ઈરાન અને ઈઝરાયલ વચ્ચે ચાલી રહેલ ભીષણ સંઘર્ષ હાલમાં કોઈ સંજોગોમાં બંધ થવાની શક્યતા દેખાતી નથી.અહેવાલ છે કે ઈરાને યુદ્ધવિરામ પર વાત કરવાનો સ્પષ્ટ ઇનકાર કર્યો છે. જો કે, તેના વિશે સત્તાવાર રીતે કંઈ કહેવામાં આવ્યું નથી. છેલ્લા ત્રણ દિવસથી બંને દેશો વચ્ચે શ્રેણીબદ્ધ હુમલાઓ ચાલી રહ્યા છે. દરમિયાન, અમેરિકા પણ સંઘર્ષમાં ઇઝરાયલ સાથે ઉભું જોવા મળી રહ્યું છે.રોઇટર્સના અહેવાલ મુજબ, ઈરાને મધ્યસ્થી દેશો કતાર અને ઓમાનને કહ્યું છે કે તે ઇઝરાયલી હુમલાઓ વચ્ચે યુદ્ધવિરામ કરાર કરશે નહીં. એક અધિકારીએ નામ ન આપવાની શરતે એજન્સીને જણાવ્યું હતું કે, 'ઈરાને મધ્યસ્થી કતાર અને ઓમાનને જાણ કરી છે કે તે હુમલાઓનો જવાબ આપ્યા પછી જ કરાર વિશે ગંભીરતાથી વાત કરશે.શુક્રવારે ઈઝરાયલે ઈરાન પર હુમલો કર્યો, જેમાં તેના ટોચના લશ્કરી અધિકારી માર્યા ગયા અને પરમાણુ સ્થાપનોને ભારે નુકસાન થયું. ત્યારથી જ ઈરાને ઈઝરાયલને કડક જવાબ આપવાની પણ પ્રતિજ્ઞા લીધી છે.

ટ્રમ્પએ વીટો પાવર વાપર્યો

ઈરાનના સર્વોચ્ચ નેતા આયાતુલ્લાહ અલી ખામેનીની હત્યા અંગે ઈઝરાયલ દ્વારા અમેરિકા સમક્ષ રજૂ કરાયેલી યોજનાને અમેરિકન રાષ્ટ્રપતિ ડોનાલ્ડ ટ્રમ્પે વીટો કર્યો. એક અમેરિકન અધિકારીએ આ માહિતી આપી હતી. ઈઝરાયલે તાજેતરના દિવસોમાં ટ્રમ્પ વહીવટીતંત્રને જાણ કરી હતી કે તેણે ખામેનીને મારવા માટે એક વિશ્વસનીય યોજના વિકસાવી છે.નામ ન આપવાની શરતે અધિકારીએ જણાવ્યું હતું કે યોજનાની જાણ થયા પછી, વ્હાઇટ હાઉસ (અમેરિકન રાષ્ટ્રપતિનું સત્તાવાર નિવાસસ્થાન અને કાર્યાલય) એ ઇઝરાયલી અધિકારીઓને સ્પષ્ટ કરી દીધું હતું કે ટ્રમ્પ ઇઝરાયલ દ્વારા આ પગલું ભરવાની વિરુદ્ધ છે.ટ્રમ્પ વહીવટીતંત્ર ઇરાનના પરમાણુ કાર્યક્રમને નષ્ટ કરવાના હેતુથી ઇઝરાયલના લશ્કરી અભિયાનને વધુ વ્યાપક સંઘર્ષમાં ફેરવાતા અટકાવવા માંગે છે અને ખામેનીને મારવાની યોજનાને એક એવા પગલા તરીકે જુએ છે જે સંઘર્ષને વધુ ભડકાવશે અને સંભવિત રીતે આ ક્ષેત્રને અસ્થિર બનાવશે.

