કર્મચારી ભવિષ્ય નિધિ સંગઠન (EPFO) ના ખાતાધારકો માટે શ્રમ મંત્રાલયે એક મોટી રાહતની જાહેરાત કરી છે. નવી યોજના મુજબ, વર્ષોથી બંધ પડેલા નિષ્ક્રિય ખાતાઓમાં જમા થયેલી નાની રકમ હવે કોઈપણ સરકારી ફોર્મ કે અરજી વગર સીધી તમારા બેંક ખાતામાં જમા કરી દેવામાં આવશે. આ પગલાથી લાખો મધ્યમ વર્ગીય કર્મચારીઓને મોટી ઝંઝટમાંથી મુક્તિ મળશે.

કોના ખાતામાં આવશે પૈસા?
આ યોજનાનો લાભ લેવા માટે સરકારે બે મુખ્ય શરતો રાખી છે:

રકમની મર્યાદા: જે નિષ્ક્રિય ખાતાઓમાં ૧,૦૦૦ રૂપિયા કે તેથી ઓછી રકમ જમા છે, તેમને આ સુવિધાનો લાભ મળશે.

આધાર લિંકિંગ: જે ખાતાધારકોનું પીએફ ખાતું અને બેંક એકાઉન્ટ આધાર કાર્ડ સાથે જોડાયેલું છે, તેમને આ રકમ સીધી ટ્રાન્સફર કરવામાં આવશે.

શું છે સરકારનો પાયલોટ પ્રોજેક્ટ?
નિયમ મુજબ જો કોઈ EPFO ખાતામાં સતત ૩ વર્ષ સુધી કોઈ વ્યવહાર ન થાય, તો તેને 'નિષ્ક્રિય' (Inoperative) ગણવામાં આવે છે. હાલમાં આ પ્રક્રિયા એક પાયલોટ પ્રોજેક્ટ તરીકે શરૂ કરવામાં આવી છે. પ્રથમ તબક્કામાં કુલ ૩૧ લાખ નિષ્ક્રિય ખાતાઓમાંથી અંદાજે ૬ લાખ ખાતાઓ પસંદ કરવામાં આવ્યા છે. જો આ શરૂઆતી પ્રયોગ સફળ રહેશે, તો બાકીના ૨૫ લાખ ખાતાઓ માટે પણ આ જ રીતે ઓટોમેટિક પૈસા ટ્રાન્સફર કરવાની પ્રક્રિયા અપનાવવામાં આવશે.

હજારો કરોડ રૂપિયા ફસાયેલા
આંકડાઓ પર નજર કરીએ તો પીએફ ખાતાઓમાં ફસાયેલી રકમનો આંકડો ઘણો મોટો છે. કુલ ૩૧.૮૬ લાખ નિષ્ક્રિય ખાતાઓમાં આશરે ૧૦,૯૦૩ કરોડ રૂપિયા જમા છે. જેમાંથી ૧,૦૦૦ રૂપિયા સુધીની રકમ ધરાવતા ૬ લાખ ખાતાઓમાં કુલ ૩૦.૫૨ કરોડ રૂપિયા છે. આ એવી રકમ છે જે છેલ્લા ૩ થી ૨૦ વર્ષથી ખાતાઓમાં પડી રહી છે કારણ કે લોકો નાની રકમ માટે જટિલ કાગળની પ્રક્રિયા કરવાનું ટાળતા હતા.

શ્રમ મંત્રાલયનો આ નિર્ણય ડિજિટલ ઇન્ડિયાની દિશામાં એક મોટું ડગલું છે. હવે નોકરી છોડ્યા પછી કે કંપની બદલ્યા પછી જો તમારા ખાતામાં થોડી રકમ રહી ગઈ હશે, તો તે ખોવાઈ નહીં જાય પણ આપમેળે તમારા સુધી પહોંચી જશે.