કેન્દ્ર સરકારે 17 ડિસેમ્બર, 2025ના રોજ એક નોટિસ જારી કરીને બાંગ્લાદેશની રાજધાની ઢાકામાં ભારતીય વિઝા એપ્લિકેશન સેન્ટર (આઈવીએસી) બંધ કરી દીધું છે. ઉગ્રવાદી તત્વો તરફથી ધમકીઓ અને બાંગ્લાદેશી નેતાઓ દ્વારા ઉશ્કેરણીજનક ટિપ્પણીઓ સહિત વધતી જતી સુરક્ષા ચિંતાઓ વચ્ચે આ નિર્ણય લેવામાં આવ્યો હતો.

આઈવીએસીનું મુખ્ય કેન્દ્ર ઢાકાના જમુના ફ્યુચર પાર્કમાં આવેલું છે. સેન્ટરે એક નોટિસ જારી કરીને જણાવ્યું હતું કે વર્તમાન સુરક્ષા પરિસ્થિતિને કારણે તે બપોરે બે વાગ્યાથી બંધ રહેશે. આનાથી અગાઉની એપોઇન્ટમેન્ટ ધરાવતા અરજદારોને પણ અસર થઈ છે. બાંગ્લાદેશમાં ભારતના કુલ 16 વિઝા સેન્ટોરો છે, જે દર વર્ષે આશરે 2.2 મિલિયન અરજીઓ પર પ્રક્રિયા કરે છે.

ભારતે બાંગ્લાદેશના હાઈ કમિશનર મુહમ્મદ રિયાઝ હમીદુલ્લાહને બોલાવ્યા બાદ કેન્દ્ર સરકારે આ પગલું ભર્યું છે. ભારતે ઢાકામાં ભારતીય હાઈ કમિશનની સુરક્ષા અંગે ગંભીર ચિંતા વ્યક્ત કરી હતી. વિદેશ મંત્રાલયે જણાવ્યું હતું કે કેટલાક ઉગ્રવાદી તત્વોએ ભારતીય મિશનની આસપાસ સુરક્ષા પરિસ્થિતિને ખલેલ પહોંચાડવાની યોજના બનાવી છે. ભારત બાંગ્લાદેશમાં અસ્થિરતા પેદા કરવાનો પ્રયાસ કરી રહ્યા હોવાના આરોપોને સખત રીતે નકારી કાઢે છે.

હકિકતમાં, બાંગ્લાદેશની રાષ્ટ્રીય નાગરિક પાર્ટીના નેતા હસનત અબ્દુલ્લાએ ભારતને ખુલ્લી ધમકી આપી હતી. 15 ડિસેમ્બરના રોજ એક રેલીમાં તેમણે જાહેર કર્યું હતું કે જો બાંગ્લાદેશ અસ્થિર થશે, તો પ્રતિકારની આગ સરહદ પાર ફેલાશે. તેમણે ભારતના ઉત્તરપૂર્વીય રાજ્યો (સેવન સિસ્ટર્સ)ને અલગ કરવાની અને અલગતાવાદીઓને આશ્રય આપવાની ધમકી આપી હતી.

બાંગ્લાદેશે ભારતીય હાઈ કમિશનરને સમન્સ પાઠવ્યું છે અને ભૂતપૂર્વ વડાપ્રધાન શેખ હસીનાના પ્રત્યાર્પણની માંગણીનો પુનરોચ્ચાર કર્યો છે, જે ગયા વર્ષે ઓગસ્ટમાં તેમની હકાલપટ્ટી બાદ ભારતમાં છે. મુહમ્મદ યુનુસની વચગાળાની સરકારના સમયથી ભારત-બાંગ્લાદેશ સંબંધો તણાવપૂર્ણ રહ્યા છે. ભારતે સ્પષ્ટપણે કહ્યું છે કે તે બાંગ્લાદેશના લોકો સાથે મિત્રતા ઇચ્છે છે, પરંતુ તેની સુરક્ષા અને મિશનના રક્ષણ માટે જરૂરી પગલાં લેશે.