સીબીઆઈના જણાવ્યા અનુસાર, પુણેનો કેમિસ્ટ્રી લેક્ચરર પી.વી. કુલકર્ણી આ પેપર લીકનો મુખ્ય સ્ત્રોત હતો. કુલકર્ણી નેશનલ ટેસ્ટિંગ એજન્સી (NTA) ની પરીક્ષા પ્રક્રિયા સાથે જોડાયેલો હતો, જેના કારણે તેને પ્રશ્નપત્રો સુધી પહોંચવાની તક મળી હતી.

ઘરને જ બનાવી દીધું હતું કોચિંગ સેન્ટર
તપાસમાં બહાર આવ્યું છે કે કુલકર્ણીએ એપ્રિલ 2026 ના છેલ્લા અઠવાડિયામાં અન્ય આરોપી મનીષા વાઘમરેની મદદથી કેટલાક વિદ્યાર્થીઓને એકઠા કર્યા હતા. કુલકર્ણીએ પુણેમાં પોતાના ઘરે વિદ્યાર્થીઓ માટે સ્પેશિયલ ક્લાસ ચલાવ્યા હતા. અહીં તેણે વિદ્યાર્થીઓને પ્રશ્નો, તેના વિકલ્પો અને સાચા જવાબો લખાવ્યા હતા. તપાસમાં જાણવા મળ્યું છે કે કુલકર્ણીએ જે પ્રશ્નો લખાવ્યા હતા તે 3 મે 2026 ના રોજ લેવાયેલી NEET-UG પરીક્ષાના અસલી પેપર સાથે સંપૂર્ણપણે મળતા આવતા હતા.

સીબીઆઈના દરોડા અને જપ્તી
પી.વી. કુલકર્ણી મૂળ મહારાષ્ટ્રના લાતૂરનો રહેવાસી છે. સીબીઆઈએ છેલ્લા 24 કલાકમાં દેશભરમાં અનેક સ્થળોએ દરોડા પાડ્યા છે. દરોડા દરમિયાન અનેક મહત્વના દસ્તાવેજો, ઇલેક્ટ્રોનિક ગેજેટ્સ અને મોબાઈલ ફોન જપ્ત કરવામાં આવ્યા છે, જેની હવે ફોરેન્સિક તપાસ કરવામાં આવશે. શિક્ષણ મંત્રાલયની ફરિયાદના આધારે સીબીઆઈએ 12 મે 2026 ના રોજ આ કેસ નોંધ્યો હતો.

અત્યાર સુધીમાં 8 આરોપીઓની ધરપકડ
સીબીઆઈએ આ કેસમાં અત્યાર સુધીમાં જયપુર, ગુરુગ્રામ, નાસિક, પુણે અને અહિલ્યાનગરથી કુલ 8 આરોપીઓની ધરપકડ કરી છે. ઝડપાયેલા આરોપીઓમાંથી 5 ને કોર્ટે 7 દિવસના પોલીસ રિમાન્ડ પર મોકલ્યા છે, જ્યારે અન્યને દિલ્હી લાવવામાં આવી રહ્યા છે. સીબીઆઈના મતે આ સ્પેશિયલ ક્લાસમાં સામેલ થવા માટે વિદ્યાર્થીઓ અને વાલીઓ પાસેથી લાખો રૂપિયા વસૂલવામાં આવ્યા હતા. સીબીઆઈએ ખાતરી આપી છે કે આ કૌભાંડમાં સામેલ દરેક મધ્યસ્થી અને મુખ્ય સ્ત્રોત સુધી પહોંચવા માટે તપાસ પ્રોફેશનલ અને નિષ્પક્ષ રીતે ચાલુ રહેશે.