સુરતમાં બાળમજૂરી કરાવવાનો પર્દાફાશ થયો છે. શહેરમાં પુનાની બિલનાથ સોસાયટીમાં સાડીના કારખાનામાં 5 સગીરોને ગોંધી રાખી તેમની પાસે કાળી મજૂરી કરાવવામાં આવતી હતી. આ 5 સગીરોની ઉંમર 7 વર્ષથી 17 વર્ષ સુધીની હતી. આ સગીરોને રાજસ્થાનના ઉદયપુરના અંતરિયાળ ગામેથી લાવવામાં આવ્યા હતા. તેમની પાસે સવારે 5 વાગ્યાથી રાતના 10 વાગ્યા સુધી એટલે કે, 17 કલાક સુધી કાળી મજૂરી કરાવાતી હતી. 

બે સગીર ભાગીને પોલીસ સ્ટેશન પહોંચ્યા

આ પાંચ પૈકી બે સગીરો મોડીરાતે કોઈક રીતે ભાગીને ગોડાદરા પોલીસ સ્ટેશન પહોંચી ગયા હતા અને પોલીસ સામે આ કૌભાંડનો પર્દાફાશ કર્યો હતો. પોલીસે કારખાનામાં પહોંચી પાંચેય સગીરોને મુક્ત કરાવ્યા હતા. છેલ્લા અનેક મહિનાઓથી બાળકો પાસે કારખાનામાં મજૂરી કરાવાઈ રહી હતી. બાળકોને દરરોજ 17 કલાક કામ કરવું પડતું હતું અને 200 રૂપિયા મહેનતાણું આપવામાં આવતું હતું.

કારખાનુ ચલાવનારાની પોલીસે ધરપકડ કરી 

બાળકોને ચોક્કસ સરનામું ધ્યાનમાં ન હતું જે બાદ બાળકોએ જેમ જેમ આંગળી ચીંધી તેમ તેમ પોલીસે આગળ પગલાં ભર્યા હતા. પોલીસે કારખાનામાં પહોંચીને 7 વર્ષના બાળકને અને 17-17 વર્ષના અન્ય બે બાળકોને પણ મજૂરીથી મુક્ત કર્યા હતા. જો કે, આ મામલે કારખાનુ ચલાવનારાની પોલીસે ધરપકડ કરી છે.