અમેરિકાના રાષ્ટ્રપતિ ડોનાલ્ડ ટ્રમ્પે બુધવારે ભારત પર 26 ટકા ટેરિફ લાદવાની જાહેરાત કરી. ટ્રમ્પે કહ્યું કે ભારત અમેરિકા પર 52 ટકા સુધીનો ટેરિફ લાદે છે, તેથી અમેરિકા ભારત પર 26 ટકા ટેરિફ લાદશે. તેમણે કહ્યું કે તેઓ તમામ આયાતી ઉત્પાદનો પર દસ ટકા ટેરિફ લાદશે અને 60 દેશો પર વધારાના કર લાદશે. અમેરિકા દ્વારા ભારતીય ઉત્પાદનો પર પારસ્પરિક ટેરિફ લાદવાના કારણે, કૃષિ, ફાર્મા, રસાયણો, દવાઓ, તબીબી ઉપકરણો, ઇલેક્ટ્રિકલ અને મશીનરી સહિત અનેક મુખ્ય ક્ષેત્રોના માલને અસર થઈ શકે છે.

નિષ્ણાતો કહે છે કે આ ક્ષેત્રોમાં ડ્યુટી તફાવત ખૂબ વધારે છે, જેના કારણે યુએસ વહીવટીતંત્ર પણ તે જ દરે વધારાની આયાત ડ્યુટી લાદી શકે છે. ટેરિફ તફાવત જેટલો ઊંચો હશે, તેટલો જ આ ક્ષેત્રને વધુ અસર થશે.

આર્થિક સંશોધન સંસ્થા ગ્લોબલ ટ્રેડ રિસર્ચ ઇનિશિયેટિવના વિશ્લેષણ મુજબ, કૃષિ ક્ષેત્રોમાં સૌથી વધુ અસર માછલી, માંસ અને પ્રોસેસ્ડ સીફૂડ પર થશે. ૨૦૨૪માં તેની નિકાસ ૨.૫૮ અબજ યુએસ ડોલરની હતી અને તેને ૨૭.૮૩ ટકાના ડ્યુટી તફાવતનો સામનો કરવો પડશે. અમેરિકાની મુખ્ય નિકાસ ઝીંગા, અમેરિકા દ્વારા લાદવામાં આવેલા ટેરિફથી નોંધપાત્ર રીતે ઓછી સ્પર્ધાત્મક બનશે.

એવું માનવામાં આવે છે કે નવા ટેરિફની સૌથી વધુ અસર ચોક્કસ દેશો પર પડશે. યુએસ ટ્રેડ રિપ્રેઝન્ટેટિવના કાર્યાલયે 21 દેશોની યાદી બહાર પાડી છે જેની સાથે અમેરિકાનો વેપાર સંતુલિત નથી. આ દેશો આર્જેન્ટિના, ઓસ્ટ્રેલિયા, બ્રાઝિલ, કેનેડા, ચીન, યુરોપિયન યુનિયન, ભારત, ઇન્ડોનેશિયા, જાપાન, દક્ષિણ કોરિયા, મલેશિયા, મેક્સિકો, રશિયા, સાઉદી અરેબિયા, દક્ષિણ આફ્રિકા, સ્વિટ્ઝર્લૅન્ડ, તાઇવાન, થાઇલેન્ડ, તુર્કી, બ્રિટન અને વિયેતનામ છે.

અર્થતંત્ર પર સંભવિત અસર

૧. નિકાસમાં ઘટાડો: ટેરિફ વધવાથી ભારતીય કંપનીઓ માટે અમેરિકામાં માલ મોકલવાનો ખર્ચ વધુ થશે, જેના કારણે તેમની માંગ ઘટી શકે છે.

2. ચલણ અસ્થિરતા: અમેરિકા સાથે વધતા વેપાર તણાવથી ભારતીય રૂપિયો નબળો પડી શકે છે, જેનાથી આયાત મોંઘી થઈ શકે છે અને ફુગાવો વધી શકે છે.

