રાજયના વાહન વ્યવહાર મંત્રી હર્ષ સંઘવીના હસ્તે સૌરાષ્ટ્ર્રના મુસાફરોને ત્રણ નવી સુવિધાની ભેટ મળશે, તેમના હસ્તે રાજકોટની નવ નિર્મિત એસટી ડિવિઝન ઓફિસનું લોકાર્પણ, ગોંડલના નવનિર્મિત વર્કશોપનું રાજકોટ ખાતેથી ઇ લોકાર્પણ તેમજ આઠ નવી વોલ્વો બસને લીલીઝંડી અપાશે.
આવતીકાલે તા.૪ના બપોરના ૧–૦૦ કલાકે વિભાગીય કચેરી, ગોંડલ રોડ, રાજકોટ ખાતે વાહન વ્યવહાર મંત્રી હર્ષભાઈ સંઘવીના હસ્તે રાજકોટ મુકામે ૧૪૩૧.૦૦ ચોરસ મીટર વિસ્તારમાં અંદાજીત .૬૩૭.૩૭ લાખના ખર્ચે આકાર પામેલ એસ.ટી.વિભાગીય કચેરી અને ગોંડલ મુકામે ૧૬૯૯૭ ચોરસ મીટર વિસ્તારમાં અંદાજીત ૩૪૩ લાખના ખર્ચે આકાર પામેલ ગોંડલ એસ.ટી. ડેપો વર્કશોપ તેમજ અધતન ટેકનોલોજીથી સ નવીન ૮ હાઈટેક વોલ્વો બસોનું લોકાર્પણ જિલ્લાના અન્ય મહાનુભવો તેમજ સંગઠનના પદાધિકારીઓની પ્રેરક ઉપસ્થિતિમાં કરવામાં આવશે.
નવી આઠ હાઇટેક વોલ્વો બસોની વિશેષતાઓમાં આરામદાયક ૨ બાય ૨ લેધર પુશબેક સીટ, સી.સી.ટી.વી. કેમેરા, મોબાઈલ ચાર્જીંગ ફેસીલીટી, ફાયરસેટી માટે અધતન સ્પ્રીંકલ સિસ્ટમ, સ્મોક ડીટેકટર અલાર્મ, એલ.ઈ.ડી. ટી.વી., એકઝોસ્ટ ફેન સાથે હેચ તેમજ ઇમરજન્સી એકઝીટ ડોર જેવી આધુનિક ટેકનોલોજી અને સુવિધાઓથી સ વોલ્વો બસો નાગરિકોની મુસાફરીને વધુ આરામદાયક બનાવશે તેમજ તેઓની જનસુખાકારીમાં વધારો થવા પામશે. ઉપરાંત રાજકોટ વિભાગીય કચેરી ખાતે કામકાજ અર્થે આવનાર જાહેર જનતા અને ગોંડલ એસ.ટી. ડેપો વર્કશોપ ખાતે કરવામાં આવતા નિગમની બસોના મેન્ટેનન્સની સુવિધામાં તેમજ બંને સ્થળે ફરજો બજાવતા કર્મચારીઓની સુવિધામાં વધારો થશે