ભારતીય જનતા પાર્ટી (ભાજપ) ના ધારાસભ્ય પરાગ શાહનો એક વીડિયો સોશિયલ મીડિયા પર ઝડપથી વાયરલ થઈ રહ્યો છે. આ વીડિયોમાં, મુંબઈના ઘાટકોપર પૂર્વ મતવિસ્તારના ધારાસભ્ય પરાગ શાહ ભિખારીના વેશમાં રસ્તાના કિનારે બેઠા છે અને લોકો વચ્ચે ફરતા જોવા મળે છે. પહેલી નજરે જ, આ વીડિયો જોઈને બધાને આશ્ચર્ય થયું કે કરોડોની સંપત્તિ ધરાવતા ધારાસભ્ય ભિખારીના વેશમાં કેમ આવ્યા. જોકે, આ સમગ્ર ઘટના પાછળનું કારણ પાછળથી સામે આવ્યું.

હકિકતમાં, પરાગ શાહે જૈન ધાર્મગુરૂ  નમ્રમુનિ મહારાજના સૂચન પર આ અનુભવ કર્યો હતો. જૈન ચાતુર્માસ દરમિયાન, તેમને એક દિવસ માટે ભિખારીનું જીવન જીવવાની અને અનુભવને સમજવાની સલાહ આપવામાં આવી હતી. તેમના ગુરુની સલાહને અનુસરીને, ધારાસભ્યએ તેમની સુરક્ષા, લક્ઝરી કાર અને મોંઘી વસ્તુઓ છોડી દીધી અને એક દિવસ માટે ભિખારીની ભૂમિકા ભજવી.

ઘાટકોપરની શેરીઓમાં કોઈ તેમને ઓળખી શક્યું નહીં

એવું કહેવાય છે કે પરાગ શાહ મેકઅપ કરી ભિખારીનો વેશ ધારણ કર્યો હતો, ઘાટકોપર સ્ટેશન સંકુલની શેરીઓમાં ફરતા હતા ત્યારે કોઈએ તેમને ઓળખ્યા નહીં. તે રસ્તાના કિનારે બેઠા, લોકો પાસેથી ભીખ માંગતા અને ફૂટપાથ પર ખાતા જોવા મળ્યા હતા. અન્ય ભિખારીની જેમ ભાજપના ધારાસભ્યએ પણ પોતાનો એક દિવસ ભિખારીની જેમ વિતાવ્યો હતો. આ અનુભવ દ્વારા ધારાસભ્યએ ભિખારી માટે રોજિંદા જીવન કેવું હોય છે અને તેને કઈ પરિસ્થિતિઓનો સામનો કરવો પડે છે તે સમજવાનો પ્રયાસ કર્યો.

પોતાનો મેકઅપ ઉતાર્યો અને ફરીથી એ જ લોકોને મળ્યો

અનુભવને વધુ રસપ્રદ બનાવવા માટે પરાગ શાહે ભિખારીના વેશમાં જ્યાં સમય વિતાવ્યો હતો તે સ્થળોની ફરી મુલાકાત લીધી. આ વખતે તેણે પોતાનો મેકઅપ ઉતાર્યો અને લોકો સાથે તેની સાચી ઓળખમાં વાતચીત કરી. આ સમગ્ર ઘટના વાયરલ વીડિયોમાં કેદ થઈ છે. ધારાસભ્યના આ પ્રયોગની ચર્ચા હવે રાજકીય અને સામાજિક વર્તુળોમાં થઈ રહી છે.

પરાગ શાહ સૌથી ધનિક ધારાસભ્યોમાંના એક

પરાગ શાહ મહારાષ્ટ્રના સૌથી ધનિક રાજકીય નેતાઓમાંના એક તરીકે ઓળખાય છે. 2024ની મહારાષ્ટ્ર વિધાનસભા ચૂંટણી માટેના તેમના સોગંદનામામાં, તેમણે રૂ.3,383 કરોડથી વધુની સંપત્તિ જાહેર કરી હતી. આનાથી તેઓ મહારાષ્ટ્રના સૌથી ધનિક ઉમેદવારોમાંના એક બને છે.

અહેવાલો અનુસાર, લગભગ પાંચ વર્ષ પહેલાં તેમની જાહેર કરેલી સંપત્તિ આશરે રૂ.500 કરોડ  હતી. વર્ષોથી તેમની સંપત્તિમાં ઝડપથી વધારો થયો છે. પરાગ શાહનો વ્યવસાય મુખ્યત્વે રિયલ એસ્ટેટ ક્ષેત્રમાં સંકળાયેલો છે.

તેઓ અગાઉ કોર્પોરેટર હતા

પરાગ શાહ ઘાટકોપર પૂર્વ વિધાનસભા મતવિસ્તારના ધારાસભ્ય છે. તેઓ રાજકારણમાં પ્રવેશતા પહેલા અને પછી પણ રિયલ એસ્ટેટના વ્યવસાયમાં સંકળાયેલા રહ્યા છે. તેમણે મુંબઈ મ્યુનિસિપલ કોર્પોરેશનના કોર્પોરેટર તરીકે પણ સેવા આપી છે. હવે, ઘાટકોપરની શેરીઓમાં ભિખારીના વેશમાં ભટકતા તેમનો એક વીડિયો સોશિયલ મીડિયા પર ચર્ચાનો વિષય બન્યો છે.