ઇરાનના સુપ્રીમ લીડર ખામનેઈ પરિવાર સહીત બંકરમાં છુપાયા

ઇઝરાયલ-ઈરાન સંઘર્ષ ઇઝરાયલી ઇઝરાયલી હુમલામાં ઇસ્લામિક રિવોલ્યુશનરી ગાર્ડ કોર્પ્સ ગુપ્તચર વડા બ્રિગેડિયર જનરલ મોહમ્મદ કાઝમી અને તેમના ડેપ્યુટી હસન મોહક્કીક માર્યા ગયા હતા. હુમલાઓ વધવાની ભીતિથી ઇરાનના સુપ્રીમ લીડર આયાતુલ્લા અલી ખામનેઈને તેહરાનમાં ભૂગર્ભ બંકરમાં લઈ જવામાં આવ્યા હતા. અહેવાલો અનુસાર, ઇઝરાયલે પહેલી રાત્રે ખામનેઈને નિશાન બનાવ્યા ન હતા કે જેથી તેમને યુરેનિયમ સંવર્ધન યોજના છોડી દેવાની તક મળી શકે. ઈરાનની રાજ્ય સમાચાર એજન્સી તસ્નીમ ન્યૂઝના અહેવાલ અનુસાર તેહરાનમાં થયેલા આ હુમલામાં ઇસ્લામિક રિવોલ્યુશનરી ગાર્ડ કોર્પ્સના ત્રીજા ગુપ્તચર અધિકારી મોહસીન બાઘેરીનું પણ મોત થયું છે. આ હુમલાથી ઈરાનના લશ્કરી માળખાને ભારે ફટકો પડ્યો છે અને દેશની ગુપ્તચર વ્યવસ્થા પણ તેનાથી ખરાબ રીતે પ્રભાવિત થઈ છે.આ દરમિયાન, ઈઝરાયલી હુમલા શરૂ થયાના થોડા કલાકો પછી, ઈરાનના સર્વોચ્ચ નેતા આયાતુલ્લાહ અલી ખામનેઈને તેહરાનના ઉત્તર-પૂર્વમાં લાવિઝાનમાં એક ભૂગર્ભ બંકરમાં લઈ જવામાં આવ્યા છે.ટાઈમ્સ ઓફ ઈઝરાયલ અનુસાર, એપ્રિલ 2024 અને ઓક્ટોબરમાં ઈરાનના ઈઝરાયલ પરના હુમલા દરમિયાન ખામનેઈએ આ બંકરમાં આશરો લીધો હતો

નેતન્યાહૂના પુત્રના લગ્ન મુલતવી રાખવા પડ્યા

ઈરાન સાથે ચાલી રહેલા યુદ્ધની અસર ઈઝરાયલી પીએમ બેન્જામિન નેતન્યાહૂના ઘર પર પણ પડી છે. ઈરાનના મિસાઈલ હુમલાને ધ્યાનમાં રાખીને બેન્જામિન નેતન્યાહૂના પુત્રના લગ્ન મુલતવી રાખવામાં આવ્યા છે. બેન્જામિન નેતન્યાહૂના પુત્ર અવનર નેતન્યાહૂ સોમવારે તેમના જીવનસાથી અમિત યાર્ડેની સાથે લગ્ન કરવાના હતા. લગ્નના ચાર દિવસ પહેલા શુક્રવારે ઈઝરાયલે ઈરાન પર હુમલો કર્યો હતો, ત્યારબાદ ઈરાને પણ ઈઝરાયલ પર મિસાઈલ છોડવાનું શરૂ કર્યું હતું. ઈરાનના હુમલા પછી, મોટી સંખ્યામાં લોકોને ઈઝરાયલના મુખ્ય શહેરોમાં બંકરોમાં આશરો લેવો પડ્યો છે. આને ધ્યાનમાં રાખીને, લગ્ન મુલતવી રાખવામાં આવ્યા છે.અહેવાલ મુજબ, ઈરાન સાથેના સંઘર્ષ પહેલા પણ કેટલાક લોકો નેતન્યાહૂના પુત્રના લગ્નનો વિરોધ કરી રહ્યા હતા. તેઓએ કહ્યું કે ઈઝરાયલી બંધકો હજુ પણ ગાઝામાં છે. આવી સ્થિતિમાં, નેતન્યાહૂ પરિવારે ઉજવણી ન કરવી જોઈએ. જોકે નેતન્યાહૂ પરિવાર આ વાતને અવગણીને લગ્નની તૈયારી કરી રહ્યો હતો, પરંતુ આ સમય દરમિયાન, ઈરાન સાથે યુદ્ધ શરૂ થવાને કારણે, સમગ્ર ઇઝરાયલમાં કટોકટી જેવી સ્થિતિ ઊભી થઈ. આ પછી, નેતન્યાહૂએ લગ્ન મુલતવી રાખવાનો નિર્ણય લીધો.ઇઝરાયલી પોલીસે અનવરના લગ્ન સ્થળની ૧૦૦ મીટરની ત્રિજ્યામાં લોખંડના અવરોધો અને કાંટાળા તારનો વાડ લગાવી દીધો હતો. પોલીસે જાહેરાત કરી હતી કે પોલીસ હેલિકોપ્ટર સિવાય સ્થળની ૧.૫ કિલોમીટરની ત્રિજ્યામાં કોઈને પણ હવાઈ ક્ષેત્રમાં પ્રવેશવાની મંજૂરી આપવામાં આવશે નહીં. જોકે, હવે લગ્ન મુલતવી રાખવાનો છેલ્લી ઘડીનો નિર્ણય લેવામાં આવ્યો છે.

