સ્થાનિક સ્વરાજ્યની ચૂંટણીને લઈ ગુજરાત ભારતીય જનતા પાર્ટીએ સંગઠન સ્તરે મોટો નિર્ણય લેતા 'પ્રદેશ ચૂંટણી સમિતિ'ના સભ્યોના નામોની સત્તાવાર જાહેરાત કરી છે. પ્રદેશ પ્રમુખ જગદીશ વિશ્વકર્માએ રાષ્ટ્રીય નેતૃત્વ અને મોવડી મંડળ સાથે પરામર્શ કર્યા બાદ આ મહત્વની સમિતિની રચના કરી છે. આ સમિતિ આગામી ચૂંટણીલક્ષી નિર્ણયો અને ઉમેદવારોની પસંદગી પ્રક્રિયામાં મહત્વની ભૂમિકા ભજવશે.

મુખ્ય સભ્યો અને મહત્વના ચહેરાઓ

ચૂંટણી સમિતિમાં કુલ 13 મુખ્ય સભ્યોનો સમાવેશ કરવામાં આવ્યો છે, જેમાં રાજ્યના ટોચના નેતાઓનો સમાવેશ થાય છે

ભૂપેન્દ્રભાઈ પટેલ: મુખ્યમંત્રી, ગુજરાત

જગદીશ વિશ્વકર્મા: પ્રદેશ પ્રમુખ

હર્ષ સંઘવી: નાયબ મુખ્યમંત્રી

રત્નાકરજી: પ્રદેશ સંગઠન મહામંત્રી

આ ઉપરાંત, સમિતિમાં પૂર્વ નાયબ મુખ્યમંત્રી નીતિનભાઈ પટેલ, પૂર્વ મંત્રી ભૂપેન્દ્રસિંહ ચુડાસમા, રાજ્ય સરકારના મંત્રી ડો. પ્રદ્યુમનભાઈ વાજા, પૂર્વ કેન્દ્રીય મંત્રી દર્શનાબેન જરદોશ અને પૂર્વ મંત્રી બાબુભાઈ બોખીરીયા જેવા અનુભવી નેતાઓને સ્થાન આપીને સંતુલન જાળવવાનો પ્રયાસ કરવામાં આવ્યો છે.

વિશેષ અને આમંત્રિત સભ્યો

સમિતિમાં વિશેષ આમંત્રિત સભ્યો તરીકે કેન્દ્રીય મંત્રી સી.આર. પાટીલ, સાંસદ પરસોત્તમભાઈ રૂપાલા, પૂર્વ પ્રદેશ પ્રમુખ આર.સી. ફળદુ અને મંત્રી જીતુભાઈ વાઘાણીનો સમાવેશ કરાયો છે. આ સાથે જયશ્રીબેન પટેલ અને વર્ષાબેન દોશીને આમંત્રિત સભ્યો તરીકે જવાબદારી સોંપવામાં આવી છે.​​​​​​​

રાજકીય મહત્વ

આ જાહેરાત સાથે ભાજપે સ્થાનિક સ્વરાજ્યની ચૂંટણી માટેનો પોતાનો રોડમેપ તૈયાર હોવાનો સંકેત આપ્યો છે. સમિતિમાં સૌરાષ્ટ્ર, દક્ષિણ ગુજરાત અને ઉત્તર ગુજરાતના તમામ મહત્વના જિલ્લાઓ જેવા કે સુરત, રાજકોટ, મહેસાણા અને પોરબંદરના નેતાઓને પ્રતિનિધિત્વ આપવામાં આવ્યું છે. પ્રદેશ મહામંત્રી ડૉ. પ્રશાંત કોરાટની સહી સાથે બહાર પડેલી આ યાદી દર્શાવે છે કે પાર્ટી હવે આગામી ચૂંટણી મોડમાં આવી ગઈ છે.

જુઓ ક્યાં નેતાને ક્યાં જવાબદારી સોંપાઈ, આખી યાદી