આઈપીએલ 2025ની 18મી સીઝન તેની અડધી સફર પૂર્ણ કરી ચૂકી છે. ચાહકોને રોમાંચક મેચો પણ જોવા મળી રહી છે. લખનઉ સુપર જાયન્ટ્સ અને પંજાબ કિંગ્સની ટીમોએ અપેક્ષાઓ કરતાં વધુ સારું પ્રદર્શન કર્યું છે. બીજી તરફ, આ સીઝન ચેન્નાઈ સુપર કિંગ્સ અને સનરાઇઝર્સ હૈદરાબાદ માટે એક દુઃસ્વપ્નથી ઓછી રહી નથી.

ચેન્નાઈ સુપર કિંગ્સ ટીમે આ સિઝનમાં અત્યારસુધીમાં કુલ 8 મેચ રમી છે, જેમાંથી ટીમે બે જીતી છે અને 6 મેચ હારી છે. ચાર પોઈન્ટ સાથે, તેનો નેટ રન રેટ માઈનસ ૧.૩૯૨ છે અને પોઈન્ટ ટેબલમાં છેલ્લા સ્થાને છે. ચાલુ સિઝનમાં તેની હજુ 6 મેચ બાકી છે. જો ટીમ આ બધી મેચ જીતી જાય અને નેટ રન રેટ વધારવા પર ધ્યાન કેન્દ્રિત કરે તો તેના માટે પ્લેઓફનો રસ્તો સરળ બની શકે છે. પરંતુ ચેન્નાઈની ટીમ જે રીતે પ્રદર્શન કરી રહી છે. આવી સ્થિતિમાં, જો સીએસકે ટીમ પ્લેઓફમાં પ્રવેશ કરે છે, તો તે કોઈ ચમત્કારથી ઓછું નહીં હોય. હાલમાં, તેના પ્લેઓફમાં પહોંચવાની આશા બહુ ઓછી છે.

બીજી તરફ, ગુજરાત ટાઇટન્સ, દિલ્હી કેપિટલ્સ, આરસીબી, પંજાબ કિંગ્સ અને લખનઉ સુપર જાયન્ટ્સ ટીમોએ વર્તમાન સિઝનમાં સારું પ્રદર્શન કર્યું છે. આ બધી ટીમોના ૧૦-૧૦ પોઈન્ટ છે. આમાંથી ચાર ટીમો પ્લેઓફમાં પહોંચવાની ઉચ્ચ તકો ધરાવે છે. ખાસ વાત એ છે કે આ તમામ 5 ટીમોનો નેટ રન રેટ પ્લસમાં છે.

ગુજરાત ટાઇટન્સની ટીમે અત્યારસુધીમાં કુલ 7 મેચ રમી છે, જેમાંથી તેણે 5 મેચ જીતી છે. 10 પોઈન્ટ સાથે તેનો નેટ રન રેટ પ્લસ 0.984 છે. તે પોઈન્ટ ટેબલમાં ટોચ પર યથાવત્ છે. દિલ્હી કેપિટલ્સ ટીમ બીજા સ્થાને છે. તેનો નેટ રન રેટ 0.589 છે. ત્રણેય ટીમો, આરસીબી, પંજાબ કિંગ્સ અને લખનઉ સુપર જાયન્ટ્સે 8-8 મેચ રમી છે. આરસીબીની ટીમ (0.472 નેટ રન રેટ) ત્રીજા સ્થાને, પંજાબ કિંગ્સની ટીમ (0.177 નેટ રન રેટ) ચોથા સ્થાને અને લખનઉની ટીમ (0.088 નેટ રન રેટ) પાંચમા સ્થાને છે.

હાર્દિક પંડ્યાની કેપ્ટનશીપ હેઠળ મુંબઈ ઈન્ડિયન્સનું પ્રદર્શન આ સિઝનમાં ઉપર-નીચે રહ્યું છે. ટીમે અત્યારસુધીમાં સિઝનમાં કુલ 8 મેચ રમી છે, જેમાંથી તેણે ચાર જીતી છે અને ચારમાં હારનો સામનો કરવો પડ્યો છે. ૮ પોઈન્ટ સાથે, તેનો નેટ રન રેટ પ્લસ ૦.૪૮૩ છે અને તે પોઈન્ટ ટેબલમાં છઠ્ઠા સ્થાને છે. વર્તમાન સિઝનમાં તેની પાસે 6 મેચ બાકી છે. પ્લેઓફમાં પહોંચવા માટે તેને બાકીની ઓછામાં ઓછી ચાર મેચ જીતવી પડશે.