શહેરમાં ટ્રાફિક બ્રાંચમાં ફરજ બજાવતા હેડ કોન્સ્ટેબલ મહેન્દ્રભાઈ પરમારનું આજરોજ હાર્ટ એટેકથી મૃત્યુ થતાં પોલીસ બેડામાં શોકની લાગણી ફેલાઈ જવા પામી હતી.
જાણવા મળતી વિગતો મુજબ, શહેરના રામાનાથપરા પોલીસ લાઈન ત્રણ માળીયા કવાર્ટર બી- 6 માં રહેતા અને ટ્રાફિક બ્રાન્ચમાં ફરજ બજાવતા હેડ કોન્સ્ટેબલ મહેન્દ્રભાઈ ડાયાભાઈ પરમાર(ઉ.વ 46) ને ગઈકાલ છાતીમાં દુ:ખાવો ઉપડતા તેમને સારવાર માટે પ્રથમ સિવિલ હોસ્પિટલમાં બાદમાં ખાનગી હોસ્પિટલમાં લઈ જવામાં આવ્યા હતા. જ્યાં ગઈકાલે બાયપાસ કરવામાં આવ્યું હતું.
આજે સવારે તેમણે દીકરાને હોસ્પિટલના રૂમમાંથી નીચે ચા લેવા માટે મોકલ્યો હતો એ પછી એકાએક બીજો હાર્ટ એટેકનો હુમલો આવી જતા આ હુમલો મહેન્દ્રભાઇ માટે જીવલેણ સાબિત થયો હતો. બનાવની જાણ થતા હોસ્પિટલ મારફત એ ડિવિઝનને જાણ કરવામાં આવી હતી. જેથી એ ડિવિઝન પોલીસે જરૂરી કાર્યવાહી કરી હતી.
મૂળ વઢવાણના વતની મહેન્દ્રભાઈ બે ભાઈ એક બહેનના પરિવારમાં મોટા હતા. તેમને સંતાનમાં બે પુત્રો છે. એક પુત્ર સરકારી નોકરીની તૈયારી કરે છે. મહેન્દ્રભાઈ 1998 માં પોલીસમાં ભરતી થયા હતા. તેમણે પોતાની 25 વર્ષની આ સર્વિસમાં પ્ર.નગર, માલવીયાનગર, એ.ડિવિઝન, આજીડેમ સહિતના પોલીસ સ્ટેશનમાં પ્રશંસનીય કામગીરી કરી હતી. હાલમાં તેઓ ટ્રાફિક બ્રાન્ચમાં ફરજ બજાવતા હતા.મળતાવળા અને હસમુખા સ્વભાવના મહેન્દ્રભાઈના મૃત્યુથી પોલીસ બેડામાં શોકની લાગણી ફેલાય જવા પામી છે.