વિધાનસભા ચૂંટણી પહેલા આસામમાં રાજકીય ગતિવિધિઓ તેજ બની રહી છે. ગઈકાલે આસામ પ્રદેશ કોંગ્રેસ સમિતિના ભૂતપૂર્વ પ્રમુખ ભૂપેન બોરાએ પાર્ટીમાંથી રાજીનામું આપતાં રાજ્યમાં ઉથલપાથલ મચી ગઈ હતી. આ સમાચાર કોંગ્રેસ માટે આઘાતજનક હતા અને ભાજપે તેનો લાભ લેવાનો પ્રયાસ કર્યો છે. સાંજ સુધીમાં સમાચાર આવ્યા કે બોરાએ પોતાનું રાજીનામું પાછું ખેંચી લીધું છે જ્યારે મુખ્યમંત્રી શર્માએ કહ્યું કે તેઓ આજે તેમની સાથે મુલાકાત કરશે.

ચૂંટણીના આરે આવેલા આસામમાં રાજીનામાથી રાજ્યમાં રાજકીય ગરમી વધી ગઈ છે. ઉત્તર પ્રદેશના પ્રવાસે રહેલા આસામના મુખ્યમંત્રી હિમંતા બિસ્વા શર્માએ ગઈકાલે મિર્ઝાપુરમાં કહ્યું હતું કે, મને નથી લાગતું કે તેમણે (ભૂપેન બોરા) પોતાનું રાજીનામું પાછું ખેંચી લીધું છે. મેં તેમની સાથે માત્ર દસ મિનિટ પહેલા ફોન પર વાત કરી હતી અને તેમણે મને આજે સાંજે સાત વાગ્યે તેમના ઘરે આમંત્રણ આપ્યું છે. જો તેમણે પોતાનું રાજીનામું પાછું ખેંચ્યું હોત તો તેઓ મને શા માટે આમંત્રણ આપત?

તેમણે ઉમેર્યું, એવી શક્યતા છે કે તેઓ ભાજપમાં જોડાશે. હું ઇચ્છું છું કે તેઓ ભારતીય જનતા પાર્ટી (ભાજપ)માં જોડાય. કારણ કે તેઓ આસામમાં કોંગ્રેસમાં છેલ્લા હિન્દુ નેતા છે. સાંજે સાત વાગ્યે બેઠક પછી આ વાતની પુષ્ટિ કરવામાં આવશે.

અગાઉ રાજીનામાથી ઉત્સાહિત થયેલા ઘણા પક્ષના નેતાઓએ દાવો કર્યો હતો કે આસામ કોંગ્રેસના ભૂતપૂર્વ વડા ભૂપેન બોરાએ હાઇકમાન્ડના હસ્તક્ષેપ પછી તેમના રાજીનામા પર પુનર્વિચાર કરવાનો નિર્ણય લીધો હતો. રાજ્ય કોંગ્રેસના પ્રભારી જિતેન્દ્ર સિંહે દાવો કર્યો હતો કે પાર્ટી પ્રમુખ મલ્લિકાર્જુન ખડગે અને રાહુલ ગાંધી સાથે વાત કર્યા પછી બોરાએ તેમનું રાજીનામું પાછું ખેંચી લીધું હતું. જોકે, બોરાએ કહ્યું કે તેમણે હાઇકમાન્ડ પાસેથી તેમના નિર્ણય પર પુનર્વિચાર કરવા માટે સમય માંગ્યો છે.

