ગુજરાત રાજ્યમાં આજે હવાઈ હુમલા જેવી આકસ્મિક પરિસ્થિતિનો સામનો કરવા માટે એક વ્યાપક મોકડ્રિલનું આયોજન કરવામાં આવ્યું હતું. આ મોકડ્રિલનો મુખ્ય ઉદ્દેશ્ય સંભવિત હવાઈ હુમલા દરમિયાન નાગરિકોની સુરક્ષા સુનિશ્ચિત કરવા અને સરકારી તંત્રની તૈયારીની ચકાસણી કરવાનો હતો.

​​​​​​​મોકડ્રિલ દરમિયાન, રાજ્યના કેટલાક સંવેદનશીલ વિસ્તારોને 'કાલ્પનિક' હુમલાનો શિકાર બનાવવામાં આવ્યા હતા. પ્રાપ્ત માહિતી અનુસાર, સોમનાથ મંદિર, વેરાવળ કોસ્ટગાર્ડ અને જામનગર એરફોર્સ સ્ટેશન પર ડ્રોન અને મિસાઈલ દ્વારા હુમલાનું દ્રશ્ય ઊભું કરવામાં આવ્યું હતું. આ કાલ્પનિક હુમલા બાદ તાત્કાલિક રાહત અને બચાવ કામગીરી શરૂ કરવામાં આવી હતી.

મોકડ્રિલ પૂર્ણ થયા બાદ રાજ્યભરમાં 'બ્લેકઆઉટ' શરૂ કરવામાં આવ્યું હતું. આ બ્લેકઆઉટનો હેતુ યુદ્ધ જેવી પરિસ્થિતિમાં દુશ્મન વિમાનોને લક્ષ્ય બનાવવાથી રોકવા માટે રોશની ઓછી કરવાનો હતો. શહેરો અને નગરોમાં મોટાભાગની લાઇટ્સ બંધ કરી દેવામાં આવી હતી, અને આવશ્યક સેવાઓ સિવાયની અન્ય લાઇટ્સ પર નિયંત્રણ મૂકવામાં આવ્યું હતું.