ચોમાસાની ઋતુમાં વાહનચાલકો માટે એક મોટી અને સામાન્ય સમસ્યા કાર સ્ટાર્ટ ન થવાની હોય છે. ઘણીવાર ભારે વરસાદ કે પાણી ભરાયેલા રસ્તાઓ પરથી પસાર થયા પછી કાર અચાનક બંધ પડી જાય છે અથવા સ્ટાર્ટ થવામાં મુશ્કેલી ઊભી કરે છે. આવી સ્થિતિમાં લોકો ગભરાઈને તરત જ મિકેનિક પાસે દોડી જાય છે, પરંતુ કેટલીક નાની-મોટી સમસ્યાઓ તમે પોતે પણ ચેક કરી શકો છો.

જો યોગ્ય સમયે આ બાબતોનું ધ્યાન રાખવામાં આવે તો તમે કારને મોટા નુકસાન અને મોંઘા રિપેરિંગ ખર્ચમાંથી બચાવી શકો છો. વરસાદ પછી જો તમારી કાર સ્ટાર્ટ ન થતી હોય, તો તરત જ આ ૫ મહત્વપૂર્ણ વસ્તુઓ તપાસવી જોઈએ. આ અંગેની સંપૂર્ણ માહિતી અને ટિપ્સ નીચે મુજબ છે.

ચોમાસા દરમિયાન ભેજ અને પાણીના કારણે કારની ઈલેક્ટ્રિકલ અને મિકેનિકલ સિસ્ટમમાં નાની-મોટી ખામી સર્જાવવી સામાન્ય છે. કાર બંધ પડે ત્યારે મિકેનિકને બોલાવતા પહેલાં આ પાંચ સ્ટેપ જાતે ચકાસી લો:

૧. સૌથી પહેલાં બેટરી અને તેના કનેક્શન તપાસો
કાર સ્ટાર્ટ ન થાય ત્યારે સૌથી પહેલા બેટરી ચેક કરવી જોઈએ. વરસાદના ભેજને કારણે બેટરીના ટર્મિનલ પર કાટ લાગી શકે છે અથવા સફેદ ક્ષાર જામી જાય છે. આ સિવાય જો બેટરીના વાયરિંગ કનેક્શન ઢીલા થઈ ગયા હોય તો પણ સ્પાર્ક થતો નથી. બેટરીના ટર્મિનલને કપડાથી સાફ કરો અને કનેક્શન બરાબર ટાઈટ છે કે નહીં તે ચકાસો.

૨. સ્પાર્ક પ્લગ પર ધ્યાન આપો
પેટ્રોલ કારમાં એન્જિન સ્ટાર્ટ કરવા માટે સ્પાર્ક પ્લગ સૌથી મહત્વનો ભાગ ભજવે છે. સતત વરસાદ અને વાતાવરણમાં ભેજના કારણે સ્પાર્ક પ્લગ ભીના થઈ જાય છે, જેનાથી સ્પાર્કિંગ યોગ્ય રીતે થતું નથી. જો તમને શક્ય લાગે તો સ્પાર્ક પ્લગને બહાર કાઢી, તેને સાફ કરી, સૂકવીને ફરીથી લગાવીને ચેક કરી શકો છો.

૩. એર ફિલ્ટર ચકાસવું જરૂરી
જો તમારી કાર પાણી ભરાયેલા રસ્તા પરથી પસાર થઈ હોય અને એર ફિલ્ટરમાં પાણી જતું રહ્યું હોય, તો એન્જિનને જરૂરી હવાનો પુરવઠો મળતો નથી. હવા વગર એન્જિન કમ્બશન (દહન) કરી શકતું નથી અને કાર સ્ટાર્ટ થતી નથી. તેથી એર ફિલ્ટર કવર ખોલીને જુઓ. જો ફિલ્ટર ભીનું કે વધારે ખરાબ હોય તો તેને બદલી નાખવું હિતાવહ છે.

૪. વાયરિંગ અને ફ્યુઝ બોક્સની તપાસ કરો
વરસાદના પાણીના કારણે કારના ઈલેક્ટ્રિકલ વાયરિંગમાં શોર્ટ સર્કિટ થઈ શકે છે. ઘણીવાર મુખ્ય ફ્યુઝ ઊડી જવાથી કે વાયરિંગ ડિસ્કનેક્ટ થવાથી પણ આખી કારની ઈલેક્ટ્રિકલ સિસ્ટમ બંધ થઈ જાય છે. ફ્યુઝ બોક્સ ખોલીને જુઓ કે કોઈ ફ્યુઝ બળી ગયો છે કે નહીં અને તમામ મહત્વના વાયરો યોગ્ય રીતે જોડાયેલા છે કે નહીં.

​​​​​​​૫. એન્જિનમાં પાણી ગયું હોય તો ભૂલથી પણ સેલ્ફ ન મારો
જો તમારી કાર ઊંડા પાણીમાંથી પસાર થઈ હોય અને તમને શંકા હોય કે એન્જિનની અંદર પાણી જતું રહ્યું છે (હાઈડ્રોલોક થયું છે), તો બાર-બાર કાર સ્ટાર્ટ કરવાની ભૂલ ક્યારેય ન કરવી. વારંવાર સેલ્ફ મારવાથી એન્જિનના પિસ્ટન અને કનેક્ટિંગ રોડ તૂટી શકે છે, જેનાથી લાખો રૂપિયાનું નુકસાન થઈ શકે છે. આવી સ્થિતિમાં કારને ધક્કો મારીને કે ટો કરીને સીધા મિકેનિક કે સર્વિસ સેન્ટર પર લઈ જવી.

ચોમાસાની ઋતુમાં કારને હંમેશા ઊંચા અને સૂકા સ્થળે પાર્ક કરો તથા સમયસર બેટરી અને વાયરિંગનું ચેકઅપ કરાવતા રહો. થોડી સાવચેતી રાખવાથી તમે અચાનક આવતી આ મુશ્કેલીઓથી બચી શકો છો.