BREAKING NEWS

2027ના અંત સુધી સેન્સેક્સ 95,000 પોઈન્ટની સપાટીને વટાવી જશે: મોર્ગન સ્ટેનલીનો અંદાજ

  • November 17, 2026 04:02 PM 
Aajkaal Daily (Desh Pardesh Ni Aajkaal)


ભારતીય શેરબજારને લઈને વૈશ્વિક બ્રોકરેજ કંપની મોર્ગન સ્ટેનલીએ આશાવાદી આગાહી કરી છે. કંપનીના અંદાજ મુજબ વર્ષ 2027ના અંત સુધીમાં બોમ્બે સ્ટોક એક્સચેન્જ (BSE)નો મુખ્ય સૂચકાંક સેન્સેક્સ 95,000ની સપાટીએ પહોંચી શકે છે. આ સાથે જ શેરબજારમાં થતી વધઘટ અને ઘટાડાને કારણે રોકાણકારોને થઈ રહેલા નુકસાનને ઓછું કરવા માટે નીતિગત પગલાં લેવાની પણ કંપનીએ ભલામણ કરી છે.


મોર્ગન સ્ટેનલીના મતે મોંઘવારીને બાદ કરતાં ભારતીય અર્થતંત્રમાં ખાસ કોઈ નબળાઈ જોવા મળતી નથી. દેશમાં અંદાજે 13 કરોડ લોકો શેરબજારમાં રોકાણ કરે છે. આવી સ્થિતિમાં નીતિ ઘડનારાઓએ બજારની વર્તમાન સ્થિતિને ધ્યાનમાં રાખીને જરૂરી પગલાં ભરવાની જરૂર છે.


અમેરિકન બ્રોકરેજ કંપનીએ પોતાના અહેવાલમાં જણાવ્યું છે કે શેરના ભાવ દેશના અર્થતંત્રની સ્થિતિ દર્શાવે છે. તેથી શેરબજારમાં લાંબા સમય સુધી ઘટાડો રહે તો તેની અસર અર્થતંત્રની ગતિ પર પણ પડી શકે છે. જોકે, કંપનીના મતે ભારતમાં કેટલાક એવા લાંબા ગાળાના સુધારા થઈ રહ્યા છે, જે આગામી ત્રિમાસિક ગાળામાં આર્થિક વિકાસને વેગ આપી શકે છે.


નીતિ ઘડનારાઓ શેરબજારને રાહત મળે તે માટે સીધા નીતિગત પગલાં પણ લઈ શકે છે. ભારતનું અર્થતંત્ર ટકાઉ અને વિવિધ ક્ષેત્રોમાં ફેલાયેલું હોવાથી લાંબા ગાળે તેનો ફાયદો મળી શકે છે. ખાસ કરીને આર્ટિફિશિયલ ઇન્ટેલિજન્સની અસર ઓછી થાય અથવા ભૌગોલિક રાજકીય તણાવમાં ઘટાડો આવે તો ભારતીય બજારને તેનો લાભ મળી શકે છે.


સપ્તાહના પ્રથમ ટ્રેડિંગ દિવસે સોમવારે ભારતીય શેરબજાર તેજી સાથે બંધ થયું હતું. બીએસઈ સેન્સેક્સ 512.34 પોઇન્ટ એટલે કે 0.63 ટકાના ઉછાળા સાથે 82,104.79ના સ્તરે બંધ રહ્યો હતો. સેન્સેક્સની 30 કંપનીઓમાંથી 19 કંપનીઓના શેર વધારા સાથે બંધ થયા હતા.


આઈટીસીના શેરમાં સૌથી વધુ 3.78 ટકાનો ઉછાળો નોંધાયો હતો. જોકે, ટાટા સ્ટીલ અને મારુતિ સુઝુકી જેવી મોટી કંપનીઓના શેરમાં ઘટાડો જોવા મળ્યો હતો.


ઓક્ટોબરના અંતિમ દિવસોથી ભારતીય શેરબજારમાં તેજીનો દોર શરૂ થયો હતો, જેણે નવેમ્બર મહિનામાં વધુ ગતિ પકડી હતી. 28 ઓક્ટોબરના રોજ સેન્સેક્સ 73,246.03ના સ્તરે બંધ થયો હતો. ત્યારબાદ 16 નવેમ્બર સુધીમાં તેમાં લગભગ 9,000 પોઇન્ટનો વધારો નોંધાયો હતો અને તે 82,104.79ના સ્તરે પહોંચી ગયો હતો. હવે મોર્ગન સ્ટેનલીની 95,000ની આગાહીએ આગામી સમયમાં ભારતીય શેરબજારની સંભાવનાઓ અંગે રોકાણકારોમાં આશા જગાવી છે.



લાઈક અને ફોલો કરો અમારું ફેસબુક પેજ FACEBOOK - AAJKAALDAILY


ફોલો કરો અમારું ઇન્સ્ટાગ્રામ INSTAGRAM - AAJKAALDAILY


સબસ્ક્રાઈબ કરો અમારી યૂ ટ્યૂબ ચેનલ YOUTUBE - AAJKAALDAILY


મહત્વના સમાચારો આપના મોબાઇલમા મેળવવા માટે જોડાઓ અમારા વોટ્સએપ ગ્રૂપમાં  99251 12230  

View News On Application