ગુજરાતમાં ‘વાઇબ્રન્ટ ગુજરાત ગ્લોબલ સમિટ-૨૦૨૭’ના પ્રચાર-પ્રસાર અને રોડ-શો સંદર્ભે માનનીય મુખ્યમંત્રીના નેતૃત્વમાં એક ઉચ્ચસ્તરીય પ્રતિનિધિમંડળ અમેરિકા અને કેનેડાના પ્રવાસે ગયું છે. આ વિદેશ પ્રવાસ દરમિયાન ગાંધીનગર ખાતે વહીવટી કામગીરી અટક્યા વગર સરળતાથી ચાલતી રહે તે માટે રાજ્યના સામાન્ય વહીવટ વિભાગ દ્વારા ૧૫ ઓગસ્ટ ૨૦૨૬ના રોજ એક વિશેષ ચાર્જ એરેન્જમેન્ટ ઓર્ડર જાહેર કરવામાં આવ્યો છે. આ સરકારી આદેશ અનુસાર, વિદેશ પ્રવાસે જઈ રહેલા ઉચ્ચ આઇએએસ  અધિકારીઓ ગેરહાજર રહેવાના હોવાથી તેમના વિભાગોનો વધારાનો કાર્યભાર અન્ય વરિષ્ઠ અધિકારીઓને સોંપવામાં આવ્યો છે.  

ઓર્ડર મુજબ, નાણાં વિભાગના અતિરિક્ત મુખ્ય સચિવ ડો. ટી. નટરાજનના સ્થાને જનરલ એડમિનિસ્ટ્રેશન ડિપાર્ટમેન્ટના ACS ડો. અંજુ શર્માને નાણાં વિભાગનો વધારાનો ચાર્જ સોંપવામાં આવ્યો છે. તેવી જ રીતે, ઉદ્યોગ અને ખાણ વિભાગના અતિરિક્ત મુખ્ય સચિવ મમતા વર્માના ચાર્જમાં આરોગ્ય અને પરિવાર કલ્યાણ વિભાગના ACS રાજીવ ટોપ્નોને મુકવામાં આવ્યા છે. ગૃહ વિભાગના અગ્ર સચિવ સંજીવ કુમારના સ્થાને કૃષિ, ખેડૂત કલ્યાણ અને સહકાર વિભાગના ACS અરુણકુમાર એમ. સોલંકી ગૃહ વિભાગની વધારાની જવાબદારી સંભાળશે.  

આ ઉપરાંત, ઉદ્યોગ કમિશનર સ્વરૂપ પી. નો વધારાનો ચાર્જ જીઆઇડીસી (GIDC)ના વાઇસ ચેરમેન અને મેનેજિંગ ડિરેક્ટર પ્રવીણા ડી.કે. ને સોંપવામાં આવ્યો છે. માહિતી અને પ્રસારણ વિભાગના સચિવ તથા દિલ્હી ખાતેના રેસિડેન્ટ કમિશનર ડો. વિક્રાંત પાંડેના સ્થાને મુખ્યમંત્રીના સચિવ ડો. અજય કુમારને માહિતી વિભાગનો ચાર્જ અને ડો. સંધ્યા ભુલ્લર (કમિશનર ઓફ હેલ્થ) ને નવી દિલ્હી ખાતેના રેસિડેન્ટ કમિશનરનો ચાર્જ સુપ્રત કરાયો છે.  

રાજ્યપાલના આદેશથી સામાન્ય વહીવટ વિભાગના ઉપસચિવ જલ્મીન શાહ દ્વારા આ સત્તાવાર ઓર્ડર જારી કરવામાં આવ્યો છે. પ્રતિનિધિમંડળના વિદેશ પ્રવાસ દરમિયાન સચિવાલયમાં રાજ્ય શાસન અને વિભાગીય પ્રક્રિયાઓ અવરોધ વિના ચાલુ રહે તે હેતુથી આ કામચલાઉ વ્યવસ્થા કરવામાં આવી છે.