શહેરના ટ્રાફીકથી અતિ વ્યસ્ત માર્ગો પર ગેપ મુકવામાં માપદંડનો પણ ઉલાળીયો કરવામાં આવ્યાનું મનપાના અતરંગ સૂત્રોએ જણાવ્યું છે. કારણ કે, શહેરમાં ટ્રાફીકથી ધમધમતા મુખ્ય માર્ગો પર જંકશન ટુ જંકશન અને મેઇન રોડ ટુ ક્રોસીંગ હોય તે સ્થળે ગેપ મુકવાનો માપદંડ એટલે કે નિયમ છે. પરંતુ શહેરના મોટા ભાગના મુખ્ય માર્ગો પર ગેપ મૂકવામાં આ માપદંડનું પાલન કરવામાં ન કરવામાં આવ્યાની સ્થિતિ જોવા મળી છે. કારણ કે, અડધા કીમીના માર્ગમાં અધધ ૫ થી ૧૦ ગેપ મૂકવામાં આવ્યા છે. આટલું જ નહીં મુખ્ય માર્ગો પર કયાં અંતરે કેટલા ગેપ મૂકવા તે માટે સર્વે પણ કરવામાં આવે છે.


પરંતુ આ સર્વે કાગળ સુધી સીમીત રહી જાય છે. કારણ કે, શહેરમાં ટ્રાફીકથી વ્યસ્ત મુખ્ય માર્ગો પર ગેપ મૂકવાનો આખરી નિર્ણય કમીટીનો  હોય  જંકશન ટુ જંકશન અને મેઇન રોડ ટુ ક્રોસીંગના માપદંડનો મનપાના સતાધીશોના ઇશારે ભંગ કરવામાં આવી રહ્યાનું પણ અતરંગ સૂત્રોએ જણાવ્યું છે. ત્યારે શહેરમાં વસતીની સાથે વાહન વિસ્ફોટ થતા ટ્રાફીકની સમસ્યાએ માઝા મૂકી છે. આમ છતાં સમયની સાથે પરિવર્તનરૂપ પગલાં લઇ ગેપ બુરી ટ્રાફીક સમસ્યા હળવી કરવાની તસ્દી મહાનગરપાલીકા દ્રારા લેવામાં આવી રહી નથી. જેના કારણે ટ્રાફીક સમસ્યાનો ભોગ શહેરીજનો બની રહ્યા છે. બીજી બાજુ શહેરમાં દિવસભર ટ્રાફીકથી ધમધમતા મુખ્ય માર્ગો પર ગેપ બુરવામાં મનપા દ્રારા ઇરાદાપૂર્વક આંખ આડા કાન કરવામાં આવી રહ્યા છે કે રાજકીય દબાણ કારણભૂત છે તે સવાલ શહેરીજનોમાં જોરશોરથી ઉઠ્યો છે.


લાલબંગલા સર્કલથી જી.જી.હોસ્પિટલ અને ઇન્દીરા માર્ગ પર ક્રોસીંગમાં માપદંડનું પાલન

શહેરમાં ટ્રાફીકથી ધમધમતા મુખ્ય માર્ગો પર જંકશન ટુ જંકશન અને મેઇન રોડ ટુ ક્રોસીંગ પર ગેપ મૂકવાનો માપદંડ છેે. ત્યારે જામનગરમાં લાલબંગલા સર્કલથી જી.જી.હોસ્પિટલ અને ઇન્દીરા માર્ગ પર ગેપ મૂકવામાં આ માપદંડનું પાલન કરવામાં આવ્યું છે. જયારે અન્ય મુખ્ય માર્ગોમાં ગેપ મૂકવાના આ નિયમનો ઉલાળીયો કરાયો છે. શહેરમાં પંચેશ્ર્વર ટાવરથી નીકલંઠ મહાદેવ મંદીર અને ટાઉનહોલ સર્કલથી લાલબંગલા સર્કલ સુધી ફકત એક ગેપ મૂકવામાં આવ્યો છે. જે માપદંડ અનુસાર યોગ્ય છે. તો અન્ય માર્ગો પર ગેપ મૂકવાના આ માપદંડનો અમલ શા માટે નહીં તે સવાલ શહેરીજનોમાં ઉઠ્યો છે.