ઇરાન અને ઇઝરાયેલ વચ્ચે વધી રહેલા ભીષણ તણાવ અને યુદ્ધની જ્વાળાઓની સીધી અસર હવે ગુજરાતના અર્થતંત્રના મહત્વના સ્તંભ સમાન મોરબીના સિરામિક ઉદ્યોગ પર પડી રહી છે. આંતરરાષ્ટ્રીય સ્તરે ઇંધણના ભાવમાં અસહ્ય વધારો અને સપ્લાયની અનિશ્ચિતતાને પગલે મોરબી સિરામિક એસોસિએશને આગામી એક મહિના સુધી તમામ કારખાનાઓ બંધ રાખવાનો ઐતિહાસિક અને સામૂહિક નિર્ણય લીધો છે. 15 માર્ચથી 15 એપ્રિલ સુધી સિરામિક ઉદ્યોગ સંપૂર્ણપણે બંધ રાખવાનો નિર્ણય લેવામાં આવ્યો છે.

હાઈ-લેવલ બેઠકમાં 500થી વધુ ઉદ્યોગકારોનો સૂર

આ કટોકટીભરી પરિસ્થિતિ અંગે ચર્ચા કરવા માટે આજે મોરબી સિરામિક એસોસિએશનના હોલ ખાતે એક ઉચ્ચસ્તરીય બેઠક યોજાઈ હતી. આ બેઠકમાં સિરામિક ઉદ્યોગના ચારેય ડિવિઝનના પ્રમુખો સહિત અંદાજે 500થી વધુ નાના-મોટા ઉદ્યોગકારો ઉપસ્થિત રહ્યા હતા. બેઠકમાં ઉદ્યોગની વર્તમાન સ્થિતિ અને ભવિષ્યના જોખમો અંગે ગંભીર મંથન કરવામાં આવ્યું હતું.

શા માટે લેવાયું ‘ફોર્સ્ડ વેકેશન’?

બેઠકમાં સર્વાનુમતે એ વાત પર ભાર મૂકવામાં આવ્યો હતો કે, પ્રોપેન અને નેચરલ ગેસની અછત તેમજ સતત વધતા જતા ભાવ વચ્ચે ઉદ્યોગ ચાલુ રાખવો હવે આર્થિક રીતે પરવડે તેમ નથી. યુદ્ધને કારણે લોજિસ્ટિક્સ અને ગેસ સપ્લાય ચેઈનમાં મોટો વિક્ષેપ પડ્યો છે. ઉદ્યોગકારોના જણાવ્યા મુજબ, "વર્તમાન સંજોગોમાં પ્લાન્ટ ચાલુ રાખવો એટલે મોટું આર્થિક નુકસાન વહોરવું. આ એક પ્રકારનું 'ફોર્સ્ડ વેકેશન' (ફરજિયાત વેકેશન) છે, જે ઉદ્યોગના અસ્તિત્વને બચાવવા માટે લેવું પડ્યું છે."

હજારો પરિવારો પર અસરની ભીતિ

મોરબી અને તેની આસપાસના વિસ્તારોમાં લગભગ 650 જેટલા સિરામિક એકમો 24 કલાક ધમધમે છે. આ એકમો બંધ થવાથી નીચે મુજબની ગંભીર અસરો જોવા મળશે

ઉત્પાદન ઠપ્પ: આગામી 30 દિવસ સુધી તમામ પ્રોડક્શન લાઈન સંપૂર્ણપણે બંધ રહેશે.

રોજગારી પર સંકટ: કારખાનાઓ સાથે જોડાયેલા હજારો શ્રમિકોની આજીવિકા પર સીધી અસર પડશે.

ટ્રાન્સપોર્ટ વ્યવસાય: દરરોજ હજારો ટ્રકોની અવરજવર કરતા ટ્રાન્સપોર્ટ ઉદ્યોગના પૈડાં પણ થંભી જશે.

નવા ભાવપત્રક સાથે થશે પુનઃપ્રારંભ

એસોસિએશન દ્વારા સ્પષ્ટ કરવામાં આવ્યું છે કે, ગેસની ઉપલબ્ધતા અને આંતરરાષ્ટ્રીય બજારમાં ભાવમાં સ્થિરતા આવ્યા બાદ જ ઉત્પાદન ફરી શરૂ કરવામાં આવશે. જ્યારે પણ એક મહિના બાદ ઉદ્યોગ ફરી ધમધમતો થશે, ત્યારે ઉત્પાદિત માલના નવા અને સુધારેલા ભાવપત્રક સાથે બજારમાં આવશે, જેથી ઉદ્યોગકારો ખર્ચને સરભર કરી શકે.

મોરબીનો આ નિર્ણય વિશ્વભરના ટાઇલ્સ માર્કેટમાં પણ હલચલ મચાવી શકે છે, કારણ કે મોરબી વિશ્વના સૌથી મોટા સિરામિક હબ પૈકીનું એક છે.