ગોંડલના મોવીયામાં બેંક કબજાવાળી મિલકતમાં ગેરકાયદે પ્રવેશ કરનાર શખસ સામે રાજકોટના બંધન બેંકના એરિયા મેનેજર દ્વારા ગોંડલ તાલુકા પોલીસ મથકમાં ફરિયાદ નોંધાવવામાં આવી છે.જે ફરિયાદના આધારે પોલીસે મોવીયા ગામે રહેતા શખસ સામે ગુનો નોંધી કાયદેસરની કાર્યવાહી કરી હતી.

જાણવા મળતી વિગતો મુજબ, રાજકોટમાં રેલનગર પાસે ભારત પેટ્રોલ પંપ રોડ પર દેવતીર્થ-૧ માં રહેતા અને રાજકોટમાં માલવીયા ચોક પાસે આવેલી બંધન બેંકમાં એરિયા મેનેજર તરીકે એક વર્ષથી નોકરી કરનાર નિલેશભાઇ પ્રવિણચંદ્ર વ્યાસ(ઉ.વ ૪૨) દ્વારા ગોંડલ તાલુકા પોલીસ મથકમાં નોંધાવેલી ફરિયાદમાં આરોપી તરીકે ગોંડલના મોવીયા ગામે રહેતા નટુભાઇ જીવાભાઇ ભલાળાનું નામ આપ્યું હતું.

ફરિયાદમાં જણાવ્યું હતું કે, તેમની બંધન બેંકે મોવીયામાં રેવન્યુ સર્વે નં.૧૭ થી ૨૫ માં મળી કુલ પ્લોટ ૯ બેંકમા સિકયુરીટી પેટે રજુ કરી રૂ. ૪૭ લાખન લોન લીધી હતી.જયારે પ્લોટ નં. ૭ અને ૮ બેંકમાં રજુ કરી રૂ.૨૩ લાખની લોન લીધી હતી.જે લોન ગ્રાહકે ન ચૂકવતા બેંકે જરૂરી કાયદેસરની કાર્યવાહી કરી આ બંને મિલકત પર કબજો મેળવ્યો હતો.બાદમાં તે મિલકત બેંકના કબજામાં છે.

ગત તા.૨૭/૯/૨૦૨૪ ના આ મિકલતની વીઝીટ કરી ત્યારે અહીં સ્થિતિ જેમની તેમ હતી.બાદમાં ફરિયાદી અને બેંકના અધિકારી દ્વારા તા.૩૦/૧૧/૨૦૨૪ ના ફરી અહીં વિઝીટ કરતા પ્લોટ નં.૭ અને ૮ માં આવેલા રહેણાંક મકાનમાં પાછળના ભાગે રસોડામાં સામાન પડયો હોય તેમજ પ્લોટ નં.૧૭ થી ૨૫ માં સ્કુલનું બાંધકામ આવેલું હોય તેમાં નકુચા તોડી સામાન રાખ્યો હતો.આ બાબતે તપાસ કરતા તેવામાં આરોપી નટુ ભાલાળા અહીં આવતા તેને પુછતા આ સમાન તેનો હોવાનો જણાવ્યું હતું.જેથી બેંકની કબજાવાળી મિકલતમાં બેંકની મંજુરી વગર પ્રવેશ કરવા અંગે એરિયા મેનેજર દ્વારા આ ફરિયાદ નોંધાવવામાં આવી છે.જે ફરિયાદના આધારે ગોંડલ તાલુકા પોલીસે ગુનો નોંધી કાયદેસરની કાર્યવાહી કરી હતી.