પ્રાપ્ત વિગતો મુજબ, રાજકોટના મવડી ચોકડી પાસે ક્રિષ્ના પાર્ક સોસાયટીમાં રહેતાં ગૌતમભાઈ મગનભાઈ રામાણી (ઉ.વ.૩૮) એ નોંધાવેલ ફરીયાદમાં આરોપી તરીકે વિશાલ પટેલ નામ ધારણ કરેલ વ્યક્તી (રહે.કાઠમંડુ, નેપાળ) નું નામ આપી જણાવ્યું હતું કે, તેઓ શાપર ખાતે રોયલ સ્ટીલ ઇન્ડસ્ટ્રીઝ નામનું કારખાનું ચલાવે છે. જેમાં ટાંકાના ઢાંકણા બનાવે છે.

ગઇ તા. ૨૯ ના બપોરના બે વાગ્યાની આસપાસ તેઓ અને તેમનો ભાઈ ચિરાગ રામાણી કારખાને હતા ત્યારે અજાણ્યા નંબર પરથી ચિરાગ રામાણીને વોટ્સએપ કોલ આવ્યો હતો અને કહ્યું હતું કે, હું કાઠમાંડુ (નેપાળ) થી વિશાલ પટેલ બોલું છું, અમે દરેક દેશમાં એફ.આર.પી. મેવોલ કવરની સપ્લાય કરીએ છીએ, તમે એફ.આર.પી, મેવોલ કવર બનાવો છો, અમારે દર મહીને ૨૦ થી ૨૨ ગાડી સપ્લાયની જરૂરીયાત છે, અમે તમારી પાસેથી એફ.આર.પી, મૈવોલ કવર ખરીદ કરવા માંગીએ છીએ, તેમ વાત કરતા જેથી આટલી મોટી સપ્લાય કરવાથી ધંધાને વેગ મળે તેમ હોય માટે સપ્લાય કરવા સારૂ સંમતિ દર્શાવેલ હતી.

તેણે કહેલ કે, આ સપ્લાય ચાલુ કરવા માટે નેપાળ બોર્ડરની ગવર્ન્મેન્ટ એપ્રુવલ લેવા માટે તેમજ સર્ટીફીકેટ કઢાવવા તમારે ગવર્ન્મેન્ટ સાઇટ ઉપર ઓનલાઇન રૂ. ૫૩૦૦ પેમેન્ટ કરવું પડશે તેમ વાત કરતા ફરીયાદીએ હા પાડેલ અને વિશાલ પટેલે એક ક્યુ.આર.કોડ મોકલેલ જેમાં રૂપીયા ટ્રાન્સફર કરેલ ત્યારબાદ આ વિશાલ પટેલના નંબર પર અનેક વાર સંપર્ક કરેલ પરંતુ કોઇ સંપર્ક થઈ શકેલ નહી જેથી સાયબર ફ્રોડ થયેલનું લાગતા હેલ્પલાઇન નં. ૧૯૩૦ ઉપર અરજી કર્યા બાદ શાપર પોલીસ મથકમાં ફરીયાદ નોંધાવી હતી.