કોઠારીયા રોડ પરના આરતી ઇન્ડસ્ટ્રીઝ એરિયામાં યુવકને ચાર બુકાનીધારીએ રોકીને છરી વડે હુમલો કરી મોબાઈલ અને રોકડ રકમની લૂંટ ચલાવી નાશી ગયા હતા. ઘવાયેલા યુવકને છરીનો ઘા લાગી જતા સિવિલ હોસ્પિટલમાં સારવાર લીધી હતી. બનાવના પગલે આજીડેમ પોલીસે તપાસ હાથ ધરી છે.

પ્રાપ્ત વિગત મુજબ મૂળ આસામનો અને કોઠારીયા રોડ પર આરતી ઇન્ડસ્ટ્રીઝ એરિયામાં ભાડાની ઓરડીમાં રહેતો જંગલું ધનવરભાઈ આદિવાસી (ઉ.વ.35)નો યુવક રાત્રીના અગ્યારેક વાગ્યે નજીક રહેતા ભાઈ-ભાભીના ઘરેથી જમીને પોતાના રૂમે જતો હતો ત્યારે રસ્તામાં અજાણ્યા ચાર બુકાનીધારીઓએ આંતરી મોબાઈલ અને પૈસા સહિતની વસ્તુઓ આપી દેવા માટેનું કહેતા યુવકે આપવાની ના પાડતા શખસોએ પકડી યુવકને છરીનો ઘા સાથળના ભાગે મારી દઈ ખિસ્સામાં રહેલો મોબાઈલ અને રોકડ 200 રૂપિયા લઈ નાસી છૂટ્યા હતા. દેકારો થતા આસપાસના લોકો દોડી આવ્યા હતા અને કોઈએ 108ને ફોન કરતા સિવિલ હોસ્પિટલમાં ખસેડાયો હતો. બનાવ અંગે હોસ્પિટલ ચોકીના સ્ટાફે આજીડેમ પોલીસને જાણ કરતા પોલીસે યુવકનું નિવેદન નોંધવા આવતા પોતે ફરિયાદ કરવાનો ઇન્કાર કર્યો હતો.