આ વિવાદની શરૂઆત જૂન 2024માં અંગ્રેજી વિભાગના વડા પ્રોફેસર આદેશ પાલના નિવૃત્ત થયા બાદ થઈ હતી. તેમની નિવૃત્તિ પછી યુનિવર્સિટીએ કેમિસ્ટ્રી વિભાગના ફેકલ્ટી સભ્ય ડૉ. કોકિલાબેન પરમારને અંગ્રેજી વિભાગના ઇન્ચાર્જ એચઓડી તરીકે નિમ્યા હતા. આ નિર્ણય સામે અંગ્રેજી વિભાગની ફેકલ્ટી સભ્ય હેતલ પટેલે એજ્યુકેશન ટ્રિબ્યુનલમાં અરજી કરી હતી.

યુનિવર્સિટીના વકીલ મીત શાહે ટ્રિબ્યુનલમાં દલીલ કરી હતી કે અંગ્રેજી વિભાગમાં સિનિયોરિટી નક્કી થવાની બાકી છે અને ડૉ. પરમારને માત્ર પ્રશાસકીય જવાબદારી આપવામાં આવી છે. તેમણે એમ પણ કહ્યું હતું કે હેતલ પટેલની અરજી સર્વિસ મેટર નથી અને ટ્રિબ્યુનલને આ મામલો સાંભળવાનો અધિકાર નથી. તેમ છતાં, 10 ઓક્ટોબર 2025ના રોજ ટ્રિબ્યુનલએ કેમિસ્ટ્રીના પ્રોફેસરને અંગ્રેજી વિભાગના એચઓડી તરીકે નિમણૂક કરવાના નિર્ણય પર સ્ટે આપ્યો હતો.

આ પછી ડૉ. પરમારે ટ્રિબ્યુનલ દ્વારા સ્ટે આપવાના આદેશ સામે હાઈકોર્ટમાં અરજી કરી હતી, જેમાં તેમણે દલીલ કરી હતી કે ટ્રિબ્યુનલએ તેમને સાંભળ્યા વગર સ્ટે આપ્યો છે. યુનિવર્સિટીએ પણ હાઈકોર્ટમાં અરજી કરી અને ટ્રિબ્યુનલની અધિકારક્ષેત્ર પર સવાલ ઉઠાવ્યો.

મામલાની સુનાવણી દરમિયાન જસ્ટિસ નિરઝર દેસાઈએ યુનિવર્સિટીને સખત સવાલ કર્યો કે કેમિસ્ટ્રીના શિક્ષક કેવી રીતે અંગ્રેજી સાહિત્યના વિદ્યાર્થીઓની શૈક્ષણિક સમસ્યાઓ ઉકેલી શકે. યુનિવર્સિટી આ સવાલનો સંતોષકારક જવાબ આપી શકી નહોતી અને માત્ર એટલું જ જણાવ્યું કે ડૉ. પરમારની ભૂમિકા પ્રશાસકીય હતી. તેમ છતાં કોર્ટ સતત એ પ્રશ્ન પૂછતી રહી કે વિષયની જાણકારી વગરનો એચઓડી વિદ્યાર્થીને કેવી રીતે માર્ગદર્શન આપી શકે.

યુનિવર્સિટીએ અંગ્રેજી વિભાગના ફેકલ્ટી સભ્ય તપલ ચક્રવર્તીને ઇન્ચાર્જ એચઓડી બનાવવા માટેનો ડ્રાફ્ટ ઓર્ડર રજૂ કર્યો. યુનિવર્સિટીએ સ્પષ્ટતા કરી કે હાઈકોર્ટના સ્ટેના કારણે તે તરત બદલાવ કરી શકતી નથી. હેતલ પટેલે આ નવા નામ સામે પણ વાંધો ઉઠાવ્યો અને સિનિયોરિટી નિયમોની વાત કરી. અંતે, યુનિવર્સિટી અને ડૉ. પરમારે પોતાની અરજીઓ પાછી ખેંચી લીધી. હાઈકોર્ટે હેતલ પટેલને યોગ્ય સત્તાધિકારી સમક્ષ ફરી પડકાર આપવાની છૂટ આપી છે.