આપણે સૌ ભવિષ્યની અણધારી જરૂરિયાતોને પહોંચી વળવા માટે નાણાંની બચત કરીએ છીએ. આપણને લાગે છે કે ઘરમાં કે સામાન્ય બેંક ખાતામાં રાખેલા નાણાં સંપૂર્ણપણે સુરક્ષિત છે, પરંતુ આપણે એક બહુ મોટી વાસ્તવિકતાને અણદેખી કરી દઈએ છીએ અને તે છે મોંઘવારી (ઇન્ફ્લેશન). જે વસ્તુ આજે તમે 100 રૂપિયામાં ખરીદી રહ્યા છો, તે સમય જતાં વધુ મોંઘી થતી જાય છે. નાણાકીય નિષ્ણાતોના મતે, જો તમે આજે 1 લાખ રૂપિયા બચાવીને રાખો છો અને તેને ક્યાંય યોગ્ય જગ્યાએ રોકાણ કરતા નથી, તો 20 વર્ષ પછી તેની ખરીદશક્તિ અડધાથી પણ ઓછી થઈ જશે.

જો સરેરાશ વાર્ષિક મોંઘવારી દર 6 ટકા રહે, તો આજે રાખેલા 1 લાખ રૂપિયાની ખરીદશક્તિ (Purchasing Power) 20 વર્ષ પછી માત્ર 31000 રૂપિયા જેટલી જ રહી જશે. સરળ ભાષામાં કહીએ તો, જે સામાન કે સેવાઓ આજે તમે 1 લાખ રૂપિયામાં ખરીદી શકો છો, તે જ સામાન 20 વર્ષ પછી ખરીદવા માટે તમારે 3.21 લાખ રૂપિયા ખર્ચવા પડશે. રકમ કાગળ પર 1 લાખ જ દેખાશે, પરંતુ બજારમાં તેની વાસ્તવિક તાકાત ખતમ થઈ ચૂકી હશે.

આ બાબતને સામાન્ય ઘરખર્ચના ઉદાહરણથી સમજીએ. જો આજે તમારા ઘરનો માસિક ખર્ચ 50000 રૂપિયા હોય, તો 6 ટકા વાર્ષિક મોંઘવારી દરના હિસાબે 20 વર્ષ પછી એ જ લાઇફસ્ટાઇલ જાળવી રાખવા માટે દર મહિને આશરે 1.60 લાખ રૂપિયાની જરૂર પડશે. મોંઘવારી દરમાં માત્ર 1 થી 2 ટકાનો ફેરફાર પણ લાંબા ગાળે મોટો તફાવત ઊભો કરે છે. જો મોંઘવારી દર 8 ટકા સુધી પહોંચી જાય, તો 20 વર્ષ પછી 1 લાખ રૂપિયાનું મૂલ્ય ઘટીને માત્ર 21500 રૂપિયા રહી જશે અને તે સામાન ખરીદવા 4.66 લાખ રૂપિયા ચૂકવવા પડશે.

​​​​​​​તેથી, રિટાયરમેન્ટ કે ભવિષ્યનું પ્લાનિંગ કરતી વખતે માત્ર આજે નાણાં બચાવવા પૂરતા નથી. જો તમારી બચત પર મળતું રિટર્ન મોંઘવારી દર કરતાં ઓછું હોય, તો વાસ્તવમાં તમારા નાણાં વધી નથી રહ્યા પણ ઘટી રહ્યા છે. આ પરિસ્થિતિથી બચવા માટે નાણાં એવી જગ્યાએ રોકાણ કરવા જોઈએ જ્યાં મળતું રિટર્ન મોંઘવારી દરને માત આપી શકે.