રાજકોટ શહેર સહિત સમગ્ર પંથકમાં છેલ્લા ૨૪ કલાક દરમિયાન મેઘરાજાએ ધમાકેદાર ઇનિંગ રમી છે. ગોંડલ, વીરપુર, લોધીકા અને જસદણ સહિતના વિસ્તારોમાં આખી રાત વરસેલા મુશળધાર વરસાદને કારણે નદી-નાળા બે કાંઠે વહેવા લાગ્યા છે. એક તરફ ભારે વરસાદના કારણે જળાશયો અને ચેકડેમો ઓવરફ્લો થતાં ખેડૂતોમાં આનંદની લાગણી છવાઈ છે, તો બીજી તરફ વીરપુર નજીક પૂરના પાણીના તીવ્ર પ્રવાહમાં એક કાર તણાઈ જવાની ગંભીર ઘટના પણ સામે આવી છે.

વીરપુરમાં તેલ હોકરા નદીના પૂરમાં કાર તણાઈ

ગત રાતથી વરસી રહેલા ભારે વરસાદ વચ્ચે યાત્રાધામ વીરપુર ખાતે એક દુર્ઘટના સર્જાઈ હતી. નેશનલ હાઇવે પરથી સ્વામિનારાયણ ગુરુકુલ થઈને વીરપુર તરફ જતા રસ્તા પર આવેલી તેલ હોકરા નદીમાં ભારે પૂર આવ્યું હતું. આ ધસમસતા પૂરના પ્રવાહમાં એક કાર તણાઈ ગઈ હતી. સ્થાનિક લોકોના જણાવ્યા મુજબ કારમાં બે વ્યક્તિઓ સવાર હોવાની આશંકા સેવાઈ રહી છે. ઘટનાની જાણ થતાં જ જેતપુર ફાયર બ્રિગેડની ટીમ અને સ્થાનિક પોલીસ કાફલો તાત્કાલિક ઘટનાસ્થળે દોડી ગયો હતો અને તંત્ર દ્વારા પૂરના પાણીમાં કાર તથા સવાર લોકોની શોધખોળ હાથ ધરવામાં આવી છે.

ગોંડલ અને જસદણ પંથકમાં અનરાધાર વરસાદ

ગોંડલ પંથક પર મેઘરાજા ભારે મહેરબાન થયા છે. ગોંડલ શહેરમાં છેલ્લા ૧૦ કલાકમાં સાડા ચાર (૪.૫) ઈંચ જેટલો ભારે વરસાદ નોંધાયો છે. આખી રાત વરસેલા ધોધમાર વરસાદને કારણે ગોંડલ શહેરના મુખ્ય રાજમાર્ગો અને નીચાણવાળા વિસ્તારોમાં વરસાદી પાણી ફરી વળ્યા હતા. આ ઉપરાંત ગોંડલના મેસપર સહિતના ગ્રામ્ય વિસ્તારોમાં નદીઓ બે કાંઠે થઈ ગઈ હતી અને ચેકડેમો પણ ઓવરફ્લો થયા હતા. બીજી તરફ, જસદણ પંથકના આટકોટ, જંગવડ, પાંચવડા, જીવાપર, સાણથલી અને બળધોઈ સહિતના વિસ્તારોમાં આખી રાત ધીમી ધારે ૨ ઈંચ વરસાદ વરસ્યો હતો, જેના લીધે ખારી નદીમાં નવા નીરની આવક થઈ હતી.

લોધીકા અને વીરપુર પંથકમાં ખેતરો અને નદીઓ છલકાયા

લોધીકા તાલુકામાં પણ મોડી રાત્રે મુશળધાર વરસાદ વરસ્યો હતો. ખીરસરા અને આસપાસના ગ્રામ્ય વિસ્તારોની નદીઓમાં નવા નીર આવ્યા છે. વીરપુરમાં પણ ધોધમાર વરસાદથી વીરપુર-મેવાસા રોડ પર આવેલા ત્રિવેણીશ્વર મહાદેવ મંદિર નજીકનો ચેકડેમ ઓવરફ્લો થયો હતો. વીરપુરની આસપાસની નદીઓ અને જળાશયો છલકાઈ જતાં નયનરમ્ય દ્રશ્યો સર્જાયા છે.

કપાસ અને મગફળીના પાકને મળ્યું 'નવજીવન'
સમગ્ર રાજકોટ જિલ્લામાં સાર્વત્રિક અને યોગ્ય સમયે વરસેલા આ વરસાદથી ગ્રામ્ય વિસ્તારોમાં વાતાવરણમાં આહલાદક ઠંડક પ્રસરી ગઈ છે. આ વરસાદ ખેડૂતો માટે 'કાચું સોનું' સાબિત થયો છે. ખેતરોમાં ઊભેલા કપાસ અને મગફળી સહિતના પાકને નવું જીવનદાન મળતાં ખેડૂતોમાં ભારે આનંદ અને ખુશીની લહેર ફરી વળી છે.