BREAKING NEWS

રાજકોટમાં ઠંડી ગાયબ, રાત્રે પણ ગરમીની લહેર, સામાન્ય કરતાં તાપમાન 4.7 ડિગ્રી વધુ નોંધાયું

  • November 17, 2026 03:35 PM 
Aajkaal Daily (Desh Pardesh Ni Aajkaal)


નવેમ્બર મહિનો અડધો વીતી ગયો હોવા છતાં રાજકોટ સહિત સૌરાષ્ટ્ર અને કચ્છમાં શિયાળાની ઠંડી જામવાને બદલે રાત્રિના તાપમાનમાં પણ ગરમીનો અનુભવ થઈ રહ્યો છે. રાજકોટમાં આજે સવારે લઘુત્તમ તાપમાન ૨૨.૬ ડિગ્રી નોંધાયું હતું, જે સામાન્ય કરતાં ૪.૭ ડિગ્રી વધારે છે. ભુજમાં તો લઘુત્તમ તાપમાન સામાન્ય કરતાં પાંચ ડિગ્રી વધુ નોંધાયું છે. ગુજરાતનાં મોટાભાગનાં શહેરોમાં રાત્રિનું તાપમાન સામાન્ય કરતાં ઊંચું રહેતાં શિયાળાની ઠંડી હજુ શરૂ થઈ નથી.


હવામાન વિભાગના આજે સવારે સાડાઆઠ વાગ્યાના સત્તાવાર આંકડા મુજબ રાજકોટમાં લઘુત્તમ તાપમાન ૨૨.૬ ડિગ્રી અને સુરેન્દ્રનગરમાં ૨૨.૫ ડિગ્રી નોંધાયું હતું. રાજકોટમાં તાપમાન સામાન્ય કરતાં ૪.૭ ડિગ્રી અને સુરેન્દ્રનગરમાં ૪.૩ ડિગ્રી ઊંચું રહ્યું હતું. અમરેલીમાં ૧૯.૬ ડિગ્રી તાપમાન નોંધાયું હતું, જે સામાન્ય કરતાં ૩.૨ ડિગ્રી વધુ હતું. ભાવનગરમાં ૨૧.૮ ડિગ્રી, જૂનાગઢમાં ૨૧.૭ ડિગ્રી, પોરબંદરમાં ૨૧.૩ ડિગ્રી અને વેરાવળમાં ૨૩.૮ ડિગ્રી તાપમાન નોંધાયું હતું.


કચ્છમાં પણ ઠંડીની ખાસ અસર જોવા મળી નથી. ભુજમાં લઘુત્તમ તાપમાન ૨૧.૬ ડિગ્રી નોંધાયું હતું, જે સામાન્ય કરતાં પાંચ ડિગ્રી વધુ છે. સામાન્ય રીતે ઠંડી માટે જાણીતાં નલિયામાં પણ તાપમાન ૧૯.૭ ડિગ્રી રહ્યું હતું, જે સામાન્ય કરતાં ૪.૩ ડિગ્રી ઊંચું છે. કંડલામાં ૨૪.૧ ડિગ્રી લઘુત્તમ તાપમાન નોંધાયું હતું.


ગુજરાતનાં અન્ય શહેરોમાં અમદાવાદમાં ૨૦.૫ ડિગ્રી, વડોદરામાં ૧૯.૬ ડિગ્રી, સુરતમાં ૨૦.૬ ડિગ્રી, ગાંધીનગરમાં ૨૧.૨ ડિગ્રી અને ડીસામાં ૧૮.૯ ડિગ્રી તાપમાન નોંધાયું હતું. આજે ઉપલબ્ધ સત્તાવાર આંકડા મુજબ ડાંગમાં સૌથી ઓછું ૧૬.૧ ડિગ્રી તાપમાન નોંધાયું હતું.


રાજકોટમાં ગઈકાલે દિવસનું મહત્તમ તાપમાન ૩૫.૯ ડિગ્રી નોંધાયું હતું, જે સામાન્ય કરતાં ૨.૨ ડિગ્રી વધારે હતું. ભુજમાં ૩૬ ડિગ્રી અને નલિયામાં ૩૬.૨ ડિગ્રી મહત્તમ તાપમાન નોંધાયું હતું. આમ, દિવસ દરમિયાન ગરમી અને રાત્રે સામાન્ય કરતાં ઊંચા તાપમાનને કારણે શિયાળાની શરૂઆતનો અહેસાસ થતો નથી.





લાઈક અને ફોલો કરો અમારું ફેસબુક પેજ FACEBOOK - AAJKAALDAILY


ફોલો કરો અમારું ઇન્સ્ટાગ્રામ INSTAGRAM - AAJKAALDAILY


સબસ્ક્રાઈબ કરો અમારી યૂ ટ્યૂબ ચેનલ YOUTUBE - AAJKAALDAILY


મહત્વના સમાચારો આપના મોબાઇલમા મેળવવા માટે જોડાઓ અમારા વોટ્સએપ ગ્રૂપમાં  99251 12230  

View News On Application