જીતેન્દ્ર સિંહે બોરાના ઘરની બહાર પત્રકારોને જણાવ્યું હતું કે, પાર્ટી નેતૃત્વએ આ બાબતે બોરા સાથે વાત કરી છે. રાહુલ ગાંધીએ પણ તેમની સાથે 15 મિનિટ વાત કરી હતી. રાજીનામા અંગે જીતેન્દ્રએ કહ્યું, આ અમારી પાર્ટીનો આંતરિક મામલો છે. અમે તેમને પરેશાન કરતા મુદ્દાઓ પર વિગતવાર ચર્ચા કરી, અને હું રાજીનામું પાછું ખેંચવા બદલ તેમનો આભાર માનું છું. જીતેન્દ્ર સિંહ ઉપરાંત, આસામ કોંગ્રેસના પ્રદેશ પ્રમુખ ગૌરવ ગોગોઈ, સાંસદ પ્રદ્યુત બોરદોલોઈ, વિધાનસભામાં વિરોધ પક્ષના નેતા દેવબ્રત સૈકિયા અને અન્ય પાર્ટીના ધારાસભ્યો સહિત ઘણા વરિષ્ઠ કોંગ્રેસ નેતાઓ ભૂપેન બોરાને મનાવવા માટે તેમના ઘરે પહોંચ્યા અને તેમને મનાવવાનો પ્રયાસ કર્યો હતો.

બીજી તરફ, બોરાએ કહ્યું કે તેમણે પાર્ટી હાઇકમાન્ડ પાસેથી તેમના નિર્ણય પર પુનર્વિચાર કરવા માટે સમય માંગ્યો છે. તેમણે કહ્યું, મારા કેટલાક જૂના સાથીઓ અને પાર્ટીના કેન્દ્રીય નેતૃત્વએ મારા ઘરે મુલાકાત લીધી હતી અને હું તેમનો આદર કરું છું. તેમણે ઉમેર્યું, મેં આજ સવાર સુધીનો સમય માંગ્યો હતો જેથી હું મારા પરિવાર સાથે વાત કરી શકું અને આગળનો નિર્ણય લઈ શકું.
બોરા લગભગ 32 વર્ષથી કોંગ્રેસ પાર્ટી સાથે જોડાયેલા હતા. તેમણે રાજીનામા અંગે નિર્ણય લેવા માટે સમય માંગ્યો હતો. અંતિમ નિર્ણય લેતા પહેલા તેઓ ઘણા વરિષ્ઠ નેતાઓ અને શુભેચ્છકો સાથે સલાહ-સૂચન કરી રહ્યા હતા. તેમનું કહેવું છે કે તેમણે રાજીનામું આપીને કંઈ ખોટું કર્યું નથી. બોરા બિહપુરિયા મતવિસ્તારમાંથી બે વાર ધારાસભ્ય તરીકે ચૂંટાયા હતા. બોરા 2021થી 2025 સુધી આસામ કોંગ્રેસના પ્રદેશ પ્રમુખ તરીકે સેવા આપી હતી અને ગયા વર્ષે ગૌરવ ગોગોઈએ તેમનું સ્થાન લીધું હતું.

મુખ્યમંત્રી શર્માના તેમના ઘરે જવાના નિવેદન અંગે ભૂપેન બોરાએ કહ્યું, જો કોઈ મુખ્યમંત્રી મારા ઘરે જવા માંગે છે, તો તે ખૂબ ગર્વની વાત છે. કોંગ્રેસમાંથી સરમાના વિદાયનો ઉલ્લેખ કરતા બોરાએ કહ્યું, એક સમયે, સરમાને પણ પાર્ટી છોડવાની ફરજ પડી હતી. કારણ કે તેમને 58 ધારાસભ્યોના સમર્થન છતાં આસામના મુખ્યમંત્રી બનાવવામાં આવ્યા ન હતા. શું આ આંતરિક પક્ષની રાજનીતિ છે? આ રાજકારણ ક્યાં સુધી ચાલુ રહેશે? તેવા સવાલો ઉઠ્યા છે. અગાઉ, સીએમ શર્માએ કહ્યું હતું કે ભૂપેન બોરા માટે ભાજપના દરવાજા ખુલ્લા છે અને જો તેઓ પાર્ટીમાં જોડાશે તો તેમને સુરક્ષિત બેઠક પરથી ચૂંટવામાં મદદ કરવાનું વચન આપ્યું હતું.