ભારત સરકારે આર્મ્સ એજન્ટ સંજય ભંડારીના પ્રત્યાર્પણ કેસમાં લંડન હાઈકોર્ટમાં અપીલ દાખલ કરવાની પરવાનગી માંગી છે જેથી તેમને કરચોરી અને મની લોન્ડરિંગના આરોપોનો સામનો કરવા માટે ભારત લાવી શકાય. હાઈકોર્ટે માનવાધિકારનો હવાલો આપીને ભંડારીના પ્રત્યાર્પણની પ્રક્રિયા રદ કરી હતી.

ભારત સરકારે સંજય ભંડારીના પ્રત્યાર્પણ કેસમાં અપીલ દાખલ કરવા માટે લંડન હાઈકોર્ટ પાસેથી પરવાનગી માંગી છે. સંરક્ષણ ક્ષેત્રના સલાહકાર ભંડારીને નવી દિલ્હી લાવવાના પ્રયાસો કરવામાં આવી રહ્યા છે. જેથી તેઓ કરચોરી અને મની લોન્ડરિંગ કેસમાં ટ્રાયલનો સામનો કરી શકે. આ મામલા સાથે ગાઢ રીતે સંકળાયેલા સરકારી અધિકારીઓના મતે, આ અઠવાડિયે આ મામલે લેવાયેલું આ પહેલું પગલું છે. ભારત સરકારે લંડન હાઈકોર્ટમાં અપીલ દાખલ કરી છે, જેમાં માંગ કરવામાં આવી છે કે આ કેસમાં મુદ્દાઓ ફક્ત કાનૂની જ નહીં પરંતુ જાહેર મહત્વના છે. જો હાઈકોર્ટ આ અપીલ સ્વીકારે તો કેસ બ્રિટનની સુપ્રીમ કોર્ટમાં જઈ શકે છે અને ત્યાં તેની સુનાવણી થઈ શકે છે.

યુકે કોર્ટના એક અધિકારીએ પણ પુષ્ટિ આપી છે કે ભારત સરકારે જાહેર મહત્વના બે કાનૂની મુદ્દાઓની પુષ્ટિ કરવા અને સુપ્રીમ કોર્ટમાં અપીલ દાખલ કરવાની પરવાનગી મેળવવા માટે અરજી કરી છે.આરોપોમાં જણાવાયું છે કે વર્ષ 2012થી 2013 અને 2015થી 2016 દરમિયાન ભારતીય નાગરિક ભંડારીએ જાહેર કર્યું હતું કે તેમની પાસે રૂ. 731 કરોડની વિદેશી સંપત્તિ એકઠી કરવા છતાં તેમની પાસે કોઈ વિદેશી સંપત્તિ નથી. હાઈકોર્ટના એક અધિકારીએ જણાવ્યું હતું કે, ભારત સરકાર દ્વારા જાહેર મહત્વના કાયદાના બે મુદ્દાઓને પ્રમાણિત કરવા અને તે બે પ્રશ્નોના સંદર્ભમાં સુપ્રીમ કોર્ટમાં અપીલ કરવાની પરવાનગી આપવા માટે અરજી દાખલ કરવામાં આવી હતી.

ભારતીય અધિકારીઓ લંડનમાં રહેતા સંરક્ષણ મધ્યસ્થી ભંડારી (62)ને લોન્ડરિંગ અને ભારતમાં ઇરાદાપૂર્વક કરચોરી કરવાના ગુનાહિત આરોપોનો સામનો કરવા માટે પ્રત્યાર્પણ કરવા માંગે છે, તેમના ભારતીય આવકવેરા રિટર્નમાં વિદેશી સંપત્તિ અને વિદેશી આવક જાહેર ન કરીને તેમણે દાવો કર્યો હતો કે તેણે કાળા નાણાં કાયદાની કલમ 51ની વિરુદ્ધ રૂ. 197 કરોડની કરચોરી કરી છે.

લંડન હાઈકોર્ટના ન્યાયાધીશ જસ્ટિસ ટિમોથી હોલરોયડ અને જસ્ટિસ કરેન સ્ટેઈને 28 ફેબ્રુઆરીએ સંજય ભંડારીના પ્રત્યાર્પણના આદેશને રદ કર્યો હતો. કોર્ટે કહ્યું હતું કે, જો તેને તિહાર જેલમાં રાખવામાં આવશે તો તેના જીવને જોખમ થઈ શકે છે. કોર્ટે માનવ અધિકારોના આધારે આ નિર્ણય આપ્યો હતો. નવેમ્બર 2022માં, યુકેના તત્કાલીન ગૃહમંત્રી સુએલા બ્રેવરમેને સંજય ભંડારીને ભારત પ્રત્યાર્પણ કરવાનો આદેશ જારી કર્યો હતો. આ આદેશને વેસ્ટમિન્સ્ટર મેજિસ્ટ્રેટ કોર્ટે મંજૂરી આપી હતી. પરંતુ હાઈકોર્ટે માનવ અધિકારોના આધારે તેને રદ કરી દીધું હતું.

કોર્ટે કહ્યું હતું કે, જો સંજય ભંડારીને તિહાર જેલમાં મોકલવામાં આવે તો ત્યાંના અન્ય કેદીઓ અને જેલ અધિકારીઓ દ્વારા તેમને હેરાન કરવામાં આવી શકે છે અથવા તેમના પર હુમલો કરવામાં આવી શકે છે. કોર્ટે એમ પણ કહ્યું હતું કે, ભંડારીના પ્રત્યાર્પણની પ્રક્રિયા યુરોપિયન કન્વેન્શન ઓન હ્યુમન રાઇટ્સનાં આર્ટિકલ 3ની વિરુદ્ધ છે, જે તેમને શારીરિક ઉત્પીડનથી રક્ષણ આપે છે. વધુમાં, કોર્ટે ઠેરવ્યું કે, ભંડારીને કલમ 6 હેઠળ જણાવેલ ન્યાય અને ન્યાયનો અધિકાર છે.