બાતમીના આધારે રાજકોટ એલસીબીએ દબોચી લીધો

જામનગર જિલ્લાના જુદા જુદા પોલીસ સ્ટેશનમાં પાંચ અને રાજકોટ ગ્રામ્ય પોલીસમાં એક મળી છ જેટલા દારૂના ગુનાના લાંબા સમયથી નાસતા ફરતા બુટલેગરને રાજકોટ એલસીબીએ ગોંડલ નજીકથી ઝડપી લઇ આગળની કાર્યવાહી હાથ ધરી છે.

રાજકોટ જિલ્લાના પોલીસ મથકમાં લાંબા સમયથી નાસતા ફરતા આરોપીઓને શોધી તેની સામે કાર્યવાહી કરવા માટે જિલ્લા પોલીસ વડા હિમકરસિંહની સુચનાને પગલે રાજકોટ એલસીબીના પીઆઈ વી.વી.ઓડેદરાની રાહબરીમાં પીએસઆઈ એચ.સી.ગોહિલ અને ટીમ પેટ્રોલીંગમાં હોય ત્યારે ચોક્કસ બાતમી મળી હતી કે, ગોંડલ તાલુકા પોલીસ સ્ટેશન ઉપરાંત જામનગરના જુદા જુદા પાંચ પોલીસ સ્ટેશનમાં દારૂના ગુનામાં પોતાની ધરપકડ ટાળવા પોલીસ પકડથી ભાગતો ફરતો રવિરાજ દાનભાઈ ખાચર ગોંડલ તરફ આવી રહ્યો છે.

જે બાતમીના આધારે હ્યુમન સોર્સ અને ટેક્નિકલ સોર્સની મદદથી શખસ ગોંડલ પાસે આવતા તેને એલસીબીની ટીમે ઝડપી લઇ આગળની કાર્યવાહી માટે ગોંડલ તાલુકા પોલીસને સોંપ્યો છે. પોલીસની તપાસમાં શખસ જામનગર સીટી બી-ડિવિઝનના બે અને સી-ડિવિઝનના બે તેમજ પડાણા પોલીસ સ્ટેશનના અને ગોંડલ તાલુકા પોલીસ મથકના એક દારૂના ગુનામાં ફરાર હતો. આ ઉપરાંત અગાઉ અમરેલી, મોરબી માળિયા મિયાણા, રાજકોટ માલવીયા નગર પોલીસ મથકમાં દારૂના ગુના નોંધાયેલા છે.