બેંકોની શાખા સ્તરની સેવાઓ પ્રભાવિત થશે, પરંતુ ડિજિટલ બેંકિંગ ચાલુ રહેશે. બેંક શાખાઓ બંધ હોવાને કારણે ગ્રાહકો યુપીઆઈ, નેટ બેંકિંગ અને મોબાઈલ એપનો વધુ ઉપયોગ કરશે, જેને પગલે સાયબર ફ્રોડ અને ઓનલાઈન છેતરપિંડીનો ખતરો વધી ગયો છે. આ ચિંતાને ધ્યાનમાં રાખીને ઇન્ડિયન બેંક્સ એસોસિએશન (IBA) એ તમામ બેંકો માટે વિશેષ માર્ગદર્શિકા જારી કરી છે.

IBA એ 23 સપ્ટેમ્બરના રોજ લખેલા પત્રમાં સ્પષ્ટ કર્યું છે કે બેંકિંગ સિસ્ટમની સુરક્ષા માટે 17 અતિ સંવેદનશીલ સેવાઓમાં તૈનાત અધિકારીઓ અને કર્મચારીઓ હડતાલમાં સામેલ થશે નહીં. આ સેવાઓમાં સાયબર સિક્યુરિટી ઓપરેશન્સ સેન્ટર (જે 24 કલાક ખતરા પર નજર રાખશે), ડેટા સેન્ટર, પેમેન્ટ અને સેટલમેન્ટ હબ (RTGS, NEFT, IMPS, UPI), એટીએમ ઓપરેશન્સ અને ફ્રોડ રિસ્ક મેનેજમેન્ટ સેલનો સમાવેશ થાય છે. આ વ્યવસ્થા એટલા માટે જરૂરી બનાવવામાં આવી છે જેથી ગ્રાહકોને ડિજિટલ ટ્રાન્ઝેક્શનમાં કોઈ અગવડ ન પડે અને સાયબર અલ્ગોરિધમ સતત સક્રિય રહે.

બીજી તરફ, બેંક યુનિયનોના સંગઠન યુનાઈટેડ ફોરમ ઓફ બેંક યુનિયન્સ (UFBU) દ્વારા આ હડતાલનું આહ્વાન કરવામાં આવ્યું છે. તેમની મુખ્ય માંગણીઓમાં માર્ચ 2024 ના કરાર મુજબ સપ્તાહમાં 5 દિવસનું કામકાજ લાગુ કરવું (તમામ શનિવારે રજા), પેન્શન અપડેશન, સરખા મોંઘવારી ભથ્થાનું ફોર્મ્યુલા અને NPS માંથી જૂની પેન્શન યોજનામાં જવાનો વિકલ્પ આપવો શામેલ છે.

​​​​​​​ડિજિટલ બેંકિંગ કરતી વખતે સાયબર છેતરપિંડીથી બચવા માટે ગ્રાહકોએ વિશેષ સાવચેતી રાખવી જરૂરી છે. ગ્રાહકોએ પોતાનો OTP, PIN, CVV કે પાસવર્ડ કોઈની સાથે શેર કરવો નહીં. કોઈ પણ અજાણી લિંક પર ક્લિક કરવાથી બચવું અને બેંકિંગ માટે હંમેશા ઓફિશિયલ એપનો જ ઉપયોગ કરવો. ડિજિટલ એરેસ્ટ કે ખાતું ફ્રીઝ થવાના ફેક કોલથી ગભરાયા વગર તરત જ ફોન કાપી નાખવો અને પબ્લિક વાઈ-ફાઈ પર નાણાકીય વ્યવહારો ન કરવા. જો કોઈ છેતરપિંડી થાય તો તાત્કાલિક નેશનલ સાયબર ક્રાઈમ હેલ્પલાઈન નંબર 1930 પર સંપર્ક કરવો.