અમેરિકી રાષ્ટ્રપતિ ડોનાલ્ડ ટ્રમ્પની ઈરાન વિરુદ્ધની સૈન્ય કાર્યવાહીને મોટો ફટકો પડ્યો છે. અમેરિકાના નેશનલ કાઉન્ટર ટેરરિઝમ સેન્ટરના ડાયરેક્ટર જોસેફ કેન્ટ (Joseph Kent) એ યુદ્ધના વિરોધમાં પોતાના પદ પરથી રાજીનામું આપી દીધું છે. ટ્રમ્પ વહીવટીતંત્રના તેઓ એવા પ્રથમ ઉચ્ચ અધિકારી છે જેમણે ખુલ્લેઆમ આ જંગનો વિરોધ કરીને હોદ્દો ત્યાગ્યો છે.

સોશિયલ મીડિયા પર ટ્રમ્પના દાવાઓનું ખંડન
જોસેફ કેન્ટે સોશિયલ મીડિયા પ્લેટફોર્મ X પર પોતાનું રાજીનામું પોસ્ટ કરતા ગંભીર આક્ષેપો કર્યા છે. તેમણે લખ્યું છે કે, "હું મારા વિવેકબુદ્ધિ અનુસાર આ યુદ્ધનું સમર્થન કરી શકતો નથી. ઈરાન તરફથી અમેરિકાને કોઈ તાત્કાલિક ખતરો (Immediate Threat) નહોતો. આ યુદ્ધ માત્ર ઈઝરાયેલ અને તેની પ્રભાવશાળી લોબીના દબાણમાં આવીને શરૂ કરવામાં આવ્યું છે."

ટ્રમ્પના સુરક્ષાના દાવા પર સવાલ
ઈરાન પર હુમલા બાદ રાષ્ટ્રપતિ ટ્રમ્પે નિવેદન આપ્યું હતું કે અમેરિકી નાગરિકોની સુરક્ષા અને ઈરાની શાસન તરફથી ઉભા થયેલા જોખમને ખતમ કરવા માટે આ પગલું લેવાયું છે. જોસેફ કેન્ટના રાજીનામાએ ટ્રમ્પના આ દાવાને ખોટો સાબિત કર્યો છે. સંરક્ષણ નિષ્ણાતોના મતે, આંતરરાષ્ટ્રીય કાયદા મુજબ કોઈપણ દેશ પર હુમલો કરવા માટે 'તાત્કાલિક જોખમ' હોવું અનિવાર્ય છે, જે કેન્ટના મતે આ કિસ્સામાં ગેરહાજર હતું.

કોણ છે જોસેફ કેન્ટ?
45 વર્ષીય જોસેફ કેન્ટ અમેરિકી સેના અને ગુપ્તચર એજન્સીઓના અનુભવી અધિકારી રહ્યા છે:

Special Forces અને CIA: કેન્ટ અમેરિકી સ્પેશિયલ ફોર્સ અને CIA માં મહત્વની જવાબદારીઓ નિભાવી ચૂક્યા છે.

તુલસી ગબાર્ડના કરીબી: તેઓ નેશનલ ઈન્ટેલિજન્સના ડાયરેક્ટર તુલસી ગબાર્ડના નજીકના માનવામાં આવે છે.

અંગત જીવન: તેમની પત્ની શૈનન કેન્ટનું 2019માં સીરિયામાં એક આત્મઘાતી હુમલામાં મોત થયું હતું, જેના કારણે તેઓ યુદ્ધની ભયાનકતાથી સારી રીતે વાકેફ છે.

ખુફિયા એજન્સીઓમાં અજંપો
જોસેફ કેન્ટના આ નિર્ણયથી વ્હાઈટ હાઉસ અને અમેરિકી ખુફિયા એજન્સીઓમાં અફડાતફડીનો માહોલ છે. જોકે વ્હાઈટ હાઉસે હજુ સુધી આ મામલે કોઈ સત્તાવાર પ્રતિક્રિયા આપી નથી, પરંતુ આ ઘટના સ્પષ્ટ કરે છે કે ટ્રમ્પ સરકારની અંદર જ ઈરાન યુદ્ધને લઈને મતભેદો ચરમસીમાએ છે. આ રાજીનામા બાદ હવે અમેરિકી જનતા અને વિપક્ષમાં પણ આ યુદ્ધની જરૂરિયાત સામે સવાલો ઉઠી રહ્યા છે.