ચીખલી તાલુકા સહિત આસપાસના ગ્રામ્ય વિસ્તારોમાં છેલ્લા કેટલાક સમયથી દીપડાની અવરજવર અને સક્રિયતામાં ચિંતાજનક વધારો જોવા મળી રહ્યો છે. દિનપ્રતિદિન વધતા જતાં દીપડાના આંટાફેરા અને હુમલાની ઘટનાઓને કારણે સ્થાનિક રહેવાસીઓમાં ભારે ભય અને ફફડાટનો માહોલ વ્યાપી ગયો છે. હાલમાં જ પવિત્ર નવરાત્રી મહોત્સવની શરૂઆત થઈ હોવાથી રાત્રિના સમયે ગરબા રમવા જતાં ખેલૈયાઓ તેમજ રોજિંદા કામકાજ અર્થે બહાર નીકળતા ગ્રામજનો માટે દીપડાની આ અવરજવર એક મોટો પડકાર અને જોખમ બની ગઈ છે.

નવસારીના ચીખલી તાલુકાના મીણકચ્છ ગામના નાયકીવાડ વિસ્તારમાં રાત્રે અચાનક વીજ પુરવઠો ખોરવાઈ ગયો હતો. વીજળી ગુલ થતાં ઘોર અંધારા વચ્ચે ઘરના આંગણામાં રમી રહેલા ૧૩ વર્ષીય બાળક નૈતિક અંકિતભાઈ પટેલ પર દીપડાએ અચાનક હુમલો કરી દીધો હતો. દીપડાએ બાળકને પકડીને આશરે ૧૫ ફૂટ સુધી ઢસડી જવાનો પ્રયાસ કર્યો હતો. બાળકે બૂમાબૂમ કરી મૂકતાં તેની માતા તાત્કાલિક બહાર દોડી આવી હતી. માતાએ બૂમાબૂમ કરતી જોઈ દીપડો બાળકને છોડીને નજીકના ખેતર તરફ ભાગી છૂટ્યો હતો.

આ હુમલામાં બાળકના માથા અને કમરના ભાગે ગંભીર ઈજાઓ પહોંચી હતી. પરિવારજનો અને ગ્રામજનો દ્વારા ઈજાગ્રસ્ત બાળકને તાત્કાલિક સારવાર અર્થે ચીખલીની ખાનગી હોસ્પિટલમાં ખસેડવામાં આવ્યો હતો, જ્યાં તેના માથાના ભાગે ત્રણથી વધુ ટાંકા લેવા પડ્યા હતા.

બનાવ અંગેની જાણ થતાં જ વન વિભાગની ટીમ ઘટનાસ્થળે પહોંચી હતી. સ્થાનિક પરિસ્થિતિનો તાગ મેળવીને અને જરૂરી સર્વે હાથ ધરીને વન વિભાગે દીપડાને વહેલી તકે પાંજરે પૂરવા માટે મીણકચ્છ વિસ્તારમાં ત્રણ જેટલાં પાંજરાં ગોઠવી દીધાં છે.

ચીખલી તાલુકામાં દીપડાનો આતંક માત્ર એક ગામ પૂરતો સીમિત રહ્યો નથી. એક જ રાત્રિ દરમિયાન દીપડાએ ચાસા ગામે એક બકરાનો શિકાર કરીને તેને પોતાનો આહાર બનાવ્યો હતો. આ સિવાય, સોલધરા ગામે આવેલા ઇકો પોઇન્ટ તળાવ પાસે તળાવની ફરતે તારની ફેન્સિંગની કામગીરી કરી રહેલા શ્રમજીવીઓની એકદમ નજીક દીપડો આવી ચડ્યો હતો. મજૂરોની સાવ નજીક દીપડો આવી પહોંચતાં સ્થળ પર હાજર શ્રમજીવીઓ અને ગ્રામજનોમાં ભારે અફરાતફરી અને ફફડાટ મચી ગયો હતો.

સતત વધી રહેલી આ ઘટનાઓને પગલે વન વિભાગ દ્વારા દીપડાને વહેલી તકે પકડવામાં આવે અને રાત્રિના સમયે ગામડાઓમાં યોગ્ય પેટ્રોલિંગ કરવામાં આવે તેવી લોકમાગ પ્રબળ બની છે.