અસમની રાજધાની ગુવાહાટીમાંથી એક અત્યંત સનસનાટીભરી અને હૃદયકંપાવનારી ઘટના સામે આવી છે. સોમવારે મોડી રાત્રે શહેરના એક પ્રખ્યાત હોટલ પરિસરમાં અજાણ્યા સશસ્ત્ર હુમલાખોરોએ અંધાધૂંધ ગોળીબાર કર્યો હતો. આ ભયાનક ગોળીબારની ઘટનામાં એક મહિલા સહિત 4 લોકોના ઘટનાસ્થળે જ કરુણ મોત નીપજ્યા છે. ગોળીબાર બાદ હોટલ અને તેની આસપાસના વિસ્તારમાં ભારે અફડાતફડી અને દહેશતનો માહોલ સર્જાઈ ગયો હતો.

મળતી પ્રાથમિક વિગતો અનુસાર આ લોહિયાળ ઘટના ગુવાહાટીના બોરા સર્વિસ વિસ્તારમાં આવેલી 'વિલાસ ઇન' (Bilas Inn) નામના હોટલમાં બની હતી. ઘટના બન્યાના તુરંત બાદ જ સ્થાનિક વિસ્તારના વિઝ્યુઅલ અને વીડિયો સામે આવ્યા છે, જેમાં હોટલના રિસેપ્શન કાઉન્ટર પાસે અને બહાર રસ્તા પર રક્તરંજિત હાલતમાં લોકોના મૃતદેહો પડેલા જોવા મળ્યા હતા. અચાનક થયેલા ગોળીબારને કારણે હોટલમાં રોકાયેલા મહેમાનો અને કર્મચારીઓમાં ભાગદોડ મચી ગઈ હતી.

પોલીસના પ્રાથમિક અહેવાલો મુજબ હુમલાખોરોએ હોટલમાં આવેલા 6 લોકોના એક જૂથને નિશાન બનાવીને તાબડતોબ ગોળીબાર કર્યો હતો. આ જૂથમાં 2 મહિલાઓ પણ સામેલ હતી. આ ગોળીબારમાં કેટલાક ઇજાગ્રસ્ત થયેલા લોકો હોટલના કર્મચારીઓ હોવાની પણ માહિતી સામે આવી રહી છે. હુમલાખોરોએ અત્યંત નજીકથી ગોળીઓ ચલાવી હતી, જેના કારણે 4 લોકોએ સ્થળ પર જ દમ તોડી દીધો હતો.

ઘટનાની ગંભીરતાને ધ્યાનમાં રાખીને ગુવાહાટીના પોલીસ કમિશનર પાર્થ સારથી મહંત ઉચ્ચ પોલીસ અધિકારીઓ અને ફોરેન્સિક ટીમ સાથે તુરંત ઘટનાસ્થળે પહોંચી ગયા હતા. પોલીસે સમગ્ર હોટલ પરિસરને સીલ કરીને સઘન તપાસ અને નાકાબંધી હાથ ધરી છે. જોકે, હુમલા પાછળનો મુખ્ય હેતુ શું હતો, મૃતકોની સાચી ઓળખ અને શંકાસ્પદ હુમલાખોરો કોણ હતા તે અંગે હજુ સુધી સત્તાવાર અને સ્પષ્ટ માહિતી સામે આવી નથી. પોલીસ આસપાસના સીસીટીવી ફુટેજ કબ્જે કરીને આરોપીઓને ઝડપી પાડવા માટે તપાસ ચલાવી રહી છે.