સાનોથી રમાયેલી વરસાદથી પ્રભાવિત ટી-20 આંતરરાષ્ટ્રીય મેચમાં ભારતે જાપાનને માત્ર 2 રને હરાવીને મોટો ઇતિહાસ રચ્યો છે. આ જીત સાથે ભારત ટી-20 આંતરરાષ્ટ્રીય ક્રિકેટમાં 200 જીત નોંધાવનારી વિશ્વની પ્રથમ ટીમ બની ગઈ છે. આ આંકડામાં સુપર ઓવરમાં મળેલી જીતનો પણ સમાવેશ થાય છે.

ભારતે 2006માં દક્ષિણ આફ્રિકા સામે જોહાનિસબર્ગમાં પોતાની પ્રથમ ટી-20 આંતરરાષ્ટ્રીય જીત મેળવી હતી. ત્યારબાદ ભારતે 50, 100 અને 150 જીતના મુકામ પાર કર્યા અને હવે 200 જીતનો આંકડો પણ હાંસલ કર્યો છે. ભારતને પ્રથમ 50 જીત મેળવવા માટે 83 મેચ રમવી પડી હતી. ત્યારબાદ 51થી 100 જીત માટે 72, 101થી 150 જીત માટે 70 અને 151થી 200 જીત માટે માત્ર 66 મેચ લાગી હતી.

ભારતની પ્રથમ ટી-20 જીત દક્ષિણ આફ્રિકા સામે 2006માં 6 વિકેટે થઈ હતી. 50મી જીત 2017માં શ્રીલંકા સામે 7 વિકેટે, 100મી જીત 2022માં વેસ્ટ ઈન્ડિઝ સામે 8 રને અને 150મી જીત 2024માં ઓસ્ટ્રેલિયા સામે 24 રને મળી હતી. હવે 2026માં જાપાન સામે 2 રનની જીત ભારતની 200મી જીત બની છે.

જાપાન સામે અભિષેક શર્મા પ્રથમ જ બોલે આઉટ થયો હતો. આ સાથે 2026માં તેના ટી-20 આંતરરાષ્ટ્રીયમાં 7 ડક એટલે કે શૂન્ય પર આઉટ થવાનો આંકડો થયો છે. એક કેલેન્ડર વર્ષમાં ટી-20માં સૌથી વધુ ડકના મામલે તે 7 ડક સાથે સંયુક્ત રીતે ટોચના સ્થાને પહોંચી ગયો છે.

અભિષેક આ વર્ષે ટી-20માં પ્રથમ બોલ પર પાંચ વખત આઉટ પણ થયો છે. એક કેલેન્ડર વર્ષમાં પ્રથમ જ બોલે પાંચ વખત આઉટ થવાનો આ આંકડો પણ સંયુક્ત રીતે સૌથી વધુ છે.
જો તમામ ટી-20 મેચની વાત કરવામાં આવે તો અભિષેક 2026માં અત્યાર સુધીમાં 10 વખત શૂન્ય પર આઉટ થયો છે. આ એક કેલેન્ડર વર્ષમાં કોઈ બેટરના સૌથી વધુ ટી-20 ડકનો રેકોર્ડ છે.
જાપાન સામે ભારતના ટોચના ત્રણ બેટરોનો કુલ સ્કોર માત્ર 12 રન રહ્યો હતો. એસોસિએટ ટીમ સામે ટી-20માં ભારતના ટોપ-3નો આ સૌથી ઓછો સંયુક્ત સ્કોર છે.

વરસાદના કારણે મેચને 5-5 ઓવરની કરવામાં આવી હતી. ભારતે 5 ઓવરમાં 4 વિકેટે 32 રન બનાવ્યા હતા. જવાબમાં જાપાને 5 ઓવરમાં 3 વિકેટે 30 રન બનાવ્યા હતા. અંતે ભારતે માત્ર 2 રને મેચ જીતીને મોટો ઉલટફેર થતાં બચાવ કર્યો.