ઔદ્યોગિક હબ તરીકે જાણીતા ભરૂચ જિલ્લાના સાયખા GIDC વિસ્તારમાંથી આજે એક અત્યંત ચિંતાજનક દુર્ઘટનાના સમાચાર સામે આવ્યા છે. સાયખા GIDC માં આવેલી 'મોરડિયા કેમિકલ કંપની' ના એકમમાં આજે અચાનક ભીષણ આગ ફાટી નીકળી હતી. પ્લાન્ટમાં મોટા પ્રમાણમાં જ્વલનશીલ કેમિકલનો જથ્થો સંગ્રહિત હોવાના કારણે આગે જોતજોતામાં રૌદ્ર સ્વરૂપ ધારણ કરી લીધું હતું. આકસ્મિક રીતે લાગેલી આગને પગલે કંપની પરિસરમાં કામ કરી રહેલા શ્રમિકો, ટેકનિશિયનો અને અન્ય કર્મચારીઓમાં ભારે અફરાતફરી અને દોડધામનો માહોલ સર્જાયો હતો.

આગ એટલી ભયાનક હતી કે તેના કાળાડિબાંગ ધુમાડાના ગોટેગોટા આકાશમાં કેટલાય કિલોમીટર દૂર સુધી સ્પષ્ટપણે જોઈ શકાતા હતા. કેમિકલ યુનિટ હોવાના કારણે આજુબાજુ આવેલી અન્ય ઔદ્યોગિક કંપનીઓ અને સ્થાનિક વિસ્તારમાં પણ ભારે ભય અને ફફડાટનો માહોલ વ્યાપી ગયો હતો. ઘટના અંગેની જાણ તાત્કાલિક ઇમરજન્સી સર્વિસને કરવામાં આવતાં ભરૂચ, વાગરા અને આસપાસના ફાયર સ્ટેશનોમાંથી ફાયર ફાઇટરોની ટીમો વિશાળ કાફલા સાથે ઘટનાસ્થળે દોડી આવી હતી.

ફાયર વિભાગના કર્મચારીઓ દ્વારા આધુનિક વોટર બોઝર અને ખાસ ફોમ (Foam) ટેન્કરોની મદદથી આગ પર કાબૂ મેળવવા માટે યુદ્ધના ધોરણે કામગીરી શરૂ કરવામાં આવી છે. કેમિકલના અત્યંત જ્વલનશીલ પદાર્થોને કારણે આગ વારંવાર પુનઃ ભડકી રહી હોવાથી ફાયર બ્રિગેડના લાસ્કરોને ભારે મુશ્કેલીનો સામનો કરવો પડી રહ્યો છે. સુરક્ષા અને સાવચેતીના પગલે પોલીસે આસપાસના રસ્તાઓ બંધ કરીને સમગ્ર વિસ્તારને કોર્ડન કરી લીધો છે તથા નજીકની અન્ય કંપનીઓને પણ એલર્ટ કરી દેવામાં આવી છે.

​​​​​​​પ્રાથમિક માહિતી મુજબ, આગ લાગવાનું ચોક્કસ કારણ હજુ સુધી જાણી શકાયું નથી. શોર્ટ સર્કિટના કારણે આગ લાગી કે કોઈ રાસાયણિક પ્રક્રિયા દરમિયાન આ ઘટના ઘટી તે અંગે સ્થાનિક પ્રશાસન અને તજજ્ઞો દ્વારા ઊંડાણપૂર્વક તપાસ હાથ ધરવામાં આવી રહી છે. સદનસીબે, સમયસર શ્રમિકોને બહાર કાઢી લેવાતાં હજુ સુધી કોઈ જાનહાનિ કે ગંભીર ઈજાના સત્તાવાર અહેવાલ પ્રાપ્ત થયા નથી. ફાયર વિભાગ દ્વારા આગ સંપૂર્ણપણે બુઝાવ્યા બાદ જ નુકસાનનો ચોક્કસ આંકડો સ્પષ્ટ થઈ શકશે.