ઈરાન ટ્રમ્પને મારવા માંગે છે: નેતન્યાહૂનો દાવો

ઈઝરાયલી પીએમ બેન્જામિન નેતન્યાહૂએ દાવો કર્યો હતો કે ઈરાનના ઈસ્લામિક શાસને અમેરિકન રાષ્ટ્રપતિ ડોનાલ્ડ ટ્રમ્પને તેના પરમાણુ કાર્યક્રમ માટે ખતરો માન્યો હતો અને તેમની હત્યા કરવાનો પ્રયાસ કર્યો હતો. પીએમ નેતન્યાહૂએ કહ્યું હતું કે ઈરાન ટ્રમ્પને મારવા માંગે છે. તેઓ દુશ્મન નંબર વન છે.તેમણે ઉમેર્યું હતું કે ડોનાલ્ડ ટ્રમ્પ એક નિર્ણાયક નેતા છે. તેમણે ક્યારેય અન્ય લોકોની જેમ નબળા માર્ગે તેમની સાથે સોદાબાજીનો માર્ગ અપનાવ્યો નથી, જેના કારણે તેમને યુરેનિયમને સમૃદ્ધ બનાવવાનો માર્ગ મળ્યો

એક ખાસ ઇન્ટરવ્યુમાં નેતન્યાહૂએ ઘટસ્ફોટ કર્યો હતો કે ગુપ્તચર એજન્સીઓ સંપૂર્ણપણે સચોટ હતી કે ઈરાન પરમાણુ શસ્ત્રો બનાવવાની નજીક છે. તેઓ યુરેનિયમમાંથી પરમાણુ બોમ્બ બનાવવા જઈ રહ્યા હતા. તેઓ એક મહિનાની અંદર પરમાણુ પરીક્ષણ કરવાની નજીક હતા અને એક વર્ષમાં તેમના હાથમાં પરમાણુ શસ્ત્ર હોત.ઇઝરાયલી પીએમએ હિઝબુલ્લાહ અને હમાસ તરફ ઈશારો કરીને દાવો કર્યો હતો કે ઈરાને તેના પ્રોક્સી દળોની મદદથી ટ્રમ્પની હત્યા કરવાનો બે વાર પ્રયાસ કર્યો હતો. ટ્રમ્પ ઈરાનના દુશ્મન નંબર વન છે. 'આપણી જવાબદારી છે કે આપણે ફક્ત પોતાને બચાવવા જ નહીં, પણ દુનિયાને પણ મદદ કરીએ. ટ્રમ્પને મારવા ઉપરાંત, તેઓ મને પણ મારવા માંગતા હતા.આમ કહી નેતન્યાહૂએ પોતાને ટ્રમ્પનો જુનિયર પાર્ટનર ગણાવ્યો.