3. રોકાણમાં ઘટાડો: વધતા વેપાર તણાવને કારણે, વૈશ્વિક રોકાણકારો ભારતમાં રોકાણ કરવાનું ટાળી શકે છે, જેની અસર ભારતીય શેરબજાર પર પડી શકે છે.

4. ટ્રેડ વોરનો ખતરો: નિષ્ણાતોએ ચેતવણી આપી છે કે જો વૈશ્વિક વેપાર યુદ્ધ ફાટી નીકળશે, તો તે ભારતીય અર્થતંત્રમાં અસ્થિરતા વધારી શકે છે.

ભારત કોઈપણ પરિસ્થિતિનો સામનો કરવા સક્ષમ

નિષ્ણાતોનો અંદાજ છે કે ભારત વિકસિત અને ઉભરતા G-20 દેશોમાં સૌથી ઝડપથી વિકસતું અર્થતંત્ર રહેશે. એક નવા અહેવાલ મુજબ, ભારતની યુએસ બજાર પર ઓછી નિકાસ નિર્ભરતા (GDPના માત્ર 2 ટકા) તેને સંભવિત પ્રતિકૂળ અસરોનો સામનો કરવા સક્ષમ બનાવે છે. રેટિંગ એજન્સીઓએ નાણાકીય વર્ષ 2025-26 માટે 6.5 ટકાના વિકાસ દરનો અંદાજ પણ લગાવ્યો છે, જે અન્ય દેશોની તુલનામાં સૌથી વધુ છે.

નિકાસ બજારો પર ધ્યાન કેન્દ્રિત કરવું પડશે

જોકે, નિષ્ણાતો એમ પણ કહે છે કે આ બધા છતાં, ભારતે આ કટોકટીને દૂર કરવા માટે કેટલીક વ્યૂહરચના બનાવવી પડશે. તેવી જ રીતે અન્ય નિકાસ બજારો પર પણ ધ્યાન આપવું પડશે. યુરોપ, આફ્રિકા અને એશિયન દેશો સાથે વેપાર વધારવા પર પણ ભાર મૂકવો. સ્થાનિક ઉદ્યોગોને સબસિડી અને કર રાહત આપવી પડશે જેથી તેઓ નવા ટેરિફની અસરનો સામનો કરી શકે

સૌથી વધુ અસર આ સેક્ટરમાં થઇ શકે સેક્ટર ટેરિફ તફાવત વાર્ષિક ટર્નઓવર

- ઇલેક્ટ્રોનિક્સ અને ટેલિકોમ ૭.૨૪% ૧૪.૩૯ બિલિયન ડોલર

- ફાર્મા ઉત્પાદનો ૧૦.૯૦% ૧૨.૭૨ બિલિયન ડોલર

- સોનું, ચાંદી અને ઝવેરાત ૩.૩૨% ૧.૮૮ બિલિયન ડોલર

- મશીનરી અને કમ્પ્યુટર્સ ૫.૨૯% ૭.૧૦ બિલિયન ડોલર

- રસાયણો (ફાર્મા સિવાય) 6.05% 5.71 બિલિયન ડોલર

- કાપડ, યાર્ન અને કાર્પેટ ૬.૫૯% ૨.૭૬ બિલિયન ડોલર

- માછલી, માંસ અને સીફૂડ ૨૭.૮૩% ૨.૫૮ બિલિયન ડોલર

- અનાજ, શાકભાજી અને મસાલા ૫.૭૨% ૧.૯૧ બિલિયન ડોલર

- સિરામિક્સ અને કાચ ૮.૨૭% ૧.૭૧ બિલિયન ડોલર

- રબર ઉત્પાદનો ૭.૭૬% ૧.૦૬ બિલિયન ડોલર

- પ્રોસેસ્ડ ફૂડ્સ, ખાંડ અને કોકો ૨૪.૯૯% ૧.૦૩ બિલિયન ડોલર

-ડેરી ઉત્પાદનો ૩૮.૨૩% ૧૮૧.૪૯ મિલિયન ડોલર