અમેરિકા અને ઈરાન વચ્ચે વધી રહેલા તણાવને કારણે વિશ્વભરના બજારોમાં એવી અસ્થિરતા સર્જાઈ છે કે તેની અસર સ્થાનિક શેરબજાર પર પણ જોવા મળી છે. સેન્સેક્સ ૯૭૨ પોઈન્ટ તૂટ્યો હતો અને 72,923ના સ્તર પર ટ્રેડ થયો હતો જ્યારે નિફ્ટી ૩૦૬ પોઈન્ટ ડાઉન થઇ ૨૨,૯૦૦ની સપાટીથી નીચે સરકી ગયો હતો. આ કડાકાને કારણે રોકાણકારોના રૂ. 6 લાખ કરોડથી વધુ ડૂબી ગયા છે.

અમેરિકાના રાષ્ટ્રપતિ ડોનાલ્ડ ટ્રમ્પે ઈરાનના સાત દિવસના યુદ્ધવિરામના પ્રસ્તાવને ફગાવી દીધો છે. તેમણે તેમના સહયોગીઓ સમક્ષ એવો મત વ્યક્ત કર્યો છે કે નવેમ્બરમાં યોજાનારી મિડટર્મ ચૂંટણી બાદ ઈરાન પર અમેરિકા દ્વારા બોમ્બમારો ફરી શરૂ કરવામાં આવશે. આનાથી વૈશ્વિક સ્તરે અસ્થિરતા સર્જાઈ છે.

અમેરિકા અને ઈરાન વચ્ચે શાંતિની આશાઓ ધૂંધળી થઈ ગઈ છે, જેના કારણે ક્રૂડ ઓઈલના ભાવમાં ઉછાળો આવ્યો છે અને બજારમાં હલચલ મચી ગઈ છે. વૈશ્વિક ઓઈલ બેન્ચમાર્ક, બ્રેન્ટ ક્રૂડ, ૯૮ ડોલરની સપાટીને પાર કરી ગયું છે.

યુએસ 10-વર્ષીય બોન્ડની યીલ્ડમાં મોટો ઉછાળો આવ્યો છે અને તે 5 ટકાથી ઉપર જળવાઈ રહી છે, જેના કારણે શેરબજારના સેન્ટિમેન્ટ (મનોભાવ) પર નકારાત્મક અસર પડી છે.

હાલમાં, તમામ ક્ષેત્રોના નિફ્ટી સૂચકાંકો ઘટાડા સાથે (રેડ ઝોનમાં) કારોબાર કરી રહ્યા છે, પરંતુ બેન્કિંગ શેરોમાં થયેલી વેચવાલીએ બજારને નોંધપાત્ર રીતે નીચે ખેંચ્યું છે. જાહેર અને ખાનગી ક્ષેત્રની બેંકોના નિફ્ટી સૂચકાંકોમાં લગભગ 1.5 ટકાનો ઘટાડો થયો છે. મેટલ અને રિયલ્ટી ક્ષેત્રોએ પણ આ ઘટાડામાં ફાળો આપ્યો છે, કારણ કે તેમના સંબંધિત નિફ્ટી સૂચકાંકોમાં પણ 1.5 ટકાથી વધુનો ઘટાડો જોવા મળ્યો છે.​​​​​​​

લાર્જ કેપથી લઈને સ્મોલકેપ સુધી તમામ શેરો રેડ ઝોનમાં

બજારમાં પ્રવર્તેલી આ મંદીને કારણે લાર્જ કેપથી લઈને સ્મોલકેપ સુધીના તમામ શેરો રેડ ઝોનમાં જોવા મળ્યા હતા. બીએસઈના લાર્જ કેપ સેગમેન્ટના તમામ 30 શેરો રેડ ઝોનમાં ટ્રેડ થઈ રહ્યા હતા. ખાસ કરીને એચડીએફસી બેંક (1.90 ટકા), કોટક બેંક (1.80 ટકા), એસબીઆઈ (1.60 ટકા), એચયુએલ (1.58 ટકા), ટ્રેન્ટ (1.56 ટકા), બજાજ ફાઇનાન્સ (1.40 ટકા), રિલાયન્સ (1.35 ટકા) અને આઈસીઆઈસીઆઈ બેંક (1.34 ટકા) ના શેરોમાં ભારે ઘટાડો નોંધાયો હતો. બેંકિંગ ઇન્ડેક્સ 1.60 ટકા અને આઈટી ઇન્ડેક્સ 1.10 ટકા ગગડ્યા હતા.