રાજકોટ શહેરના કોઠારીયા રોડ પર આવેલા નંદા હોલ પાછળની સુભાષ નગર સોસાયટીમાં મોડી રાત્રે એક ભયાનક ઘટના બની હતી. સોસાયટીમાં આવેલા એક મકાનમાં રાત્રિના સમયે ચાર્જિંગમાં મુકેલી બેટરીવાળી ટુ-વ્હીલર (ઇલેક્ટ્રિક સ્કૂટર)માં અચાનક શોર્ટ સર્કિટ કે અન્ય ટેકનિકલ ખામીના કારણે આગ ભભૂકી ઉઠી હતી. જોતજોતામાં આગે રૌદ્ર સ્વરૂપ ધારણ કરી લીધું હતું અને આખું ઘર ધુમાડાથી ભરાઈ ગયું હતું.

ફાયર બ્રિગેડનું ક્વિક રેસ્ક્યૂ: 5 લોકોનો સુરક્ષિત બચાવ

આ ઘટના રાત્રિના આશરે ૧૧:૫૦ વાગ્યાની આસપાસ બની હતી, જ્યારે મકાનની અંદર પરિવારના પાંચ સભ્યો ઊંઘી રહ્યા હતા. આગના કારણે ઘરમાં ધુમાડો પ્રસરી જતાં અફરાતફરીનો માહોલ સર્જાયો હતો અને અંદર રહેલા લોકો ફસાયા હતા. ઘટનાની જાણ થતાં જ રાજકોટ ફાયર બ્રિગેડ અને સ્થાનિક પોલીસની ટીમ તાત્કાલિક સ્થળ પર પહોંચી ગઈ હતી. ફાયર બ્રિગેડના સ્ટાફે ભારે જહેમત ઉઠાવીને ઘરમાં ફસાયેલા તમામ પાંચેય સભ્યોને સમયસર અને અત્યંત સુરક્ષિત રીતે બહાર કાઢ્યા હતા.

મોટી જાનહાનિ ટળી, આગ લાગવાનું કારણ અકબંધ

ફાયર ફાઈટરોની ત્વરિત અને સરાહનીય કામગીરીના કારણે એક મોટી હોનારત ટળી હતી. આ ઘટનામાં સદનસીબે કોઈ પણ વ્યક્તિ દાઝી નથી કે કોઈને નાની-મોટી ઈજા પહોંચી નથી. ફાયર બ્રિગેડની ટીમે ટૂંક સમયમાં જ પાણીનો મારો ચલાવીને આગ પર પૂર્ણપણે કાબૂ મેળવી લીધો હતો. બેટરીમાં કયા કારણોસર આગ લાગી તે અંગે ચોક્કસ કારણ જાણવા માટે પોલીસ અને ટેકનિકલ ટીમ દ્વારા વધુ તપાસ હાથ ધરવામાં આવી છે.